ச
ற்று நிதானமாகவே யோசிப்போம்...
திரிபுராவில் துவங்கி, பா.ஜ.க. தான் ஒவ்வொரு மாநிலத்திலும் தேர்தல் முடிவுகள் வந்த பிறகு, மிக மிக மோசமான குதிரை பேரங்களில் இறங்கி...
யாரை, யாருடன் எப்படி வேண்டுமானாலும் சேர்த்து அல்லது பிரித்து ஆட்சி அதிகாரத்தைக் கைப்பற்றி ஒவ்வொரு மாநிலமாகப் பிடித்து வருகின்றது.
பா.ஜ.க.வின் அந்த போக்கினை இந்தியாவில் இருக்கின்ற காங்கிரஸ் உள்ளிட்ட அனைத்து கட்சிகளுமே கடுமையாக விமர்சித்தும் வருகின்றன.
ஆனால் இன்றைக்கு சாப்பிட்டு கழுவிய கை காய்வதற்குள்ளாகவே, ரத்தமும் சதையுமாக ஒரு மானசீக மனக் கொலையை செய்து முடித்திருக்கிறது காங்கிரஸ். இதை நான் குற்றம் சொல்லவில்லை. 2026 தேர்தலுக்கு மட்டும் தான் கூட்டணி என்று மாணிக்தாக்கூர் சொல்கிறார்.
இருக்கட்டும்... காங்கிரஸ் ஒரு வேளை தனிப்பெரும் கட்சியாக உருவெடுத்து, ஆட்சி அமைக்க சொற்ப எண்ணிக்கையிலான எம்.எல்.ஏக்கள் தேவை என்ற நிலை ஏற்பட்டிருந்தால்... அப்பொழுது இது மாதிரியாக எம்.எல்.ஏ.க்களை
குதிரைபேரத்தில் ஈட்டி ஆட்சி அமைத்திருந்தால், அதைக்கூட வேறு என்ன வழியிருக்குன்னு ஏற்றுக்கொண்டு சமாதானமாகிப் போயிருக்கலாம்.
ஆனால், ரெண்டே ரெண்டு அமைச்சர் பதவிக்காக இதயத்தை (அப்படி ஒன்று அவர்களுக்கு இருந்தால்) அறுத்துப் போட்டு விட்டு, பனையூர் படியேறி நிற்கின்றீர்கள்.
கடந்த நாடாளுமன்றத் தேர்தலில், மோடிக்கு அரசமைக்க தி.மு.க.வின் தயவு தேவைப்பட்ட பொழுது, தி.மு.க. அது பற்றி சிந்திக்கக் கூட இல்லை. அதுகூட பரவாயில்லை, கொஞ்சம் அட்ஜெஸ்ட் பண்ணுங்க, நீங்க கேட்டதை எல்லாம் தருகின்றோம் என்று சாம பேத தண்ட வழிமுறைகளில் பா.ஜ.க. நெருக்கிய போதும் தி.மு.க. தளரவில்லை.
மாறாக நாடாளுமன்றத்தின் இரு அவைகளிலும், பா.ஜ.க. கொண்டு வர நினைத்த... இறையாண்மைக்கு எதிரான, சமூகநீதிக்கு எதிரான, மதவாதத்திற்கு எதிரான பல்வேறு மசோதாக்களை எதிர்த்து மிகக் காத்திரமாக தி.மு.க. களமாடிக் கொண்டிருக்கின்றது.
நீங்கள் எங்களுடன் கூட கூட்டணி வைக்க வேண்டாம், காங்கிரஸை மட்டும் தள்ளி வையுங்கள் என்று பா.ஜ.க. எவ்வளவோ முறை மறைமுகமாக தூது விட்டாலும் கூட அவற்றை பொருட்படுத்தாமல் உங்கள் இயக்கத் தலைவரை பிரதமர் வேட்பாளராக அறிவித்ததே தி.மு.க....?! உங்களால் தி.மு.க.வுக்கு ஏதேனும் அதிகாரமோ பலன்களோ கிடைத்த காரணத்தினாலா..?! உங்களை தொடர்ந்து ஆதரித்ததால் தி.மு.க. பெற்றது எல்லாம் அவதூறுகளும், அடங்கா துயரங்களும் மட்டும் தானே..?!
தமிழ்நாட்டில் காவி வாதம் வந்துவிடக் கூடாது என்ற ஒற்றைக் காரணத்திற்காகவே... ஈழப்பிரச்சினை, 2ஜி என்று பல்வேறு பழிகளை சம்பந்தமே இல்லாமல் தி.மு.க. உங்களுக்காக தாங்கி
நின்றதே..?!
தேர்தலுக்கு முன்பாகவே தி.மு.க. தலைவர், தொகுதி எண்ணிக்கையையும், ஆட்சி அதிகாரத்தில் பங்கில்லை என்பதையும் தெள்ளத் தெளிவாகச் சொல்லி விட்டாரே? அதில் உங்களுக்கு ஒரு சதவிகிதம் உடன்பாடு இல்லை என்றாலும் அப்பொழுதே வெளியேறியிருக்கலாமே..?! யார் உங்கள் கையைப் பிடித்து இழுத்தது..?!
