தி.
மு.க. தேர்தலில் போட்டியிட்டு ஆட்சி அமைக்கத் துடிக்கும் வெறும் அரசியல் கட்சி அன்று. தந்தை பெரியாரிடம் இருந்து விலகி திராவிட முன்னேற்றக் கழகத்தை 1949ஆம் ஆண்டில் தொடங்கி, 1957 ஆம் ஆண்டில் தான் சட்டமன்றத் தேர்தலிலும் நாடாளுமன்றத் தேர்தலிலும் முதன் முதலாக தி.மு.க. போட்டியிட்டது.
இடைப்பட்ட 8 ஆண்டுகளில் ஊர்ப் புறம், மாவட்டம், நகர், சென்னை மாநகரம் வரை கட்சியின் அமைப்புகளை உருவாக்கி, மாவட்டந்தோறும் மாநாடுகளை நடத்தி, பகுத்தறிவு, சமூக நீதி, உலகின் பல நாடுகளில் முகிழ்த்த புரட்சிகளை இளைஞர்களுக்குக் கற்பித்துப் பக்குவப்படுத்தி, அதற்குப்
பின்னர் தான் தேர்தல் அரசியலுக்கு தி.மு.க. நுழைந்தது.
இந்திய அரசியலில் எந்தக் கட்சியிலும் காண முடியாத தனிச்சிறப்பாகும்.
1957 ஆம் ஆண்டில் இரண்டு நாடாளுமன்ற உறுப்பினர்கள், அறிஞர் அண்ணா, கலைஞர், பேராசிரியர் உட்பட
15 சட்டமன்ற உறுப்பினர்கள் தேர்ந்தெடுக்கப்பட்டனர்.
எங்கெல்லாம் சமூக நீதி கொள்கைக்கு ஆபத்து ஏற்பட்டதோ அங்கெல்லாம் கட்சி அரசியல் கடந்து அறிஞர் அண்ணா ஒரு பொதுக் கருத்து உருவாவதற்குப் புதிய அரசியல் அணுகுமுறையைப் பின்பற்றினார்.
1954 ஆம் ஆண்டில் குலக்கல்வி முறையை அன்றைய முதல்வர் இராஜாஜி நடைமுறைப்படுத்த முற்பட்டபோது, தந்தை பெரியார் கடுமையான முறையில் எதிர்த்தார்.
காங்கிரஸ் கட்சியில் தலைவர் காமராசர் போன்றவர்களும் எதிர்த்த நிலையில் ஆட்சிப் பொறுப்பிலிருந்து
இராஜாஜி விலகினார். அப்போது சட்டமன்றத்திற்குக் குடியாத்தம் தொகுதியில் காமராசர் போட்டியிட்டார்.
வருங்கால அரசியலில் தி.மு.க.விற்கு எதிராக காமராசர் செயல்படுவார் என்பதை அறிந்தும், குடியாத்தம் தேர்தலில் காமராசர் வெற்றி பெறுவதற்கு அறிஞர் அண்ணா துணை நின்றார். ‘குணாளா ! குலக்கொழுந்தே’ என்று பாராட்டி
காமராசரைச் சிறப்பித்தார் அறிஞர் அண்ணா.
காமராசர் முதல்வராக இருந்தபோது 1962 ஆம் தேர்தலில் அறிஞர் அண்ணாவைக் காஞ்சிபுரம் தொகுதியில்
தோற்கடிக்க முழுக் கவனம் செலுத்தினார். தோற்கடித்தார். தி.மு.க. 50 சட்டமன்றத் தேர்தல்களில் வெற்றி பெற்றது.
அறிஞர் அண்ணாவின் தோல்வியைக் கண்டு தி.மு.க. தொண்டர்கள் முதல் அனைத்துத் தலைவர்களும் கலங்கினர். தேர்தல் முடிவு தெரிந்தவுடன் அறிஞர் அண்ணா
பெங்களூர் சென்றார். அங்கிருந்து “அறுவடையும் - அணிவகுப்பும்” என்ற தலைப்பில் மூன்று மடல்களைத் திராவிட நாடு ஏட்டில் எழுதினார்.
“பெங்களூர் நகரில் ஜெய் நகர் என்ற பகுதியில், ஜெய விலாஸ் என்ற இல்லத்தில் தங்கியிருந்துவிட்டு வருகிறேன். வேடிக்கை அல்ல, தம்பி! விசித்திரம், ஆனால் உண்மை!
