புதுடெல்லி, மே 8 –
தேர்தல் ஆணையர்கள் நியமன விவகாரம் வேறு எந்த விவகாரத்தையும்விட முக்கியத்துவம் வாய்ந்தது என்று உச்சநீதிமன்றம் தெரிவித்துள்ளது.
பிரதமர், மக்களவை எதிர்க் கட்சித் தலைவர், உச்சநீதிமன்றத் தலைமை நீதிபதி ஆகியோர் அடங்கிய குழு அளிக்கும் பரிந்துரையின் அடிப்படையில், தேர்தல் ஆணையர்களை குடியரசுத் தலைவர் நியமிக்கவும், இந்த நடைமுறையை தேர்தல் ஆணையர்கள் நியமனம் தொடர்பாக நாடாளுமன்றம் இயற்றும் வரை பின்பற்றவும் கடந்த 2023-ஆம் ஆண்டு மார்ச்சில் தேர்தல் ஆணையம் உத்தரவிட்டது.
சட்டமன்றத்தைத் தொடர்ந்து அந்த ஆண்டு டிசம்பரில் தலைமைத் தேர்தல் ஆணையர் மற்றும் பிற தேர்தல் ஆணையர்கள் நியமன சட்ட மசோதாவை நாடாளுமன்றம் நிறைவேற்றியது. இந்த மசோதாவுக்கு குடியரசுத் தலைவர் ஒப்புதல் அளித்ததைத் தொடர்ந்து மசோதா சட்டமானது.
இந்தச் சட்டத்தின்கீழ், தேர்தல் ஆணையர்களைத் தேர்வு செய்யும்குழுவில் இருந்து உச்சநீதிமன்றத் தலைமை நீதிபதி நீக்கப் பட்டார். இதற்கு எதிராக உச்சநீதி மன்றத்தில் ஜனநாயக சீர்திருத்தங்கள் சங்கம், லோக் பிரஹாரி ஆகிய தன்னார்வ அமைப்புகள் உள்பட பல்வேறு தரப்பினர் மனு தாக்கல் செய்துள்ளனர்.
இந்த மனுக்கள் மீதான விசாரணையை மற்றொரு நாளுக்கு ஒத்திவைக்க வேண்டும் என்று நீதிபதி தீபாங்கர் தத்தா, சதீஷ் சந்திர சர்மா ஆகியோர் அடங்கிய அமர்வில், ஒன்றிய அரசின் சொலிசிட்டர் ஜெனரல் துஷார் மேத்தா புதன்கிழமை முறையிட்டார்.
ஆனால், வேறு எந்த விவகாரத்தையும்விட தேர்தல் ஆணையர்கள் நியமன விவகாரம் முக்கியமானது என்று தெரிவித்து, விசாரணையை ஒத்திவைக்க நீதிபதிகள் மறுத்துவிட்டனர்.