சென்னை, ஏப்.21
மாநில உளவுத்துறை ஐ.ஜி.செந்தில் வேலன் அவர்களை தேர்தல் ஆணையம் திடீரென மாற்றி புதிதாக ஒருவரை நியமித்துள்ளது கண்டனத்திற்குரியது எனவும், இந்தச் செயல் தேர்தல் ஆணையத்திடம் உள்நோக்கம் உள்ளது எனவும் நமது திராவிட இயக்க நிறுவனத் தலைவர் திருமதி. ஓவியம் விடுத்துள்ள அறிக்கையில் கண்டனம் தெரிவித்துள்ளார்.
அவரது அறிக்கை வருமாறு:–
மாநில உளவுத்துறை ஐ.ஜி.யாக இருந்த செந்தில்வேலன் ஐ.பி.எஸ். அவர்களை தேர்தல் ஆணையம் திடீரென ஏன் மாற்ற வேண்டும்? உளவுத்துறை என்பது தமிழகத்தின் முதுகெலும்பை போன்றது ஒரு மனிதனின் முதுகெலும்பு நன்றாக இருந்தால் தான் அவன் செயல்பட முடியும்.
அப்படி இருக்கும் சூழலில் கடந்த இரண்டு ஆண்டுகளாக உளவுத்துறையை கண்ணும் கருத்துமாக கவனித்து வந்த ஐ.ஜி. செந்தில்வேலன் அவர்களை மாற்றுவதற்கான காரணம் என்ன? நாள் ஒன்றுக்கு ஒரு அதிகாரியை மாற்றி வரும் தேர்தல் ஆணையம் இந்தத் தேர்தலை நியாயமாக நடத்த வேண்டும் என்பதே நமது திராவிட இயக்கத்தினுடைய கோரிக்கை. எந்த அரசாங்கம் வந்தாலும் ஐ.பி.எஸ். அதிகாரிகள் அவர்களதுபணியை பார்ப்பது தான் வழக்கம்.
அதுபோல் அவருக்கு தரப்பட்ட உளவுத்துறை பணியை பார்த்து வந்தவரை தேர்தலுக்கு இரண்டு தினங்கள் இருக்கும்பொழுது திடீரென மாற்றியது உள்நோக்கம் கொண்டது. இச்செயலை மக்கள் கூர்ந்து கவனித்துக் கொண்டு வருகிறார்கள். இதற்குத் தக்க பதில் அடி 23–ஆம் தேதி தனது வாக்கில் மக்கள் காண்பிப்பார்கள்.
இவ்வாறு திருமதி ஓவியம் விடுத்துள்ள அறிக்கையில் கண்டனம் தெரிவித்துள்ளார்.