சென்னை, மே 9 –
தமிழ்நாட்டில் ஜனநாயக முறையிலான ஆட்சி நிறுவப்படுவதற்கு தி.மு.க. தலைவர் மு.க.ஸ்டாலின் அவர்கள் ஆளுநர் அவர்களுக்கு விடுத்துள்ள வேண்டுகோளை இந்திய யூனியன் முஸ்லிம் லீக் முழுமனதோடு வரவேற்கிறது என்றும், மதச்சார்பற்ற முற்போக்கு கூட்டணியில் இந்திய யூனியன் முஸ்லிம் லீக் தொடர்கிறது என்றும், அக்கட்சியின் தேசியத் தலைவர் பேராசிரியர் காதர் மொகைதீன் அவர்கள் தெரிவித்துள்ளார்.
இது குறித்து பேராசிரியர் காதர் மொகைதீன் அவர்களின் அறிக்கை வருமாறு:
தமிழகத்தில் நடந்த முடிந்த சட்டமன்றத் தேர்தலில் தி.மு.க தலைமையிலான மதச்சார்பற்ற முற்போக்குக் கூட்டணியில் இந்திய யூனியன் முஸ்லிம் லீக் இடம்பெற்று பாபநாசம், வாணியம்பாடி ஆகிய இரண்டு தொகுதிகளில் முறையே ஏ.எம். ஷாஜஹான், எஸ்.எஸ்.பி. சையத் பாருக் பாஷா ஆகியோர் தேர்ந்தெடுக்கப்பட்டுள்ளனர்.
தமிழகத்தில் ஜனநாயக முறையிலான ஆட்சி நிறுவப்படுவதற்கு தி.மு.க. தலைவர் மு.க.ஸ்டாலின் அவர்கள் தமிழக ஆளுநர் அவர்களுக்கு விடுத்துள்ள வேண்டுகோளை இந்திய யூனியன் முஸ்லிம் லீக் முழு மனதோடு வரவேற்கிறது.
சட்டமன்றத்தில் இந்திய யூனியன் முஸ்லிம் லீகினுடைய இரண்டு உறுப்பினர்களும் மேதகு ஆளுநர் மேற்கொள்ளக்கூடிய அரசு அமைப்புக்கான அனைத்து செயல்பாடுகளுக்கும் துணை நிற்பர் என்பதையும் தெரிவித்துக் கொள்கிறோம்.
இவ்வாறு பேராசிரியர் கே.எம். காதர் மொகைதீன் அறிக்கையில் தெரிவித்துள்ளார்.
கழகத் தலைவருடன்
சந்திப்பு!
மேலும் கழகத் தலைவர் மு.க.ஸ்டாலின் அவர்களை பேராசிரியர் கே.எம். காதர் மொகைதீன் நேற்று சந்தித்து மதச்சார்பற்ற முற்போக்கு கூட்டணியில் இந்திய யூனியன் முஸ்லிம் லீக் தொடர்கிறது என்றும் த.வெ.க.விற்கு ஆதரவில்லை; அது வெறும் வதந்தி என்றும் தெரிவித்துள்ளார்.
பேட்டி!
தொடர்ந்து பேராசிரியர் கே.எம்.காதர் மொகைதீன் அவர்கள் செய்தியாளர்களுக்கு அளித்த பேட்டியில், தி.மு.க. கூட்டணியில் நேற்றும் இருந்தோம், இன்றும் இருக்கிறோம், நாளையும் இருப்போம் என்று தெரிவித்தார்.