தருமபுரி, ஏப். 23 –
தருமபுரி மாவட்டம் பாலக்கோடு சட்டமன்ற தொகுதியில் மதச்சார்பற்ற முற்போக்குக் கூட்டணி சார்பில் போட்டியிடும் திமுக வேட்பாளர் முன்னாள் எம்.பி.டாக்டர்.டி.என்.வி.எஸ்.செந்தில்குமார் பாலக்கோடு நகர் பகுதியில் இறுதி நாள் பிரச்சா ரத்தை மேற்கொண்ட பின் செய்தியாளர்களை சந்தித்தார் அப்போது அவர் தெரிவித்ததாவது:-
பாலக்கோடு தொகுதியில் 25 ஆண்டு காலமாக சட்டமன்ற உறுப்பினராக இருந்த கே.பி.அன்பழகன், விவசாயம், வளர்ச்சி சார்ந்த திட்டங்கள், நீர்ப்பாசன திட்டங்கள் என எதையும் இதுவரை செய்யவில்லை என்பது இப்பகுதி மக்களின் குற்றச்சாட்டு, சாலை உள்ளிட்ட அடிப்படை வசதிகள் கூட பல இடங்களில் செய்து தரவில்லை. பழங்குடியினர்,இஸ்லாமியர், ஆதிதிராவிடர் வாழக்கூடிய பகுதிகளில் கூட அடிப்படை வசதிகள் எதுவும் செய்து தரவில்லை. இதுவரை 6 கிராமங்களில் அடிப்படை வசதியான கழிப்பறை கூட இல்லாத அவலநிலை இருக்கிறது.25 ஆண்டு காலமாக அமைச்சராக இருந்த கே.பி.அன்பழகன் இதைக்கூட செய்யவில்லை,சுதந்திரம் அடைந்து இத்தனை ஆண்டுகளில் இன்னும் ஒரு சில கிராமத்தில் கழிப்பறை கூட இல்லாத நிலை மிகவும் மோசமானது,
அண்டை மாவட்டமான கிருஷ்ணகிரி ஓசூரில் ஆயிரத்திற்கும் மேற்பட்ட தொழிற்சாலைகள் இருக்கும் போது கேபி அன்பழகன் அமைச்சராக இருந்த பொழுது அவர் நினைத்திருந்தால் படித்த இளைஞர்கள் வேலை வாய்ப்பு கிடைத்திருக்கும். குறைந்தது இரண்டு தொழிற்சாலைகளை கொண்டு வந்திருந்தால், கூட படித்த இளைஞர்களுக்கு வேலை வாய்ப்பு கிடைத்திருக்கும்.
விவசாயத்தை நம்பி இருக்கின்ற பாலக்கோடு பகுதிகளுக்கு நீர் பாசன திட்டங்கள் இல்லை. இங்கு இருக்கின்ற சர்க்கரை ஆலை நாட்டின் சிறந்த சர்க்கரை ஆலை ஆக விருது பெற்றது. ஆனால் இன்று கரும்பு உற்பத்தி இல்லை என்பதால், மூடும் நிலைமையில் இருந்து வருகிறது.
கே.பி.அன்பழகன் என்றால் மக்களுக்கு ஒரு பயமான நிலை தான் இருந்து வருகிறது. இவரை கேள்வி கேட்ட ஒருவரை அவரது ஆதரவாளர்கள் தாக்கியுள்ளனர்.தற்போது அவரை எதிர்த்து திமுக சார்பில் நாம் போட்டியிடும் போது மக்கள் ஓரணியில் திரண்டு நம் பின்னாடி இருக்கிறார்கள். பாலக்கோட்டில் மிகப்பெரிய வெற்றியை தர தயாராகி இருக்கிறார்கள்.தேர்தல் வரும் நேரத்தில் மட்டும் கே.பி.அன்பழகன் எல்லோருடைய வீடுகளுக்கும் சேலை கொடுக்கிறார்கள். ஆனால் இப்பகுதி மக்கள் எங்களுக்கு வேலை தான் முக்கியம் என சொல்கிறார்கள். வேலை இருந்தால் சேலையை நாங்களே வாங்கிக் கொள்வோம் என்று தெரிவிக்கின்றனர்.
பாலக்கோடு பகுதி மக்களுக்கு நான் அளிக்கின்ற வாக்குறுதி எனக்கு நீங்கள் வாக்களித்து வெற்றி பெற செய்தால் கழகதலைவர் மாண்புமிகு முதலமைச்சர் அவர்களின் சீரிய திட்டங்களால் இந்த தொகுதி நாட்டில் சிறந்த தொகுதியாக மாறி இருக்கும் என்று உறுதி அளித்திருக்கிறேன்.இந்த பகுதியில் இருந்து தக்காளி, மாம்பழம், தென்னை உள்ளிட்ட விவசாய பொருட்கள் மதிப்பு கூட்டு பொருள்கள் தயாரித்து அவர்களுக்கு நல்ல லாபம் கிடைக்கின்ற வகையில் மதிப்பு கூட்டு தொழிற்சாலையை கொண்டு வரப்படும், பன்னாட்டு நிறுவ னங்களுடன் சேர்ந்து தக்காளி கூழ் பேக்டரி கொண்டு வரப்படும்,காய்கறிகள் இந்த பகுதியில் அதிகமாக உற்பத்தி ஆகிறது. ஆனால் ராயக்கோட்டை சென்று அங்கிருந்து ஏற்றுமதி செய்யப்படு கிறது. அதற்கு குளிர்சாதன வசதிகளுடன் கூடிய பெரிய சந்தை உருவாக்கப்படும் இவை அனைத்தும் மே நான்காம் தேதிக்கு பிறகு நடைபெறும்.
இந்த எண்ணேகோல் புதூர் திட்டத்தை நிறைவேற்ற 8 மாதங்கள் போதும்.திராவிட மாடல் ஆட்சியில் இந்த மாவட்டமே மாறப் போகிறது. பாலக்கோடு மிக செழிப்பான விவசாயம் சார்ந்த பகுதியாக இருக்கும். தமிழ்நாட்டிலேயே இது மாதிரியான வளர்ச்சி எங்கும் இல்லை என்று சொல்லும் நிலையில் சிறப்பான திட்டங்களை இந்த தொகுதியில் நமக்கு கழகதலைவர் மாண்புமிகு முதலமைச்சர் செயல்படுத்துவார் என்று நான் உறுதி அளிக்கிறேன்.நாடாளுமன்ற உறுப்பினராக இருந்த பொழுது சாலையில்லாத மலை கிராமங்களுக்கு சாலை உள்ளிட்ட 12000 கோடிக்கு நலத்திட்ட உதவிகளை தருமபுரி மாவட்டத்திற்கு கொண்டு வந்திருக்கின்றேன். இதைப் பற்றி எங்கும் நான் பேசவில்லை. வளர்ச்சிக்கான திட்டத்தை மட்டும் தான் பேசி இருக்கேன். அதேபோல் கே.பி.அன்பழகனை தனிப்பட்ட முறையில் எங்கும் விமர்சனம் செய்யவில்லை,வளர்ச்சி வேண்டும் அடுத்த தலைமுறைக்கு வளர்ச்சிகரமான பாலக்கோட்டை ஒப்படைக்க வேண்டிய கட்டாயத்தில் நாம் இருக்கிறோம். எல்லா திட்டங்களையும் செய்து தருமபுரி மாவட்டம் விவசாய மற்றும் தண்ணீர் பற்றாக்குறை இல்லாத மாவட்டமாக உருவாக போகிறது என்று அவர் தெரிவித்தார்.