கொல்கத்தா, மே.8–
மேற்குவங்கம் மாநிலத்தில் ஆட்சி அமைப்பதற்கு முன்பே பா.ஜ.க.,வினர் வன்முறையை அரங்கேற்றி வருவதால் பொதுமக்கள் அச்சம் அடைந்துள்ளனர். மேலும், 3 நாட்களில் 3 திரிணாமுல் காங்கிரஸ் நிர்வாகிகள் படுகொலை செய்யப்பட்டுள்ளதால் பெரும் பரபரப்பு நிலவுகிறது.
மேற்குவங்கம் மாநிலத்தில் நடைபெற்ற சட்டப்பேரவை தேர்தலில், தேர்தல் ஆணையத்தின் உதவியுடன் பா.ஜ.க., வெற்றி பெற்றது. இந்நிலையில், ஆட்சி அமைப்பதற்கு முன்பே மாநிலத்தில் அக்கட்சியினர் பயங்கர வன்முறையை கட்டவிழ்த்து விட்டுள்ளனர். வன்முறை தொடரும் நிலையில் இதுவரை 433 பேர் கைது செய்யப்பட்டுள்ளனர். ஆயிரத்திற்கும் மேற்பட்டோர் தடுப்பு காவலில் வைக்கப்பட்டுள்ளனர். வன்முறை தொடர்பாக 200-க்கும் மேற்பட்ட வழக்குகள் பதிவு செய்யப்பட்டுள்ளன.
தேர்தல் வெற்றி கொண்டாட்டம் என்ற பெயரில் மேற்குவங்கம் முழுவதும் பா.ஜ.வி.,னர் வன்முறை வெறியாட்டத்தால் பொதுமக்கள் மிகுந்த அச்சமடைந்துள்ளனர். கொல்கத்தாவில் உள்ள இறைச்சி கடைகளை பா.ஜ.க. வினர் புல்டோசர் மூலம் இடித்ததால் பதற்றம் ஏற்பட்டுள்ளது. திரிணாமுல் காங்கிரஸ் அலுவலகம் மீது பா.ஜ.க.,வினர் தாக்குதல் நடத்தியது அதிர்ச்சியை ஏற்படுத்தியுள்ளது. வன்முறை சம்பவங்கள் அரங்கேறிய போது, மத்திய பாதுகாப்பு படையினர் அமைதியாக வேடிக்கை பார்த்துக் கொண்டிருந்ததாக புகார் எழுந்துள்ளது. மேற்குவங்கம் மாநிலத்தில் ரத்தக் கறையோடு அரங்கேறும் அதிகார மாற்றம் பொதுமக்களிடையே கடும் அதிருப்தியை ஏற்படுத்தியுள்ளது. இடதுசாரிகள் மற்றும் ஜனநாயக சக்திகள் மீதான பாசிச பாஜகவின் திட்டமிட்ட தாக்குதலுக்கு கண்டனம் எழுந்துள்ளது.
முர்ஷிதாபாத்தில் லெனின் சிலையைஉடைத்த பா.ஜ.க.,வினர்
சுவேந்து அதிகாரியின் உதவியாளர் மர்ம நபர்களால் சுட்டுக்கொலை இதனிடையே முர்ஷிதாபாத் மாவட்டத்தில் அமைந்துள்ள லெனின் சிலையை பா.ஜ.க.,வினர் உடைத்ததால் பரபரப்பு ஏற்பட்டது. பா.ஜ.க.,வினரின் இந்த வன்முறை செயலுக்கு மார்க்சிஸ்ட் கம்யூனிஸ்ட் கட்சி கண்டனம் தெரிவித்துள்ளது.
இந்நிலையில், பா.ஜ.க. முதலமைச்சர் வேட்பாளர் சுவேந்து அதிகாரியின் உதவியாளர் நேற்று முன்தினம் இரவு மர்மநபர்களால் சுட்டுக்கொலைசெய்யப்பட்டுள்ளது பதற்றத்தை மேலும் அதிகரித்துள்ளது.