கோட்டான்கள் நாட்டாண்மை

செய்கின்ற சபையிலே

குயில்வந்து நிற்க லாமா?

கூழாங்கல் விலைபோகும்

சந்தையில் வைரத்தைக்

கொண்டுபோய் விற்க லாமா?

காட்டாட்சி நரிகளின்

தர்பாரில், சிங்கத்தின்

கர்ச்சனை ஒலிக்க லாமா?

கடுமுள்ளம் பன்றிகள்

நடுவிலே மயில், வண்ணக்

கலாபம் விரிக்க லாமா?

நாட்டாட்சி நல்லாட்சி

நடைபெற்ற கோட்டையில்

நடிகனின் ரசிகர் கூட்டம்!

நகர்த்திடும் கயிறுகள்

தில்லியின் கைகளில்!

நடக்கட்டும் பொம்ம லாட்டம்!

வீட்டோடு நீ கொஞ்சம்

ஓய்வெடு தலைவனே!

வேதனை துளியும் வேண்டாம்!

வேடம்நம் மக்கட்குப்

பாடம் வழங்கிடும்

விரைவில்! நீ கலங்க வேண்டாம்!