உழைப்பாளி இல்லையென்றால்

இந்த பூமி

பிறந்த மேனியாகவே

இருந்திருக்கும்;

நாகரிகத்துக்கு

உருவம் கிடைத்திருக்காது

மனிதன்

இரண்டு கால் மிருகமாய்

இருந்திருப்பான்

உலகம் காணுகிற

ஒவ்வொரு சுகமும்

தொழிலாளியின்

பத்துவிரல்களால்

படைக்கப்பட்டவை

உலகத்தின்

வற்றாத ஜீவ நதி

வேர்வை மட்டும்தான்

அவன் முதுகு வளைய வளைய

உலகு நிமிர்ந்தது

சம்பள மிருகமாய் இருந்தவனை

மனிதன் என்று

மதிப்புக்கூட்டிய தினம்

மே தினம்

சோறு போட்டவனுக்குச் சோறு

ஆடை நெய்தவனுக்கு ஆடை

வீடு கட்டியவனுக்கு வீடு

என்று

சிந்தித்துப் பார்த்த

சிறந்த தினம் மே தினம்

உலகத்தை

எந்த மதத்தாலும்

ஒன்றுபடுத்த முடியவில்லை;

உழைப்பு என்ற மதமே

ஒன்றுபடுத்தும்

வாழ்க மே தினம்

வெல்க தொழிலாளர்