கோவில்பட்டி, ஏப்.16 –
தூத்துக்குடி மாவட்டம் கோவில்பட்டி சட்டமன்றத் தொகுதியில் மதச்சார்பற்ற முற்போக்கு கூட்டணியின் சார்பில் போட்டியிடும் திமுக வேட்பாளர் கா.கருணாநிதியை ஆதரித்து, கோவில்பட்டி பேருந்து நிலையம் அருகில் திமுக துணைப் பொதுச் செயலாளரும், நாடாளுமன்ற திமுக குழுத் தலைவருமான கனிமொழி கருணாநிதி தேர்தல் பிரச்சாரம் மேற்கொண்டு, பொதுமக்களிடம் உதயசூரியன் சின்னத்திற்கு வாக்குகள் சேகரித்தார்.
தேர்தல் பிரச்சாரத்தில் பேசிய கனிமொழி கருணாநிதி எம்.பி.; இந்த கோவில்பட்டி தொகுதியில், முதலமைச்சர் அவர்கள் தேர்ந்தெடுத்து வழங்கியுள்ள வேட்பாளர் கருணாநிதி அவர்களுக்கு, உதயசூரியன் சின்னத்தில் வாக்களித்து அவரை வெற்றி பெறச் செய்ய வேண்டும்
திமுக தலைவர் கருணாநிதி தனது வாழ்நாளில் தோல்வியே கண்டதில்லை. அவர் பெயரை தாங்கியுள்ள கோவில்பட்டி தொகுதி திமுக வேட்பாளரும் வெற்றியை மட்டுமே காண வேண்டும். அதுவும் ஒரு மிகப்பெரிய வெற்றியை நீங்கள் அவருக்காக பெற்றுத் தர வேண்டும்.
நாங்கள் மக்களுக்கு வழங்கிய வாக்குறுதிகளை நிறைவேற்றி யுள்ளோம் என்ற நம்பிக்கையுடனும், மகிழ்ச்சியுடனும், உரிமையுடனும் மக்களை சந்தித்து வாக்கு கேட்கிறோம். மகளிர் உரிமைத் தொகையாக ஆயிரம் ரூபாய் வழங்குவேன் என்று முதலமைச்சர் தேர்தல் நேரத்தில் வாக்குறுதி அளித்தார். இன்று தமிழ்நாடு முழுவதும் 1.31 கோடி பெண்களுக்கு மகளிர் உரிமைத் தொகை வழங்கப்படுகிறது. தேர்தல் முடிந்த உடன், இந்தத் தொகை 1,500 ரூபாயாக உயர்த்தி வழங்கப்படும்.
அதேபோல், முதலமைச்சராக பொறுப்பேற்றவுடன் மகளிர் விடியல் பயணம் திட்டத்திற்கு முதல் கையெழுத்திட்டார். இது மகளிருக்குப் மிகவும் பயனுள்ள திட்டமாக உள்ளது. இவ்வாறு பல்வேறு வளர்ச்சி திட்டங்களை முதலமைச்சர் வழங்கி வருகிறார். அதேபோல், ஒவ்வொரு நாளும் தமிழ்நாட்டின் உரிமைகளை பாதுகாப்பதற்காக ஒன்றிய பாஜகவுடன் தொடர்ந்து போராடி, உரிமைகளையும் தமிழ் அடையாளங்களையும் காக்கும் ஆட்சியாக திமுக ஆட்சி செயல்பட்டு வருகிறது.
பாஜக தமிழ்நாட்டுக்கு எந்த திட்டத்தையும் தருவதில்லை. தமிழ்நாட்டுடைய நிதியை எடுத்து கொண்டு போகின்றனர். ஆனால், தமிழ்நாட்டுக்கு மறுபடியும் தர வேண்டிய நிதி எதுவுமே வந்து சேர்வது கிடையாது. இந்தி படித்தால் தான் தமிழ்நாட்டுக்கான கல்வி நிதி ரூ.3600 கோடியை ஒன்றிய பாஜக அரசு பிடித்து வைத்துள்ளது.
