தஞ்சாவூர், ஏப்.26.
வரலாற்று சிறப்புமிக்க கும்பகோணம் வாணி விலாச சபாவின் சார்பில் இலக்கியத்திற்கான ஞான பீட விருது பெற்ற கவிப்பேரரசு வைரமுத்து அவர்களுக்கு பாராட்டு விழா நடத்த உள்ளதாக சபாவின் செயலாளரும், மாநிலங்களவை உறுப்பினருமான சு.கல்யாணசுந்தரம் அறிக்கை வெளியிட்டுள்ளார்.
அவர் வெளியிட்டுள்ள அறிக்கை வருமாறு :–
கும்பகோணம் மாநகரில் 1914–ஆம் ஆண்டு தொடங்கப்பட்ட வரலாற்று சிறப்புமிக்க வாணி விலாச சபா 112 ஆண்டுகளை கடந்து இயல், இசை, நாடக கலைகளை வளர்த்து வருகிறது. இச்சபாவில் தந்தை பெரியார், பேரறிஞர் அண்ணா, முத்தமிழறிஞர் கலைஞர், கழகத் தலைவர் தமிழ்நாடு முதல் அமைச்சர் மு.க. ஸ்டாலின் அவர்கள் உள்ளிட்ட பல தலைவர்கள் உரையாற்றி இருக்கின்றனர்.
வாணி விலாச சபா, தமிழ் கலைஞர்கள் சாதனை புரியும் போதெல்லாம், அவர்களை அழைத்து மரியாதை செலுத்தி பாராட்டு விழா நடத்தி வருகிறது. கடந்த ஆண்டு கவிப்பேரரசு வைரமுத்து 2025–ம் ஆண்டுக்கான இந்திய இலக்கியத்தின் உயரிய ஞானபீட விருது பெற்றார். நான்கு சகாப்த கால தமிழ் இலக்கியம், கவிதை மற்றும் திரைப்படப் பாடல் பங்களிப்பிற்காக இந்த விருது பெற்றுள்ளார். அகிலன் மற்றும் ஜெயகாந்தனுக்குப் பிறகு, 23 ஆண்டுகளுக்குப் பின் தமிழில் இந்த விருதைப் பெறும் மூன்றாவது நபர் கவிப்பேரரசு வைரமுத்து ஆவார்.
இலக்கியத்திற்கான உயரிய ஞானபீட விருதை பெற்ற பத்மபூசண் கவிப்பேரரசு வைரமுத்து அவர்களை பாரட்டும் வகையில் வரலாற்று புகழ் மிக்க எங்கள் வாணி விலாச சபா சார்பில் கவிஞர் வைரமுத்தவிற்கு பாராட்டு விழா நடத்த ஏற்பாடு செயதுள்ளோம். இவ்விழாவானது 30.04.2026 வியாழக்கிழமை மாலை 06.00 மணியளவில் வாணிவிலாச சபா கலையரங்கில் மிகச்சிறப்பாக நடைபெற உள்ளது. இதில் நற்றமிழ் நாயகர், தமிழ்நாடு அரசின் முன்னாள் மருத்துவம் மற்றும் ஊரக நலப்பணிகள் இயக்கத்தின்
இயக்குனர் மரு.ஜெய.ராஜமூர்த்தி பங்கேற்று கவிப்பேரரசு வைரமுத்து அவர்களைப் பாராட்டி சிறப்புரையாற்றுகிறார்.
விழாவில் பத்மபூஷன் கவிப்பேரரசு வைரமுத்து அவர்கள் பங்கேற்று ஏற்புரையாற்றுகிறார்.
எனவே இவ்விழாவில் சபா நிர்வாகிகள், சபா உறுப்பினர்கள், வணிகர் சங்கங்கள், இளைஞர்கள், பொதுமக்கள் உள்ளிட்ட அனைவரும் தவறாது கலந்துக் கொண்டு சிறப்பிக்க வாணிவிலாச சபாவின் தலைவர் மற்றும் நிர்வாக குழுவினர் சார்பில் அன்புடன் அழைக்கிறேன்.
இவ்வாறு வாணிவிலாச சபாவின் செயலாளரும், மாநிலங்களவை உறுப்பினருமான சு.கல்யாணசுந்தரம் அறிக்கை வெளியிட்டுள்ளார்.