மிகப் பலமான சந்தேகம் ஒன்று இங்கே உலாவரத் துவங்கியிருக்கின்றது. தி.மு.க. கூட்டணியில்இருந்து கொண்டே, வேறு ஒரு அணியை த.வெ.க.வுடன் மிகத் தீர்க்கமாக முடித்து வைத்திருக்கின்றீர்கள் என்பது தான் அது..?!
ஆம்.. இன்றைக்கு கிரிஷ் சோடங்கர், புதிய
எம்.எல்.ஏ.க்கள் மற்றும் பிரவீன் சக்ரவர்த்தி எல்லாம் விஜய்யோடு நின்று பேசுவதைப் பார்த்தால், புதிய உறவாகத் தெரியவில்லை, மாறாக நீங்கள் த.வெ.க. தலைமையோடு மிக மிக நெருக்கமான உறவோடு இருந்திருக்கின்றீர்கள் என்று பலமாக நம்பத் தோன்றுகின்றது.
உங்களுடைய ஒரு வாக்கு கூட ஒரு தி.மு.க. வேட்பாளருக்கு கூட விழவில்லை. உங்களால்
கட்டமைக்கப்படும் சிறுபான்மையினர் வாக்குகளும் கூட பெரும்பான்மையாக உங்கள் தலைவர் வெளிப்படையாக விஜய்க்கு ஆதரவானவராக
காட்டிக் கொண்ட காரணத்தாலும், தி.மு.க. தலைவரோடு பேசவோ, மேடையேறவோ மறுத்து அவர் எண்ணங்களை வெளிப்படுத்திய காரணங்களாலும் தவெகவுக்கே சென்றுள்ளது.
திட்டமிட்டு தி.மு.க.வை வீழ்த்தவே, தி.மு.க.வோடு வெளிப்படையாக கூட்டணியில் இருந்து கொண்டே, ஆதரவு வாக்குகளை
த.வெ.க.வுக்கு மடை மாற்றி... கிடைக்கின்ற எம்.எல்.ஏ.க்களுடன் சென்று த.வெ.க. ஆட்சியில்
பங்கேற்பது என்ற மிகக் கேவலமான கான்ஸ்பிரஸி தியரியோடு... அதாவது சதித்திட்டத்தோடு நீங்கள் செயல்பட்டுள்ளீர்கள் என்று நம்பப்படுகின்றது..!
அப்பொழுதே த.வெ.க.வோடு சென்றிருந்தால்,
உங்களுக்கு அவர் ஐம்பது தொகுதிகளுக்கும் மேலாகக் கூட கொடுத்திருப்பார். தி.மு.க.வுக்கு 28 சீட்டுகள் லாபம். ஆனால் த.வெ.க.விலோ வேட்பாளர்களுக்குக் கூட மரியாதை இல்லை... விஜய்க்கும் விசிலுக்கும் மட்டும் தான் அங்கே மரியாதை. கை சின்னம் நிற்கும் ஐம்பது தொகுதிகளிலும் பெரும்பான்மையாக தி.மு.க.வோ அ.தி.மு.க.வோ தான் அந்தந்த பகுதிகளுக்கு ஏற்றார் போல வென்றிருந்திருக்கும். நிலைமை தலைகீழாக மாறிப் போயிருந்திருக்கும்..!
அதனால் தான் நீங்கள் தி,மு,க,வோடு கூட இருந்தே குழி பறித்திருக்கின்றீர்கள். உறவாடிக் கெடுத்திருக்கின்றீர்கள். சுப்ரமணியபுரம் படத்தில் கஞ்சா கருப்பு காட்டிக் கொடுத்தது போல..?!
காங்கிரஸ் காரர்களே, ஒவ்வொரு மாநிலமாக இழந்து கொண்டு வருகின்றீர்கள். கேரளம் தப்பித்தது என்று நம்ப வேண்டாம், அது கம்யூனிஸ்டுகள் இரண்டு முறை தொடர்ந்து அங்கு ஆண்டதால் உங்களுக்குக் கிடைத்த வெற்றி. மேலும் பா.ஜ.க. அஜெண்டா படி, முதலில் கம்யூனிஸ்டுகளை அழித்த பிறகு தான் உங்கள் தலையில் கை வைப்பார்கள்.
அந்த வகையில், திரிபுரா, மேற்குவங்கத்திற்குப் பிறகு கேரளத்தில் கொஞ்சம் கொஞ்சமாக கம்யூனிஸ்டுகளை முடித்த பிறகு அடுத்ததாக உங்களையும் முடித்து வைப்பார்கள். ஏற்கனவே அங்கு அவர்கள் கணக்கைத் துவங்கி விட்டார்கள்.
காங்கிரஸ் காரர்களே, தி.மு.க. கொள்கை சார்ந்து இயங்குகின்ற இயக்கம்.அதனால் உங்கள் துரோகங்கள், சித்து விளையாட்டுக்களை எல்லாம் புறம் தள்ளி விட்டு அல்லது சகித்துக் கொண்டு பொறுமை காத்தது. ஆனால் நடிகர் விஜய் அப்படியல்ல. கொள்கை கோட்பாடுகளுக்காக யாரும் அவருக்கு வாக்களிக்கவும் இல்லை, அவரும் அதற்கு மதிப்பளிப்பவரும் இல்லை.
அ.தி.மு.க.வும் அவருக்கு ஆதரவு அளிக்க தயாராக வாசலில் காத்துக் கொண்டிருக்கின்றது. உங்கள் கதை தமிழ்நாட்டிலும் இனி முடியப்போகின்றது.