புதுடெல்லி, ஏப். 17–
நாடாளுமன்றத்தில் எதிர்க்கட்சிகளின் கடும் எதிர்ப்பையும் மீறி, தொகுதி மறுவரையறை மசோதாவை ஒன்றிய பா.ஜ.க. அரசு அறிமுகம் செய்தது. இந்த மசோதா, கூட்டாட்சிக்கும், அரசியல் சாசனத்திற்கும் எதிரானது என திமுக கடும் கண்டனம் தெரிவித்தது
தமிழ்நாடு மற்றும் மேற்குவங்கத்தேர்தலுக்கு இடையில் நாடாளுமன்ற சிறப்புக் கூட்டத்தொடர் வலுக்கட்டாயமாகக் கூட்டப்பட்டு நேற்று தொடங்கியது. ஒன்றிய பாஜக அரசுக்கு கண்டனம் தெரிவித்து திமுக எம்.பிக்கள், கருப்பு உடை அணிந்து நாடாளுமன்றத்தில் பங்கேற்றனர்.
காலை 11 மணிக்கு அவை கூடியதும் தொகுதி மறுவரையறை உள்ளிட்ட மூன்று மசோதாக்களைஅவையில் முன்மொழிய அனுமதி கோரப்பட்டது. தொகுதி மறுவரையறை மசோதாவுக்கு திமுக, காங்கிரஸ் உள்ளிட்ட இந்திய கூட்டணி கட்சிகள் அறிமுக நிலையிலேயே கடும் எதிர்ப்பு தெரிவித்தன.
அப்போது பேசிய மக்களவை திமுக குழுத் தலைவர் டி.ஆர்.பாலு, தொகுதி மறுவரையறை மசோதாவுக்கு திமுக கடும் எதிர்ப்பு தெரிவிப்பதாக கூறினார். தொகுதி மறுவரையறையை குறுக்குவழியில் திணிக்க ஒன்றிய அரசு முயற்சிப்பதாக குற்றம் சாட்டினார். ஒன்றிய அரசு தற்போது கொண்டுவந்துள்ள தொகுதி மறுவரையறை மசோதாவால் இந்தியாவின் ஜனநாயகத்துக்கே ஆபத்து என்றும் டி.ஆர்.பாலு கூறினார்..
தொடர்ந்து 3 மசோதாக்களையும் தனித்தனியாக கொண்டுவர ஒன்றிய அரசு முன்வரவில்லை இதனால், 3 மசோதாக்களையும் புரிந்து கொள்வதில் கடினமாக இருக்கிறது 2023 ஆம் ஆண்டே மகளிர் மசோதா நிறைவேற்றப்பட்டுவிட்டது
அதன்பிறகு மசோதாவை செயல்படுத்தாமல் இருந்தீர்கள் தற்போது, புதிய மசோதா தேவை இல்லை தொகுதி மறுவரையறை, மக்கள்தொகை கணக்கெடுப்புமூலம்தான் நிறைவேற்ற முடியும் என கூறுகிறீர்கள்
தொகுதி மறுவரைறை மசோதாவிற்கு எதிர்ப்பு தெரிவித்து அதன் நகலைதிமுக தலைவர் முதலமைச்சர் மு.க.ஸ்டாலின் அவர்கள் எரித்துள்ளார்
அதே நேரம் மகளிர் இடஒதுக்கீடு மசோதாவைதிமுக ஆதரிக்கிறது நாடாளுமன்றம், சட்டமன்றத்தில் மகளிருக்கு 33% இடஒதுக்கீடு வழங்கும் சட்டத்தை உடனடியாக செயல்படுத்தும் கோரிக்கையில் திமுக உறுதியுடன் இருக்கிறது என்று டி.ஆர்.பாலு குறிப்பிட்டார்.
இதைத்தொடர்ந்து பேசிய மக்களவை திமுக கொறடா ஆ.ராசா, அரசியல் சாசன மசோதாவையும், தொகுதி சீரமைப்பு மசோதாவையும் ஒன்றாக இணைத்து விவாதம் நடத்த கடும் எதிர்ப்பு தெரிவித்தார்.
தொடர்ந்து அரசியல் சாசன மசோதாவையும், தொகுதி சீரமைப்பு மசோதாவையும் ஒன்றாக இணைத்து கொண்டுவர கூடாது
முதலில் தொகுதி மறுவரையறை மசோதாவை கொண்டுவந்து நிறைவேற்ற வேண்டும் முதலில் தொகுதி மறுவரையறை மசோதா மீது விவாதம் நடத்த வேண்டும்
அதன்பிறகு தான் அரசியல் சாசன மசோதாகை கொண்டுவர வேண்டும் இதுதான் நடைமுறை என்று ஆ.ராசா தெரிவித்தார்.
எதிர்க்கட்சிகளின் கடும் எதிர்ப்பை மீறி மக்களவையில் 3 மசோதாக்கள் அறிமுகம் செய்யப்பட்டது. தொகுதி மறுவரையறை மசோதாவை மக்களவையில் அறிமுகம் செய்ய வாக்கெடுப்பு நடத்தப்பட்டது. மக்களவையில் 543 உறுப்பினர்கள் உள்ள நிலையில் வாக்கெடுப்பில் 436 பேர் பங்கேற்றனர். தொகுதி மறுவரையறை மசோதாவை அறிமுகம் செய்ய 251 பேர் வாக்களித்தனர். 185 எம்.பி.க்கள் எதிர்ப்பு தெரிவித்துள்ளனர்.
தொகுதி மறுவரையறை உள்ளிட்ட 3 மசோதாக்கள் மீது 12 மணிநேரம் விவாதம் நடைபெறும் என்று சபாநாயகர் அறிவித்துள்ளார். 3 மசோதாக்கள் மீதும் இன்று (17.4.2026) மாலை 4 மணிக்கு வாக்கெடுப்பு நடத்தப்பட உள்ளது.
இதற்கிடையே, தொகுதி மறுவரையறை மசோதாவுக்கு எதிர்ப்பு தெரிவித்து மாநிலங்களவையில் எதிர்க்கட்சி எம்.பிக்கள் முழக்கங்களைஎழுப்பியதால், நாள் முழுவதும் அவை ஒத்திவைக்கப்பட்டது.