சென்னை, மே 4 –
விவசாயிகள் – தொழிலாளர்கள் கட்சித் தலைவர் பொன்குமார் விடுத்துள்ள அறிக்கை வருமாறு:
வணிக கேஸ் சிலிண்டர்களின் விலை ரூபாய் 990.50 உயர்த்தப்பட்டுள்ளது விலைவாசி உயர்விற்கு வழிகோலும். குறிப்பாக ஓட்டல் தொழில் நசிவடையும், உணவு பண்டங்களின் விலைக் கடுமையாக ஏறும். இதனால் தொழிலாளர்கள் மிகப்பெரிய இன்னல்களுக்கு ஆளாவார்கள். இந்த செயல் வன்மையானக் கண்டனத்திற்குரியதாகும்.
ஐந்து மாநில சட்டப்பேரவை தேர்தல் முடியும் வரை கள்ள மனம் காத்த மோடி அரசு தேர்தல் முடிந்தவுடன் ஒரே அடியாக சிலிண்டர் விலையை 990 ரூபாய் அளவிற்கு உயர்த்திருக்கிறது. ஏற்கனவே 2246 ரூபாய் விற்ற சிலிண்டர் விலை தற்போது 3237 ரூபாயாக விலை உயரும். விலை உயர்வு ஒரு பக்கம். இன்னொரு பக்கம் சிலிண்டர் தட்டுப்பாடு. இதனால் வணிகர்கள் கள்ள சந்தையில் சிலிண்டர் வாங்க வேண்டிய நிலைக்கு தள்ளப்பட்டுள்ளனர். ஏற்கனவே கள்ள சந்தையில் ரூபாய் 6 ஆயிரம் வரை விலைக் கொடுத்து வாங்க வேண்டிய நிலையில், தற்போது இது இரண்டு மடங்காக உயரும். இதனால் அனைத்து விலைவாசிகளும் உயர்வதற்கு வாய்ப்பாகிவிடும். குறிப்பாக தேநீர் கடை, ஓட்டல் போன்ற உணவு நிறுவனங்களின் வழங்கப் படும் உணவுப் பொருட்களின் விலைஅபரீதமாக உயரும் அபாயம் உள்ளது.
கட்டுமானத் தொழிலாளர்கள் போன்ற கோடிக்கணக்கான அமைப்புசாராத் தொழிலாளர்கள் தேநீரையும், மதிய உணவிற்கு ஓட்டல்களையும் நம்பி உள்ளவர்கள் பெரும் பாதிப்பிற்குள்ளாவார்கள். உணவு நிறுவனங்கள் மூடக்கூடிய பேராபத்து ஏற்படும். தொழிலாளர்கள் வேலை இழக்கக் கூடிய அபாயம் நேரும். இவற்றையெல்லாம் கொஞ்சம் கூட சிந்திக்காத மோடி அரசு மேற்காசிய போரை காரணம் காட்டி விலையை உயர்த்திருப்பது மிகுந்த கண்டனத்திற்குரியதாகும். இந்த நிலையில் விரைவில் பெட்ரோல், டீசல் விலையும் உயர்த்தப்படும் பேராபத்து நிலவி வருகிறது. இதனால்ஒட்டுமொத்த பொருளாதாரம் பாதிக்கக்கூடிய நிலை ஏற்பட்டுள்ளது.
எனவே உணவு நிறுவனங்கள், அதில் பணியாற்றும் தொழிலாளர்கள், தேநீர் மற்றும்ஓட்டல் உணவுகளை மட்டுமே நம்பி உள்ள கோடிக்கணக்கானத் தொழிலாளர் போன்றவர்களைகருத்தில் கொண்டு ஏற்றப்பட்ட விலையை உடனடியாக திரும்பப் பெற வேண்டும் என ஒன்றிய அரசை விவசாயிகள் தொழிலாளர்கள் கட்சி கேட்டுக் கொள்கிறது.
இவ்வாறு பொன்குமார் தெரிவித்துள்ளார்.