திருவள்ளூர், ஏப்.20:
திருவள்ளூர் அருகே உரிய ஆவணங்கள் இன்றி கொண்டுவரப்பட்ட அதிமுகவின் தேர்தல் அறிக்கையுடன் கூடிய துண்டு பிரசுரம், ரூ.2000, ரூ.10000 மதிப்பிலான 15 ஆயிரம் மாதிரி காசோலை புத்தகங்களை யும் தேர்தல் பறக்கும் படையினர் பறிமுதல் செய்து தேர்தல் நடத்தும் அலுவலர் ரவிச்சந்திரனிடம் ஒப்படைத்தனர். தமிழக சட்டமன்றத் தேர்தல் வருகிற 23ஆம் தேதி நடைபெற உள்ள நிலையில் அனைத்து கட்சி வேட்பாளர்களும் தீவிர வாக்கு சேகரிப்பில் ஈடுபட்டு வருகின்றனர். வாக்கு பதிவுக்கு இன்னும் 4 நாட்களே உள்ள நிலையில் வாக்காளர்களுக்கு பணம், பொருட்கள் கொண்டு செல்வதை கட்டுப்படுத்தும் வகையில் பறக்கும் படையினர் தீவிர வாகனச் சோதனையில் ஈடுபட்டு வருகின்றனர்.
அதேபோல் திருவள்ளூர் அடுத்த ஈக்காடு மூலக்கரையில் பறக்கும் படையினர் தீவிர வாகன சோதனையில் ஈடுபட்டனர்.
அப்போது, அந்த வழியாக வந்த சரக்கு வாகனத்தை நிறுத்தி பரிசோதனை செய்தனர். அந்த வாகனத்தில் அதிமுகவில் தேர்தல் வாக்குறுதிகளா ன துண்டு பிரசுரங்கள், ரூ.2000, ரூ.10000 மதிப்பிலான தலா 10 எண்ணிக்கையில் 15 ஆயிரம் மாதிரி காசோலை புத்தகங்கள் அடங்கியபண்டல்கள் இருந்தது.
இதையடுத்து மேற்கொண்ட விசாரணையில் தாம்பரம் பகுதியில் இருந்து திருத்தணி தொகுதிக்கு கொண்டு செல்வதாகவும் தகவல் தெரிவித்தனர். இதனையடுத்து உதவி தேர்தல் நடத்தும் அலுவலர் பாலாஜி மற்றும் பறக்கும் படையினர் பறிமுதல் செய்தனர்.
உரிய ஆவணங்கள் இன்றி கொண்டு வந்ததால் திருவள்ளூர் கோட்டாட்சியர் அலுவலகத்தில் தேர்தல் நடத்தும் அலுவலர் ரவிச்சந்திரனிடம் ஒப்படைத்தனர். தொடர்ந்து விசாரணை நடைபெற்று வருகிறது.