தமிழ்நாட்டுக்கு மெட்ரோ ரயில் திட்டம் கேட்டால், மக்கள் தொகையை காரணமாகக் காட்டி இல்லை என்கின்றனர். ஆனால், வட இந்தியாவில் மக்கள் தொகை குறைவாக உள்ள பகுதிகளுக்கும் மெட்ரோ திட்டங்கள் கொடுக்கப்பட்டுள்ளது. தமிழ்நாட்டு மக்கள் புயல், மழையால் பாதிக்கப்படும்போது, நாம் கேட்கும் நிதியில் கால்வாசி கூட ஒன்றிய அரசு கொடுப்பது கிடையாது.
பிரதமர் வீடு கட்டும் திட்டத்தில் 61 சதவீத நிதியை தமிழ்நாடு அரசு வழங்குகிறது; அவர்கள் 39 சதவீதம் மட்டுமே வழங்குகின்றனர். இப்படி தமிழ்நாட்டுக்கு வரவேண்டிய திட்டங்க ளுக்கு வழங்கும் நிதியை குறைச் சுக்கிட்டே வருகின்றனர்.
பாஜக ஆட்சிக்கு வந்த பிறகு, 100 நாள் வேலைத் திட்டத்தில் யாருக்கும் முறையாக வேலை கிடைப்பதில்லை. தற்போது ஒரு சட்டத்தை கொண்டு வந்துள்ளனர். டெல்லியில் இருந்து கொண்டு, தமிழ்நாட்டிலுள்ள ஊர்களுக்கு என்ன வேலை வழங்குவது, எத்தனை பேருக்கு வேலை வழங்குவது என்பதனை அவர்கள் தீர்மானி க்கிறார்கள்.
மேலும் அந்தத் திட்டத்தில் நிதியை குறைத்து, தமிழ்நாடு அரசு தான் வழங்க வேண்டும் எனக் கூறுகின்றனர். இப்படி அந்தத் திட்டத்தை வீணாக்கக்கூடிய நிலை ஏற்பட்டுள்ளது. இதனை பாஜகவுடன் கூட்டணி யில் உள்ள எடப்பாடி பழனிசாமி கேட்க மாட்டார். ஏனென்றால், அவர் தன்னை மட்டுமே பாதுகாத்துக் கொள்வார். மற்றவர்களை பற்றி எந்த அக்கறையும் அவருக்கு கிடையாது. தமிழ்நாட்டை பற்றி மட்டுமல்ல தன்னை வளர்த்த கட்சியை பற்றி கூட அவருக்கு அக்கறை இல்லை.
யாரிடம் ஆசீர்வாதம் வாங்கி முதலமைச்சர் பதவிக்கு வந்தாரோ, இன்று அந்த அம்மையாருக்கே கட்சியில இடமில்லை என்று சொல்லக்கூடியவர்தான் எடப்பாடி பழனிசாமி. திமுக ஆட்சியில் தூத்துக்குடி இன்று ஒரு வளர்ச்சி பெற்றிருக்கக்கூடிய, தொழில் வளங்கள் வந்து கொண்டிருக்கக்கூடிய, வேலைவாய்ப்புகள் கிடைக்கக்கூடிய மாவட்டமாக மாறியுள்ளது.
தமிழ்நாட்டில் குற்றச்சம்பவங்கள் அதிகரித்துவிட்டன. அதிலும் பெண்களுக்கு எதிரான குற்றங்கள் அதிகரித்துவிட்டது என பாஜக கூறுகிறது. பெண்களுக்கு எதிரான ஒரு குற்றம் கூட நடைபெறவில்லை என்ற நிலை வர வேண்டும் என்பதில் யாருக்கும் மாற்று கருத்து இல்லை.
எடப்பாடி பழனிசாமி பொள்ளாச்சியில் குற்றவாளிகளை காப்பாற்றினார். ஆனால் திமுக ஆட்சியில் குற்றவாளிகளை காப்பாற்றாமல் பாதிக்கப்பட்டவர்களுக்கு விரைவிலே நியாயம் கிடைக்கக்கூடிய வகையில் செயலாற்றி இருக்கிறார்.
