சென்னை,ஏப்.16–
சென்னை துறைமுகம் சட்டமன்றத் தொகுதியில், மதச்சார்பற்ற முற்போக்கு கூட்டணி சார்பில் போட்டியிடும், சென்னை கிழக்கு மாவட்ட திமுக செயலாளரும் வேட்பாளருமான பி.கே. சேகர்பாபுவை ஆதரித்து, சென்னை தம்புசெட்டி தெரு, மண்ணடி சந்திப்பு பகுதியில் திமுக துணைப் பொதுச் செயலாளரும், நாடாளுமன்ற திமுக குழுத் தலைவருமான கனிமொழி கருணாநிதி தேர்தல் பிரச்சாரம் மேற்கொண்டு, பொதுமக்களிடம் உதயசூரியன் சின்னத்திற்கு வாக்குகள் சேகரித்தார்.
இதில் அவர் பேசியது வருமாறு:–
இந்தத் தொகுதியின் நிரந்தரமான வெற்றி வேட்பாளரான, முதலமைச்சர் மு.க. ஸ்டாலின் அவர்கள் ‘செயல் பாபு’ என்று அன்போடு அழைக்கும் நம்முடைய அமைச்சர் சேகர் பாபு அவர்களுக்கு, உங்கள் பொன்னான அன்பான வாக்குகளை உதயசூரியன் சின்னத்தில் அளித்து, அவரை வெற்றி பெறச் செய்ய வேண்டும் என்று உங்களை எல்லாம் நான் வேண்டிக் கேட்டுக் கொள்கிறேன்.
நாம் மக்களை சந்தித்து, திராவிட முன்னேற்றக் கழகத்திற்கும் உதயசூரியன் சின்னத்திற்கும் வாக்களிக்க வேண்டும் என்று கேட்கும் போது, மகிழ்ச்சியுடனும் உரிமையுடனும் இங்கு உள்ள சகோதரிகளையும் சகோதரர்களையும் சந்தித்து வாக்களிக்குமாறு கேட்டுக் கொள்கிறோம். ஏனெனில், எங்களுடைய முதலமைச்சர் அவர்கள் அளித்த அனைத்து வாக்குறுதிகளையும் நிறைவேற்றி தந்திருக்கிறார்.
நம்முடைய வேட்பாளர், இந்தப் பகுதியின் மக்களுடன் தொடர்ந்து பணியாற்றி வருபவர். உங்களில் பலரையும் பெயர் கூறி அழைக்கும் அளவிற்கு நெருக்கமாக இருப்பவர். எந்த பதவி வந்தாலும், உங்களை விட்டு விலகாமல் உங்களோடு இருப்பவர். நீங்கள் எந்த நேரத்தில் அழைத்தாலும் உடனே வந்து உதவி செய்வவர். இரவு நேரமாக இருந்தாலும் அழைப்பை ஏற்று செயல்படும் அமைச்சர் என்றால், அது நம்முடைய சேகர் பாபு அவர்கள் தான். ஆகவே, இந்தத் தொகுதியில் அவரின் வெற்றி உறுதி.
தேர்தல் நேரத்தில் நம்முடைய முதலமைச்சர் அவர்கள், சகோதரிகளுக்கு 1,000 ரூபாய் மகளிர் உரிமைத் தொகை வழங்குவோம் என்று கூறி, அதை நிறைவேற்றியுள்ளார். மேலும், முதலமைச்சரின் முதல் கையெழுத்தாக பெண்களுக்கான ‘விடியல் பயணம்’ திட்டம் அமல்படுத்தப்பட்டது. இதனால், ஒவ்வொரு மாதமும் பெண்கள் 800 முதல் 1,000 ரூபாய் வரை சேமித்து வருகின்றனர்.
நம்முடைய மாணவர்கள் பசியுடன் இருக்கக்கூடாது என்பதற்காக காலை உணவுத் திட்டம் கொண்டு வரப்பட்டது. கல்லூரி மாணவர்களுக்கு மாதம் 1000 ரூபாய் வழங்கப்படுகிறது, அது 1500 ரூபாயாக உயர்த்தப்படும். இன்னும் ஒரு மாதத்தில், முத்துவேல் கருணாநிதி ஸ்டானின் அவர்களின் ஆட்சி அமைந்தவுடன், 1500 ரூபாயாக உயர்த்தி வழங்கப்படும். மாணவர்கள் படித்து முடித்தவுடன், வேலை தேடும் இளைஞர்களுக்கு பயிற்சி அளிக்கப்படும் காலத்திலும் மாதம் 1500 ரூபாய் வழங்கப்படும்.