தோல்வி கிடைத்ததும் நான் சென்று தங்கியிருந்த இடம் ஜெய விலாஸ் - ஜெய் நகர்! போதுமா விசித்திரம்! என்ன செய்து கொண்டிருந்தேன்?
பலரும் வந்திருந்து எனக்கு ஆறுதல் கூற, அதைக்
கேட்டுத் துயரத்தைத் துடைத்துக் கொண்டு மன அமைதி பெற்றுக் கொண்டிருந்தேன் போலும் என்று எண்ணுகிறாய். அது தான் இல்லை! பலருக்கு ஆறுதல் கூறிக் கொண்டிருந்தேன்.” “அரசியல் உலகு, அற்புதங்கள், அதிர்ச்சிகள், மகிழ்ச்சி தரும் நிகழ்ச்சிகள், எக்களிப்புகள், எரிச்சலூட்டும் சம்பவங்கள், வெற்றிகள், தோல்விகள் யாவும் நிரம்பிய இடம்.
எல்லாத் துறைகளிலும் அவ்விதம் என்பாய். ஒரு மாறுபாடு உண்டு. மற்ற எந்தத் துறையினையும் விட அரசியல் துறையிலே எதிர்பாராத நிகழ்ச்சிகள், ஏமாற்றங்கள், எரிச்சல்கள் நிரம்ப ஏற்படும்; விசித்திரமான உலகு.” இம்மடலின் மற்றொரு பகுதியில் அறிஞர் அண்ணா, “தம்பி கருணாநிதி கடற்கரைக் கூட்டத்திலே சுட்டிக் காட்டியது போல, அந்தத் தோல்வியால் மூண்டிடும் வேதனை, புதிய உறுதியுடன் பணியாற்றி, இப்போது பெற்ற வெற்றியினை விட அளவிலும் வகையிலும் தரம் உள்ளதான வெற்றியைப் பெற்றளிக்கும் ஆற்றலை நமக்குத் தருவதாக அமைய வேண்டும்.” என்று அறிஞர் அண்ணா வலியுறுத்துகிறார்.
அறிஞர் அண்ணா, முத்தமிழ் அறிஞர் கலைஞர் ஆகியோரின் கொள்கை வாரிசாக இருந்து, எதிர்காலத் தமிழ்நாட்டின் நம்பிக்கை ஒளியாக வலம் வரும் திராவிட இயக்க அரிமா முத்துவேல் கருணாநிதி ஸ்டாலினின் ஒவ்வொரு நகர்விலும் இத்தகைய அரிய குணநலன்களைக் காணமுடிகிறது.
எங்கள் வீட்டு இல்லத் திருமண நிகழ்ச்சியில் சில ஆண்டுகளுக்கு முன்பு தலைவர் ஸ்டாலின் ஒரு கருத்தை வெளியிட்டார். “நான் பிறந்தவுடன் அப்பா கலைஞர், பெரியார்,- அண்ணா பெயர்களை இணைத்து “அய்யா துரை” என்று தான் பெயரிட்டார். அப்போது சோவியத் ஒன்றியத்தின் தனிப் பெரும் தலைவர் ஸ்டாலின் மறைவு செய்தியை அறிந்து எனக்கு ஸ்டாலின் என்று பெயரை மாற்றி விட்டார் என்று குறிப்பிட்டார்.
கடந்த 5 ஆண்டு ஆட்சியில் எடுத்துக்காட்டான பொருளாதார உயர் வளர்ச்சியும், அதன் விளைவாக எந்த மாநிலமும் கண்டிராத ஏழை எளிய மக்களின் வாழ்க்கையில் ஏற்றமும் முன்னேற்றமும் ஏற்பட்டன என்பதை ஒன்றிய அரசே ஒப்புக் கொண்டது.
பெரியாரின் தன்மானத்தையும் சுயமரியாதையையும், அறிஞர் அண்ணாவின் ஆற்றலையும் அணுகுமுறையையும், சோவியத் ஜோசப் ஸ்டாலினின் கொள்கை உறுதியும் பெற்ற, தலைவர் முத்துவேல் கருணாநிதி ஸ்டாலின் இந்திய அளவில் பாசிச எதிர்ப்பு அணியின் முன்னணிசெயல்
வீரராகச் சீரிய முறையில் பணியாற்றி ஜனநாயகம் காப்பார்!
பல தேர்தல் வெற்றிகளைக்
குவிப்பார்!