வெஸ்ட் பாம் பீச், மே 5–
அமெரிக்கா -ஈரான் இடையே போர் நிறுத்த ஒப்பந்தம் ஏற்படுவதில் கடும் இழுபறி நிலை நிலவி வருகிறது. ஈரானின் முந்தைய திட்டத்தை அதிபர் டிரம்ப் நிராகரித்த நிலையில், புதிதாக 14 அம்ச திட்டம் தயாரிக்கப்பட்டுள்ளது. இதை பாகிஸ்தான் மூலமாக அமெரிக்காவுக்கு ஈரான் அனுப்பி வைத்துள்ளது. இந்த புதிய திட்டம் அமெரிக்காவின் 9 அம்ச திட்டத்திற்கு பதிலளிக்கும் விதமாக இருப்பதாக ஈரானின் தஸ்னிம், பார்ஸ் ஆகிய செய்தி நிறுவனங்கள் தகவல் வெளியிட்டுள்ளன.
அமெரிக்கா 2 மாத கால போர்நிறுத்தத்தைக் கோரியதாகவும், ஆனால் ஈரானியர்கள் போர்நிறுத்தத்தை நீட்டிப்பதற்குப் பதிலாக, போரைமுடிவுக்குக் கொண்டு வருவதில் கவனம் செலுத்த விரும்புவதாகவும் 14 அம்ச திட்டம் குறித்து ஈரான் செய்தி நிறுவனங்கள் தெரிவித்துள்ளன. இந்த புதிய திட்டத்தில், அனைத்துப் பிரச்னைகளும் 30 நாட்களுக்குள் தீர்க்கப்பட வேண்டும் என்று ஈரான் விரும்புவதாகவும் கூறப்பட்டுள்ளது.
எதிர்கால தாக்குதல்களுக்கு எதிரான உத்தரவாதங்கள், ஈரானை சுற்றியுள்ள பகுதிகளில் இருந்து அமெரிக்கப் படைகளைத் திரும்பப் பெறுதல், முடக்கப் பட்ட ஈரானிய சொத்துக்களை விடுவித்தல் மற்றும் தடைகளை நீக்குதல், போர் இழப்பீடுகள், லெபனான் உட்பட அனைத்துப் போர் நடவடிக்கைகளையும் முடிவுக்குக் கொண்டுவருதல், மற்றும் ஹார்முஸ் ஜலசந்திக்கான புதிய செயல்முறை ஆகியவற்றை இந்தத் திட்டம் கொண்டுள்ளது.
30 நாட்களில் இந்த ஒப்பந்தம் எட்டப்பட்டவுடன்,அணுசக்தி திட்டம் குறித்த தனி ஒப்பந்தத்தை எட்ட மேலும் ஒரு மாத காலம் பேச்சுவார்த்தை நடத்தப்படும் என கூறப்பட்டுள்ளது. ஈரானின் புதிய 14 அம்ச திட்டம் குறித்து அமெரிக்க அதிபர் டிரம்ப், வெஸ்ட் பாம் பீச்சில் இருந்து மியாமி செல்வதற்காக ஏர்போர்ஸ் ஒன் விமானத்தில் ஏறும் முன்பாக அளித்த பேட்டியில், ‘‘இதுபற்றி நான் பின்னர் தெரிவிக்கிறேன்.
புதிய திட்டம் குறித்து விமானத்தில் ஆய்வு செய்வேன்’’ என்றார். பின்னர் சிறிது நேரத்தில் தனது சமூக ஊடக பதிவில் டிரம்ப், ‘‘கடந்த 47 ஆண்டுகளாக மனித குலத்திற்கும், உலகிற்கும் ஈரான் செய்த கொடுமைகளுக்கு இன்னும் போதுமான விலையை கொடுக்காத நிலையில், இந்த திட்டம் ஏற்றுக் கொள்ளப்படும் என்று என்னால் கற்பனை செய்து கூட பார்க்க முடியவில்லை’’ என குறிப்பிட்டிருந்தார். எனவே ஈரானின் புதிய
திட்டமும் அதிபர் டிரம்பை கவரவில்லை என கருதப்படுகிறது.
ஹார்முஸ் ஜலசந்தியை கடந்தது இந்திய கப்பல்!
ஹார்முஸ் ஜலசந்தியில் ஒருபக்கம் ஈரானும் மறுபுறம் அமெரிக்காவும் முற்றுகையிட்டுள்ள நிலையில், 45,000 டன் எல்பிஜி எரிவாயுவுடன் இந்திய கப்பல் ஹார்முஸ் ஜலசந்தியை கடந்துள்ளதாக தகவல்கள் வெளியாகி உள்ளன. மார்ஷல் தீவுகள் கொடியை ஏந்திய சர்வ சக்தி என்ற கப்பல் ஈரானின் லாரக் மற்றும் கெஷ்ம் தீவுகளைக் கடந்து ஓமன் வளைகுடாவிற்குள் நுழைந்துள்ளது. அமெரிக்காவின் முற்றுகைக்குப் பிறகு ஹார்முஸ் ஜலசந்தியை கடந்திருக்கும் முதல் இந்திய கப்பல் இது என்பது குறிப்பிடத்தக்கது.