தேசிய அளவில் பெண்களுக்கு எதிரான குற்றங்கள் சராசரி 65 சதவீதம் ஆகும். தமிழ்நாட்டில 23 சதவீதம் தான். பாஜக ஆளும் மாநிலங்களில் பெண்களுக்கு எதிரான குற்றங்கள் அதிகமாக உள்ளன.
வாக்குறுதிகளை நிறைவேற்றி விட்டோம். தொழில் முதலீடுகளை கொண்டு வந்து கொண்டே இருக்கிறோம். அதனால் அவர்களுக்கு சொல்வதற்கு ஒன்றுமில்லை என்பதால், பொய், புனை கதைகள் சொல்லிக் கொண்டுள்ளனர். அவர்களுக்கு இந்த தேர்தலில் சரியான பாடம் புகட்ட வேண்டும்.
தூத்துக்குடி மாவட்டத்தில் மகளிர் உரிமைத் தொகை 3,24,070 பேருக்கு வழங்கப்படுகிறது. மாவட்டத்தில் சுமார் 60 ஆயிரம் பேருக்கு பட்டா வழங்கப்பட்டுள்ளது. மேலும் தூத்துக்குடி மாவட்டத்தில் சுமார் 800 கிலோ மீட்டருக்கான சாலை பணிகள் செய்து முடிக்கப்பட்டிருக்கிறது. கலைஞர் கனவு இல்லம் 2,217 வீடுகள் கட்டி முடிக்கப்பட்டிருக்கிறது. இன்னும் ஒரு மாதத்தில் மீண்டும் திமுக ஆட்சி அமையும். அப்போது ஐந்து ஆண்டுகளில் 10 லட்சம் வீடுகள் கட்டிக் கொடுக்கப்படும் என முதலமைச்சர் தெரிவித்துள்ளார்.
மேலும், 20 லட்சம் விவசாயி களுக்கு மேல் பயன்படக்கூடிய வகையிலே அவர்களுக்கு எந்தவித மீட்டரும் பொருத்தாத மின் மோட்டார்கள் வழங்கப்படும். மகளிர் உரிமை தொகை ரூ.2 ஆயிரமாக உயர்த்தி வழங்கப்படும். மாணவர்களுக்கு வழங்கப்படும் கல்வி உதவித்தொகை ஆயிரத்திலிருந்து ரூ.1500ஆக உயர்த்தி வழங்கப்படும்.
முதியோருக்கு தரக்கூடிய உதவித்தொகை ரூ.1200லிருந்து ரூ.2000 ஆக உயர்த்தி வழங்கப்படும். அனைவரும் எதிர்பார்க்கக்கூடிய ரூ.8000 கூப்பன் மக்களிடம் வழங்கப்படும். நீங்கள் உங்கள் வீட்டுக்கு பக்கத்தில் இருக்கக்கூடிய கடைக்கு போய் உங்களுக்கு பிடித்த பொருட்களை வாங்கி கொள்ளலாம்.
கலைஞர் கருணாநிதி வழியில் வந்துள்ள முதலமைச்சர் மு.க. ஸ்டாலின் முதலமைச்சர் வாக்குறுதியை தந்தால் அதை நிச்சயமாக நிறைவேற்றி தருவார். அதை நிறைவேற்றி தருவதற்கான ஒரு வாய்ப்பை நீங்கள் இங்கே வழங்க வேண்டும். இவ்வாறு அவர் பேசினார்.
தொடர்ந்து, பாபாசாகேப் அண்ணல் அம்பேத்கர் அவர்களின் பிறந்த நாளை ஒட்டி கோவில்பட்டியில் உள்ள அம்பேத்கர் சிலைக்கு கனிமொழி கருணாநிதி எம்.பி மாலை அணிவித்து மரியாதை செலுத்தினார். தூத்துக்குடி வடக்கு மாவட்ட திமுக செயலாளரும், அமைச்சருமான கீதா ஜீவன், தூத்துக்குடி மாநகராட்சி மேயர் ஜெகன் பெரியசாமி, திமுக மற்றும் கூட்டணி கட்சி நிர்வாகிகள் உள்ளிட்ட பலர் கலந்துகொண்டனர்.