இஸ்லாமாபாத், ஏப்.27–
அமெரிக்காவுடன் போர் நிறுத்தம் குறித்து பாகிஸ்தான் வெளியுறவு அமைச்சர் இஷாக் தாருடன், ஈரானிய வெளியுறவு அமைச்சர் அப்பாஸ் அராக்ஸி நேற்று தொலைபேசியில் பேசினார். அமெரிக்கா-–ஈரான் இடையே கடந்த 8ம் தேதி 2வார கால தற்காலிக போர் நிறுத்தம் அறிவிக்கப்பட்டது. இதை தொடர்ந்து அமெரிக்கா, ஈரான் இடையே 11ம் தேதி போர் நிறுத்தம் தொடர்பாக இஸ்லாமாபாத்தில் பேச்சுவார்த்தை நடந்தது. இதில் எந்த ஒப்பந்தமும் ஏற்படவில்லை. இதனால் முதல் சுற்று பேச்சுவார்த்தை தோல்வியடைந்தது.
போர் நிறுத்தம் 23ம் தேதி முடிவடைய இருந்தது. அதற்கு ஒரு நாள் முன்னதாக, ஈரானுடன் காலவரையற்ற போர் நிறுத்தத்தை அமெரிக்க அதிபர் அறிவித்தார். ஆனால் போர் நிறுத்தத்தை அறிவித்தாலும் ஈரான் துறைமுகங்கள் மீதான முற்றுகை தொடரும் என டிரம்ப் கூறினார். இதற்கு பதிலடியாக ஹார்முஸ் ஜலசந்தியில் தனது உரிமையை நிலை நாட்ட குறிப்பிட்ட சில நாடுகளின் கப்பல்களுக்கு ஈரான் அனுமதி மறுத்துள்ளது. இது பதற்றத்தை ஏற்படுத்தியதோடு, வளைகுடாவில் இருந்து கொண்டு வரப்படும் எண்ணெய், எரிவாயு விநியோகத்தை முடக்கி உள்ளது.
ஹார்முஸ் ஜலசந்தியில் அமெரிக்க கடற்படையை கொண்டு டிரம்ப் தடையை அமல்படுத்தினார். இந்த தடையை நீக்கினால் மட்டுமே 2வது கட்ட பேச்சுவார்த்தைக்கு வர முடியும் என்று ஈரான் தெரிவித்துள்ளது. இதனால் பேச்சுவார்த்தை தற்காலிகமாக தடைபட்டிருந்தது. இந்த நிலையில், ஈரான் வெளியுறவு அமைச்சர் அப்பாஸ் அராக்ஸி பாகிஸ்தான் துணை பிரதமரும் வெளியுறவு அமைச்சருமான இஷாக் தாருடன் தொலைபேசியில் பேசினார்.
ஈரான் அரசு செய்தி நிறுவனம் அராக்ஸி மற்றும் பாகிஸ்தான் ராணுவத் தலைவர் பீல்ட் மார்ஷல் ஆசிம் முனீர் இடையேயும் உரையாடல் நடைபெற்றதாக தெரிவித்தது. பாகிஸ்தான் வெளியுறவு அமைச்சகம் வெளியிட்டுள்ள அறிக்கையில், பிராந்திய நிகழ்வுகள், போர் நிறுத்தம் மற்றும் அமெரிக்க-–ஈரான் உறவுகளின் பின்னணியில் இஸ்லாமாபாத் மேற்கொண்டு வரும் ராஜதந்திர முயற்சிகள் குறித்து இரு தரப்பினரும் கருத்துக்களைப் பரிமாறிக் கொண்டனர்.
பிராந்திய அமைதி மற்றும் ஸ்திரத்தன்மையை விரைவில் முன்னெடுத்துச் செல்வதற்கும், தீர்க்கப்
படாத பிரச்சினைகளுக்குத் தீர்வு காண்பதற்கும் தொடர்ச்சியான உரையாடல் மற்றும் ஈடுபாட்டின் முக்கியத்துவத்தை தார் வலியுறுத்தினார் என்று தெரிவித்தது. இதனிடையே ஈரான் வெளியுறவு அமைச்சர் அராக்ஸி இந்த வார இறுதியில் பாகிஸ்தானுக்கு வர உள்ளார் என்றும் அவருடன் சிறிய அளவிலான அரசு அதிகாரிகள் அடங்கிய குழுவினர் வர உள்ளனர் என்று அவர்கள் தெரிவித்தனர். இதனால் 2வது சுற்று பேச்சுவார்த்தை விரைவில் தொடங்கும் என எதிர்பார்க்கப்படுகிறது.
இந்திய மாலுமிகள்
கதி என்ன?
கடந்த 22ம் தேதி ஹார்முஸ் ஜலசந்தியை கடக்க முயன்ற 3 கப்பல்கள் மீது ஈரான் தாக்குதல் நடத்தி அந்த கப்பல்களை தங்கள் கட்டுப்பாட்டில் எடுத்து கொண்டது. சிறை பிடிக்கப்பட்ட பிரான்செஸ்கா கப்பலில் இந்தியர்கள் யாரும் இல்லை. மற்ற இரண்டு கப்பல்களான எபாமினோன்டாஸ், யூபோரியா கப்பல்களில் மொத்தம் 22 இந்திய மாலுமிகள் உள்ளனர். 3 கப்பல்கள் ஹார்முஸின் கிழக்கு பகுதிக்கு கொண்டு செல்லப்பட்டுள்ளது என்றும் இந்தியர்கள் அனைவரும் பத்திரமாக உள்ளனர் என்று ஒன்றிய கப்பல் மற்றும் நீர்வழிதுறையின் இயக்குனர் மந்தீப் சிங் ரந்த்வா தெரிவித்தார்.