கள்ளக்குறிச்சி,மே 4–
கள்ளக்குறிச்சியில் திராவிடர் கழகம் சார்பில் நடைபெற்ற பெரியாரியல் பயிற்சிப் பட்டறையில் கலந்து கொண்டு பேசிய கி.வீரமணி, செய்தியாளர்களுக்கு பேட்டியளித்தார்.
அப்போது அவர் பேசுகையில் நடந்து முடிந்த தேர்தல் பிரச்சாரத்தில் ஈடுபட்டவனில் நானும் ஒருவன். மக்களைப் பொருத்தவரை எந்தத் தேர்தலிலும் இல்லாத அளவிற்கு, இந்தத் தேர்தலில் ஒரு திருப்பத்தை ஏற்படுத்தி இருப்பார்கள் என்பதைநாங்கள் கண்டுள்ளோம்.
பிரச்சாரத்தில் தாய்மார்கள் அதிகளவில் வந்து, நாங்கள் பேசியதை ஆர்வத்தோடு கேட்டது மட்டு மல்லாமல், அதை உள்வாங்கிய முறையின் அடிப்படையில், அதில் அவர்களுக்கு எவ்வளவு விழிப்புணர்வு இருக்கிறது, திராவிட மாடல் ஆட்சியில் எல்லையற்ற மகிழ்ச்சியை அவர்கள் எப்படி பெற்றிருக்கிறார்கள், நன்றி உணர்ச்சியை அவர்கள் எப்படி வெளி காட்டக் கூடியவர்களாக இருக்கிறார்கள் என்பதையெல்லாம் நாங்கள் நேரில் பார்த்து, தெரிந்துகொள்ள ஒரு நல்ல வாய்ப்பு கிடைத்தது. அப்படிப்பட்ட தாய்மார்களில் பெரும் பகுதி திராவிடல் மாடல் ஆட்சிக்கு வாக்களித்திருக்கிறார்கள் என்ற நிலை ஏற்பட்டிருக்கிறது.
எந்தவிதமான சந்தேகத்திற்கும் இடமளிக்காமல், சந்தேகத்திற்கு அப்பாற்பட்டு, திராவிட மாடல் ஆட்சியில் பயனடைந்த மக்கள், மீண்டும் திராவிட மாடல் ஆட்சி வரவேண்டும் என்று வாக்களித்திருக்கிறார்கள் திராவிட மாடல் ஆட்சி இன்றைக்கு உலகம் போற்றக்கூடிய அளவிற்கு வந்திருக்கிறது எனத் தெரிவித்தார்.
1971 ஆம் ஆண்டு நடைபெற்ற தேர்தலில் 184 இடங்களை பெற்று திமுக வரலாறு படைத்தது, இதோடு முடிந்தது இனி தி.மு.க. ஆட்சிக்கு வராது என்று ஆருடம் கணித்தவர்கள் எல்லாம் அடையாளம் தெரியாமல் ஓடிவிட்டார்கள், துண்டைக் காணோம், துணியை காணோம் என்று 1971 ஆம் ஆண்டு நடைபெற்ற அதே நிலை மே 4ஆம் தேதிக்கு பிறகு வரும், கோட்டைக்கு அனுப்புபவர்களை,ஆட்சியில் அமர வைப்பவர்களை ஆட்சிக்கு அனுப்பி வைப்பார்கள். காட்சிக்கு அனுப்ப வேண்டியவர்களை திரும்ப, காட்சிக்கு திரும்ப செய்வார்கள். இந்த நிலைதான் நிலவும், மக்களுக்கு நல்லது செய்வதைப்போல பா.ஜ.க.வினர் நடிப்பார்கள். ஆனால், நல்லதை செய்ய மாட்டார்கள். அவர்கள் விஷம் கலந்த உருண்டையில் தேனை கலந்து வைத்திருப்பார்கள். அதை அம்பலப்படுத்துவதற்கு தமிழ்நாடு தயாராக இருக்கிறது.
இந்தியாவில் உள்ள மற்ற மாநிலங்களில் உள்ள மக்கள் பாஜகவை நம்பி ஏமாந்தாலும், தமிழக மக்கள் ஒருபோதும் ஏமாற மாட்டார் கள்.
இதற்குக் காரணம், தமிழ்நாடு பெரியார் நாடு, இங்கு அடிமைகளுக்கு இடமில்லை. சுதந்திரச் சிந்தனையாளர்களுக்கும், போராட்டம் செய்யக்கூடிய அமைதி பூங்காவில் மதவெறி, ஜாதி வெறியை தூண்டி, கலவரம் உண்டாக்கி, தங்கள் ஆதிக்கத்தை மறைமுகமாக புகுத்தலாம் என்ற பா.ஜ.க.வின் திட்டம் இங்கு, ஒருபோதும் நடக்காது. கன்னி வெடிகளாக இருந்தாலும், அந்த கன்னி வெடிகளை தூக்கி வெளியே போடக்
கூடிய ஆற்றல், திராவிட இயக்கத்திற்கு உண்டு. அதனடிப்படையில், ஒரு நல்ல செய்தியை இன்னும் இரண்டு நாட்களில் நீங்கள் கேட்பீர்கள் என்று கூறினார். மேலும் கருத்துக்கணிப்பு அல்ல, அது கருத்து திணிப்பு என்றும், அ.தி.மு.க.தான் ஆட்சி அமைக்கும் எனவும் எடப்பாடி பழனிசாமி கூறி யிருக்கிறாரே என்று கேட்ட கேள்விக்கு பதிலளித்த கி.வீரமணி, கனவு காண எல்லாருக்கும் உரிமை உண்டு. ஆனால், எந்தக் கனவு நிறைவேறு கிறது என்பதுதான் மிக முக்கியம்.
ஆசைகள் குதிரைகளா னால் யார் வேண்டுமானாலும் சவாரி செய்யலாம் என தெரிவித்த நிலையில் முதலமைச்சர் மு.க.ஸ்டாலின் மீது தமிழ்நாட்டு மக்கள் மத்தியில் நன்மதிப்பு அதிகரித்துள்ளது என்றும், தி.மு.க. ஆட்சி தொடரவே மக்கள் விரும்புகின்றனர் என்றும், தமிழ்நாட்டில் ஒரு நிலையான அரசு வேண்டும், வளர்ச்சி வேண்டும், மக்கள் நல திட்டங்கள் வேண்டும், இந்த மூன்று எதிர்பார்ப்புகள் தான் தமிழக முழுவதும் எதிரொலிக்கிறது, இந்த மூன்றையும் கடந்த முறை அளித்த தி.மு.க. தலைமையிலான மதசார்பற்ற முற்போக்கு கூட்டணி அரசு அடுத்த 5 ஆண்டுகளுக்கும் தொடரும், ஆகவே தமிழ்நாட்டு மக்களின் பேராதரவுடன் மீண்டும் தி.மு.க. ஆட்சி அமைக்கும் என்று திராவிடர் கழகத் தலைவர் கி.வீரமணி அவர்கள் செய்தியாளர்களிடையே கூறினார்.