#Title

வேலூர் மாவட்டம் – காட்பாடி சட்டமன்றத் தொகுதியில் தீவிர வாக்குச் சேகரிப்பு! சேர்க்காடு அரசு மருத்துவமனை 100 படுக்கைகளுடன் மேம்படுத்தப்படும்!

வேலூர், ஏப்.21- –

வேலூர் மாவட்டம், காட்பாடி சட்டமன்றத் தொகுதி சேர்க்காடு அரசு மருத்துவமனை 100 படுக்கைகளுடன் மேம்படுத்தப்படும் என அமைச்சர்,- கழக பொதுச் செயலாளர் துரை முருகன் வாக்குறுதி அளித்தார்.

வேலூர் மாவட்டம் காட்பாடி சட்டமன்றத் தொகுதியில் மதச்சார்பற்ற முற்போக்குக் கூட்டணி தி.மு.க. சார்பில் வேட்பாளராக நீர்வளத்துறை அமைச்சர் துரைமுருகன் 11-வது முறையாக போட்டியிடுகிறார். அவர் தொகுதி மக்களிடையே தீவிர பிரசாரத்தில் ஈடுபட்டு வாக்குகளைச் சேகரித்து வருகிறார்.

அதன்படி அவர் வரதராஜபுரம், கம்மவார்புதூர், உள்ளிப்புதூர், ஒட்டந்தாங்கல் மற்றும் அதனை சுற்றியுள்ள கிராமங்களுக்குச் சென்று கிராம மக்களை நேரடியாக சந்தித்து குறைகளைக் கேட்டறிந்தார்.

மேலும் அவர் மக்களுடன் அமர்ந்து தொகுதி வளர்ச்சிக்கு மேற்கொள்ள வேண்டிய பணிகள் குறித்தும் கலந்துரையாடினார். அரசின் கலைஞர் மகளிர் உரிமைத் தொகை திட்டம், ரூ.8 ஆயிரம் கூப்பன் வழங்கும் திட்டம் உள்ளிட்ட பல்வேறு திட்டங்கள், வாக்குறுதிகளை மக்களிடையே எடுத்துரைத்தார்.

காட்பாடி சட்டமன்றத் தொகுதியில் சேர்க்காட்டில் உள்ள அரசு மருத்துவமனை 100 படுக்கைகள் கொண்ட மருத்துவமனையாக மேம்படுத்தப்படும் என்றும், பெண்கள் பிரசவ வார்டுக்கு தனி கட்டிடம் கட்டப்படும் என்றும் பிரத்யேக டாக்டர்கள் நியமிக்கப்படுவார்கள் போன்ற பல்வேறு வாக்குறுதிகளை அளித்தார்.

அப்போது அமைச்சர் துரைமுருகன்அவர்கள் பேசியதாவது:- –

காட்பாடி சட்டமன்றத் தொகுதியில் உள்ள ஒவ்வொரு கிராமத்தையும் நகரத்துடன் இணைக்கும் வகையில் தார் சாலைகள் போடப்பட்டுள்ளது. தொகுதியின் வளர்ச்சிக்காக நான் எப்போதும் சிந்தித்துக் கொண்டிருக்கிறேன். காட்பாடி தொகுதியில் அனைத்து பகுதிகளும் வளர்ச்சி பெற பல்வேறு திட்டங்களை செயல்படுத்தியுள்ளேன்.

இந்தத் தொகுதியில் அரசின் அனைத்து திட்டங்களும் செயல்படுத்தப்பட்டுள்ளன. கிராமப்புற மாணவர்களுக்கு கல்லூரி கொண்டு வந்துள்ளேன். வீட்டுமனை பட்டாக்களும் வழங்கப்பட்டுள்ளது. தி.மு.க. அரசின் நல்லாட்சி தொடர உதயசூரியன் சின்னத்தில் வாக்களித்து, என்னை மீண்டும் வெற்றி பெறச் செய்ய வேண்டும்.

இவ்வாறு அவர் பேசினார்.

அமைச்சர் துரைமுருகன் அவர்களுக்கு ஆதரவாக அவரது மருமகள் சங்கீதா கதிர்ஆனந்த் பல்வேறு பகுதிகளுக்கு சென்று பிரசாரம் செய்து வருகிறார். மக்களிடம், விவசாயிகளிடம், பெண்களிடம் நேரடியாக பேசி அரசின் திட்டங்களை எடுத்துரைத்து ஆதரவு திரட்டி வருகிறார்.

இந்தநிலையில் அவர் கல்புதூர், வண்டறந்தாங்கல் பகுதியிலும் தீவிர வாக்குச் சேகரிப்பில் ஈடுபட்டார்.

அப்போது இளைஞர்கள், பெண்களிடம் அரசு கொண்டு வந்துள்ள கலைஞர் மகளிர் உரிமைத்தொகை திட்டம், தமிழ்ப்புதல்வன், புதுமைப்பெண், நான் முதல்வன் திட்டங்கள் குறித்தும்,

காட்பாடி தொகுதியில் மேற்கொள்ளப்பட்ட திட்டங்கள் குறித்து துண்டுப் பிரசுரங்களை வழங்கி உதயசூரியன் சின்னத்துக்கு வாக்குச் சேகரித்தார்.

நிகழ்ச்சியில் கழக நிர்வாகிகள் பலர் கலந்து கொண்டனர்.