#Title

மக்களவையில் ‘தொகுதி மறுவரையறை’ மசோதா தோல்வி!

புதுடெல்லி, ஏப்.19 –

தி.மு.க. உள்ளிட்ட எதிர்க்கட்சிகளின் கடும் எதிர்ப்பை மீறி மக்களவையில் கொண்டு வரப்பட்ட தொகுதி மறுவரையறை மசோதா தோல்வியடைந்தது. 3-இல் 2 பங்கு பெரும்பான்மை இல்லாததால் ஒன்றிய பா.ஜ.க. அரசு கொண்டு வந்த மசோதா தோல்வியடைந்தது.

ஒன்றிய பா.ஜ.க. அரசு தொகுதி மறுவரையறையை கொண்டு வந்து எப்படியும் நிறைவேற்றி தென் மாநிலங்களுக்கு வஞ்சகம் செய்ய நினைத்ததை கழகத் தலைவர், முதல்வர் மு.க.ஸ்டாலின் அவர்கள் தனது செயலால் தமிழ்நாடு முழுவதும் கருப்புக்கொடி ஏற்றப்படும் என்றுஅறிவித்தது இந்தியா முழுவதும் எதிரொலித்தது.

கருப்பு கொடி ஏற்றிய

முதல்வர் மு.க.ஸ்டாலின்!

தென் மாநிலங்களை பெரிதும் பாதிக்கும் இச்சட்டத்தினை உடனடியாக திரும்பப் பெற வேண்டும் என்றும்அதற்கு கண்டனம் தெரிவிக்கும்வகையிலும் கழகத் தலைவர், முதல்வர் மு.க.ஸ்டாலின் அவர்கள் கழகத்தினர் அனைவரும் இச்சட்ட மசோதாவிற்கு எதிராக தத்தம் இல்லங்களில் கருப்புக் கொடி ஏற்ற வேண்டும் என்று உத்தரவிட்டார்.

கழகத் தலைவர் முதல்வர் மு.க.ஸ்டாலின் அவர்கள் நாமக்கல்லில் தேர்தல் பிரச்சாரத்தில் ஈடுபட்ட போது, இச்சட்டத்திற்கு எதிர்ப்புத் தெரிவித்து நாமக்கல்லில் கருப்புக் கொடி ஏற்றியதுடன், சட்ட மசோதாவிற்கு தீ வைத்தார். கருப்பு சட்டையும் அணிந்து தொகுதி மறுவரையறைக்கு பலத்த எதிர்ப்பை பதிவு செய்தார்.

இந்நிலையில் நாடாளுமன்ற மக்களவையில் 131-வது அரசியலமைப்புத் திருத்தம் தொகுதி மறுவரையறை செய்யும் வகையிலான மகளிர் இட ஒதுக்கிடு மசோதா 16.4.2026 அன்று மக்களவையில் தாக்கல் செய்யப்பட்டது. இதன் மீதான விவாதம் 16.4.2026 அன்று நள்ளிரவு வரையில் நடைபெற்றது.

தி.மு.க. சார்பில், மக்களவையில் கழகக் குழுத் தலைவர் டி.ஆர். பாலு, நாடாளுமன்றக் குழுத் தலைவர் கனிமொழி கருணாநிதி மற்றும்மக்களவை கழகக் கொறடா ஆ.ராசா ஆகியோர் இவ்விவாதத்தில் பங்கேற்று பேசினர்.

மக்களவையில் இச்சட்டத்தின் மீது பேசிய எதிர்க்கட்சித் தலைவர் ராகுல் காந்தி, இந்த மசோதா நிறைவேற்றப்படாது என்று தெரிந்தும் தாக்கல் செய்திருக்கின்றனர். தென்னிந்தியாவை பாதிக்கப்பட விடமாட்டோம் என்றும் கூறினார்.

இந்த மசோதா மீது எதிர்க் கட்சி எம்.பி.க்கள் கடும் கண்டனம் தெரிவித்து பேசினர்.

பிரதமர் மோடி இந்த மசோதாவை நிறைவேற்றிதருமாறு கேட்டுக்கொண்டார்.

இதனையடுத்து மசோதா மீது அவையில் விவாதம் நடத்தப்பட்ட பிறகு வாக்கெடுப்பு நடைபெற்றது.

இதில், மொத்தம் 528 எம்.பி.க்கள் வாக்களித்தனர். மசோதாவுக்கு ஆதரவாக 298 பேரும், மசோதாவை எதிர்த்து 230 பேரும் வாக்களித்தனர். மசோதாவை நிறைவேற்ற 3-இல் 2 பங்கு பெரும்பான்மை வேண்டும் என்ற விதிப்படி, 352 வாக்குகள் தேவைப்படும் நிலையில், 298 வாக்குகள் மட்டுமேகிடைத்ததால், பெரும்பான்மைஇன்றி, ஒன்றிய அரசு கொண்டு வந்த தொகுதி மறுவரையறை மசோதா மக்களவையில் தோல்வியடைந்தது என்று மக்களவை சபாநாயகர் ஓம். பிர்லா அறிவித்தார்.