இந்தியாவில் முதன்முதலாக தகவல் தொழில்நுட்பத்திற்கான ஒரு கொள்கையை கொண்டு வந்தவர் தலைவர் கலைஞர். அவரின் வழியில், முதலமைச்சர் அவர்கள் அடுத்த கட்டமாக உள்ள செயற்கை நுண்ணறிவு (AI) போன்ற புதிய தொழில்நுட்பங்களில் மாணவர்கள் முன்னேறுவதற்காக பயிற்சிகள் வழங்க உள்ளார். அடுத்த ஐந்து ஆண்டுகளில், 35 லட்சம் மாணவர்களுக்கு லேப்டாப்புகள் வழங்கப்படும். காலை உணவுத் திட்டம் எட்டாம் வகுப்பு வரை விரிவுபடு த்தப்படும். சுய உதவி குழு பெண்களுக்கு 5 லட்சம் வரை மானியக் கடன் வழங்கப்படும். 8,000 ரூபாய் மதிப்பிலான கூப்பன் வழங்கப்பட்டு, பெண்கள் தங்கள் தேவைக்கேற்ப வீட்டு உபயோகப் பொருட்களை வாங்கிக் கொள்ளலாம்.
இந்தத் தொகுதியில், மதுரவாயில்–துறைமுகம் உயர்மட்டச் சாலை திட்டத்திற்கு ₹5,770 கோடி ஒதுக்கப்பட்டுள்ளது. வடசென்னை வளர்ச்சி திட்டத்திற்கு, ₹1,000 கோடியில் ஆரம்பித்து ₹6,000 கோடிக்கு மேல் ஒதுக்கப்பட்டு பணிகள் நடைபெற்று வருகின்றன. யானைக் கவுனி மேம்பாலம் கட்டப்பட்டுள்ளது. ₹800 கோடி மதிப்பில் பிராட்வே பேருந்து நிலையம் அமைக்கப்படுகிறது.
அடுத்த கட்டமாக, மெட்ரோ ரயில் நிலையங்களுக்கான போக்குவரத்து இணைப்பு வசதிகள் ஏற்படுத்தித்தரப்படும். நவீன மல்டி லெவல் பார்க்கிங் வாகன நிறுத்தங்கள் அமைக்கப்படும். தேவைப்படும் அனைத்து இடங்களிலும் அடுத்த ஐந்து ஆண்டுகளுக்குள் வெள்ளநீர் வடிகால் வசதி ஏற்படுத்தப்படும். முதல்வர் படிப்பகங்கள், வேலைக்குச் செல்லும் பெண்களுக்கான குழந்தைகள் பராமரிப்பு மையங்கள் அமைக்கப்படும்.
திமுக ஆட்சிக்கு வந்தால் பெரும்பான்மை மக்களுக்கு எதிரானவர்கள் என்று கூறப்படு கின்ற நிலையில், நம்முடைய அமைச்சர் அவர்கள் பெரும்பான்மை மக்களுக்கு எந்தளவிற்கு நன்மை செய்துள்ளார் என்பதற்கு இது ஒரு எடுத்துக்காட்டாகும். 4,430 கோயில்களுக்கு குடமுழுக்கு செய்யப்பட்டு, 7,000 ஏக்கருக்கு மேற்பட்ட கோயில் நிலங்கள் மீட்கப்பட்டு ள்ளன. பெரும்பான்மை மக்கள் வழிபடும் கோயில்களை பாதுகாத்த ஆட்சி திராவிட முன்னேற்றக் கழக ஆட்சி. இதில் முக்கிய பங்கு அமைச்சர் சேகர் பாபு அவர்களுக்கு உள்ளது. அவருக்கு வாக்களித்து, மீண்டும் திமுக ஆட்சியை கொண்டு வர வேண்டும்.
