நீந்தும் கப்பல் மூழ்கி விடாமல்

நிறுத்தும் நங்கூரம்! - அந்த

நெடிய வெற்பையும் இடித்திடும் தோள்கள்!

நிமிர்ந்த கம்பீரம்!

பூந்தமி ழுக்குத் தீங்கொன்று வந்தால்

பொங்கிடும் வெங்கோபம்! - மொழிப்

போருக்குத் தீட்டிய வரிகள் அனைத்தும்

பூபாளச் சங்கீதம்!

தமிழுக்கும் அமுதென்று பேர்என்று கூவினான்!

தடந்தோள் உரமூட்டி! - அவன்

தாலாட்டுப் பாட்டிலும் எழுப்பிவிட் டான்!நமைத்

தன்மான உணர்வேற்றி!

சிமிழுக்குள் கிடந்த தமிழுக்குத் தந்தான்

சிறகுகள்! ஒளிகூட்டி! - எட்டுத்

திசைகளும் தமிழை வணங்கவைத் தான்!மலைச்

சிகரத்தில் கொடிநாட்டி!

கொஞ்சும் அழகின் சிரிப்பால் இன்பம்

கொடுத்தான் துயர்மாற்றி! - சுடர்

கொளுத்தி மகிழ்ந்தான் இருண்ட வீட்டிலே

குடும்ப விளக்கேற்றி!

தஞ்சம் வந்தமொழி தமிழை ஆளவோ?

தடுத்தான் இடர்வீழ்த்தி! - இளந்

தமிழச்சி கையில் கத்தி கொடுத்தான்

தாய்த்த்தமிழ் நிலம்வாழ்த்தி!

கழுத்துப் பிடரி சிலிர்க்க எழுந்தான்

கண்களில் அனல்தேக்கி! - இங்குக்

கால்வைத் திடுமோ இந்தி?என்று ஆர்த்தான்

களத்தில் பகைநோக்கி!

எழுத்து வடிவில் நெருப்பை உமிழ்ந்தான்

எரிமலை உண்டாக்கி! - அவன்

எடுத்துப் பிடித்தது எழுதுகோல் அல்ல!

எந்திரத் துப்பாக்கி!

மைந்தர்களே, தமிழ் அன்னையைக் காக்க

வருகெனக் குரல்கொடுத்தான்! - இங்கு

மானுடச் சமுத்திரம் நான்என்று கூவும்

மகத்துவம் அவன்படைத்தான்!

பைந்தமிழ் எங்கள் உயிர்என்று கூறிப்

பாட்டில் முரசொலித்தான்! - தமிழ்ப்

படைமறம் காட்டிப் பகைவரை வெல்லப்

பாண்டியன் பரிசளித்தான்!

வீரத் தமிழ்க்கவி இன்றிருந் தால், புது

வீறுடன் நின்றிருப்பான்! - தமிழ்

வெற்றி மாலையை முதல்வர்க்குச் சூட்ட

விரும்பிச் சென்றிருப்பான்!

பேரன் “தளபதி” ஆட்சியின் மாட்சிப்

பெருமையைக் கண்டிருப்பான்! - உயர்

பீடு மிகும்தமிழ் நாடும் இதுவெனப்

பெருமிதம் கொண்டிருப்பான்!

அதிர்வலை தந்த எழுச்சிக் கவிஞன்!

அவன்தன் தாள்வாழ்க! - அவன்

அள்ளிப் பொழிந்த அருவி நிகர்த்த

அமுதத் தமிழ்வாழ்க!

புதுவைப் புலவன் காண விழைந்த

புதுமைப் புவிவாழ்க! - புகழ்

போற்றிக் கூடுவோம்! ஏற்றிப் பாடுவோம்!

புரட்சிக் கவி வாழ்க!