அ
ஞ்சுகச் செல்வரின் அருந்தவப் புதல்வனே!
அரசியல் செருக்க ளத்தில்
ஆயிரம் நெருக்கடி வந்தாலும் சந்திக்கும்
ஆளுமை மிக்க தலைவா!
செஞ்சுடர்க் கதிர்போலும் வெஞ்சமர்க் களம்காணும்
சிங்கமே! தோளு யர்த்து!
சினவேங்கை நடைபோடும் இனமான வீரர்தம்
சேனையை வழிந டத்து!
கொஞ்சுதமிழ்க் கலைஞரின் நெஞ்சுரம் பெற்றவன்!
குறுக்கிடும் தடைத கர்த்துக்
குரைப்பவர் வசைஅள்ளி இரைப்பவர் நாணவே
கொள்கைத்தேர் நீசெ லுத்து!
வஞ்சகரின் சதிவலை அறுத்தெறி! சிலிர்த்தெழு!
வைகறை இருள்கி ழித்து
வழிகாட்டு! நிலமெங்கும் ஒளியேற்று! தமிழர்தம்
வரலாற்றை நிலைநி றுத்து!
காலத்தின் கொடையான கல்வியைத் தொழில்நுட்பக்
கலையினைப் போற்றி நின்றாய்!
கவின்மிகும் ஆட்சியால் உலகத்தின் பார்வையில்
கழகத்தை ஏற்றி நின்றாய்!
கோலச்செந் தமிழ்எங்கள் உயிர்,உணர் வென்றுநீ
குறிக்கோளைச் சாற்று கின்றாய்!
குப்பத்தைச் சேரியைக் கூர்மிக்க தாம்அறிவுக்
கோட்டையாய் மாற்றி நின்றாய்!
மூலத்தை வேர்களின் ஆழத்தைப் பழந்தமிழ்
மொய்ம்பினை உணர்த்தி வைத்தாய்!
முதுகு வளைந்தவர் தண்டு வடங்களை
முறுக்கேற்றி நிமிர்த்தி வைத்தாய்!
ஞாலத்தில் இப்படிஓர் தலைவன்,எக் கட்சிக்கும்
நாடெங்கும் வாய்ப்ப தில்லை!
நட்டம் உனக்கில்லை! நாளை விடியும்!எங்கள்
நம்பிக்கை தோற்ப தில்லை!
இன்றல்ல! நேற்றல்ல! “எழுபத்தே ழாண்டுகள்”
இடர்பல கண்ட கழகம்!
ஏச்சுக்கும் திராவக வீச்சுக்கும் அஞ்சாமல்
எதிர்மோதி வென்ற கழகம்!
ஒன்றல்ல! இரண்டல்ல! உடுக்கள்போல் வடுக்களை
உடம்பெங்கும் கொண்ட கழகம்!
உட்பகை, வெளிப்பகை அத்தனையும் தூளாக்கி
உலாவரு கின்ற கழகம்!
குன்றல்ல! மிகப்பெரும் மலைகளை நொறுக்கியே
கோட்டைக்குச் சென்ற கழகம்!
குனியாமல் எவருக்கும் பணியாமல், செம்மாந்து
கோலோச்சி நின்ற கழகம்!
கன்றல்ல நடுதற்கு! விழுதூன்றி வேர்விட்டுக்
காலூன்றி நிமிர்ந்த கழகம்!
காளான் குடைக்குக்கீழ் முளைக்கின்ற புற்களா
கழகத்தை வீழ்த்த முடியும்?
இழுக்காகி மனமெங்கும் அழுக்காகிப் போனவர்,நம்
இயக்கத்தைத் தூற்றி வரலாம்!
“இலட்சிய மறவன்”நின் “நல்லாட்சி” பொறுக்காதோர்
எரிச்சலில் பேட்டி தரலாம்!
பழுக்கின்ற இடம்தேடிக் கொழுக்கின்ற பேர்கள்,உன்
பாதையில் முட்கள் இடலாம்!
பரம்பரைக் குணம்விட்டுப் போகாத ஏடுகள், பொய்ப்
பரப்புரை அவிழ்த்து விடலாம்!
வழக்கம்போல் இங்கொரு நரிக்கூட்டம், இருட்டுக்கு
வரவேற்பு மாலை யிடலாம்!
“வானத்துச் சூரியன்” காணாமல் போகும்என
வாலாட்டி ஊளை யிடலாம்!
கிழக்கின் வெளிச்சம்நீ! நன்றிகொன் றாருக்கும்
கிளம்பினாய் நன்றி சொல்ல!
கீழ்வானம் சிவக்கும்!என் தலைவா!யார் உள்ளார்?உன்
கீர்த்தியை இங்கு வெல்ல?
எண்ணற்ற களங்கள்!நம் எதிரிகள், துரோகிகள்
இணைகின்ற காட்சி அறிவோம்!
எங்கேயோ ஒளிந்துகொண்டு அம்புகளை நம்மீதில்
எறிகின்ற சூழ்ச்சி அறிவோம்!
கண்ணுக்குள் மணிபோலும் கட்சியை, ஆட்சியைக்
காத்துநீ நடந்த தறிவோம்!
கடக்கும் இதுவும்!உன் வரவுக்குத் திசையெட்டும்
காத்துக் கிடக்கும் அறிவோம்!
அண்ணாவைக் கலைஞரை உள்வாங்கிக் கொண்டநின்
ஆழ்மன உறுதி அறிவோம்!
அன்னைநம் தமிழுக்கும் தமிழர்க்கும் உனையன்றி
யார்இங்கே காவல்? அறிவோம்!
உண்ணாமல் உறங்காமல் உழைக்கும்நின் தியாகத்தை
ஒருபோதும் நெஞ்சில்மறவோம்!
உயிர்வேண்டும் என்றாலும் தருவோம்! இறுதிவரை
உன்னோடு நாங்கள் வருவோம்!
... கவிச்சுடர்
கவிதைப்பித்தன்