திடீரென, தேர்தல் நேரத்தில் 3 நாட்களுக்கு நாடாளுமன்றத்தை கூட்டியுள்ளனர். பாஜக அரசு, நாடாளுமன்றத்தில் மகளிர் மசோதாவையும் தொகுதி மறுசீரமைப்பையும் கொண்டு வருகிறது. மகளிர் மசோதாவை திராவிட முன்னேற்றக் கழகம் வரவேற்கிறது. தற்போதைய 543 இடங்களில் 33% பெண்களுக்கு ஒதுக்கீடு வழங்க வேண்டும் என்பது திமுகவின் நிலைப்பாடு ஆகும்.
ஆனால், பாஜக பெண்களை முன்னிறுத்தி, அவர்களின் பின்னால் நின்று கொண்டு, தமிழ்நாட்டின் உரிமைகளை பறிக்க முயற்சி செய்கிறது. தமிழ்நாட்டின் எம்.பி.க்க ளின் எண்ணிக்கையை குறைக்க நினைக்கி றார்கள்.
வடமாநிலங்களில் உள்ள தொகுதிகளின் எண்ணிக்கையை அதிகரிக்கவும், பாஜகவிற்கு வாக்களிக்காத தென்மாநிலங்களின் எண்ணிக்கையை குறைக்கவும் அவர்கள் முயற்சி செய்து வருகின்றனர். நம்முடைய முதலமைச்சர் மட்டுமல்லாமல், அண்டை மாநிலங்களின் தலைவர்களும் இந்தக் கருத்தை ஆதரித்து வருகின்றனர். தெலுங்கானா முதலமைச்சர் ரேவந்த் ரெட்டி அவர்கள், கேரள முதலமைச்சர் உள்ளிட்ட பலரும் நம்முடைய முதலமைச்சர் அவர்களின் கருத்துக்களை வரவேற்று, “உங்களோடு நின்று போராடுகிறோம்” என்று தெரிவித்துள்ளனர்.
இங்கே, தமிழ்நாட்டுக்கு துரோகம் செய்து கொண்டிருக்கக்கூடிய எடப்பாடி பழனிசாமி அவர்கள் என்ன சொல்கிறார் என்றால், “இது நல்ல விஷயம் தானே; இதை ஏன் நாம் எதிர்க்க வேண்டும்?” என்று கேட்கிறார். எது நல்ல விஷயம்? டெல்லியில் 39 நாடாளுமன்ற உறுப்பினர்கள் உரிமைகளுக்காக போராடி வருகின்றோம். அந்த எண்ணிக்கை குறைந்துவிட்டால், அனைத்து மசோதாக்களையும் நம்முடைய ஒப்புதல் இல்லாமல் அவர்களால் நிறைவேற்ற முடியும். எதை வேண்டுமானாலும் கொண்டு வர முடியும்.
ஒரு காணொளியை முதலமைச்சர் வெளியிட்டு, தமிழ்நாடு ஒருமித்த குரலில் எழுந்து நின்று போராட வேண்டும் என்று தெரிவித்துள்ளார். தமிழ்நாட்டின் உரிமைகளை பாதுகாக்க முதலமைச்சர் தொடர்ந்து போராடி வருகிறார். தமிழர்கள் ஒன்றுபட்டு எதிர்ப்பை வெளிப்படுத்த வேண்டும். ஒவ்வொரு வீட்டிலும் கருப்புக்கொடி ஏற்றி, இந்த எதிர்ப்பை டெல்லி வரை எட்டச் செய்ய வேண்டும் என்று வேண்டுகோள் வைத்துள்ளார்.
ஒவ்வொரு தமிழனும், ஒவ்வொரு சகோதரியும் தங்கள் வீடுகளில் கருப்புக் கொடி ஏற்றி, நம்முடைய எதிர்ப்பை டெல்லி வரை எட்டும் படி செய்ய வேண்டும் என்று உங்களையெல்லாம் கேட்டுக் கொள்கிறேன். அவர்களுக்கு தமிழ் மண்ணில் ஒரு சரியான பாடத்தை சொல்லித் தர வேண்டும். “தமிழ்நாடு அவர்களை புறக்கணிக்கிறது, தமிழ்நாடு அவர்களை புறக்கணி க்கிறது” என்பதை இந்தத் தேர்தலின் வழியாக தெளிவாக வெளிப்படுத்த வேண்டும். இதுதான் தமிழ்நாடு அவர்களுக்கு சொல்லித் தரக்கூடிய பாடமாக நாம் மாற்ற வேண்டும்.
இவ்வாறு அவர் பேசினார்.