தேனி, மே 11–
தேனி அரசு மருத்துவக் கல்லூரி மருத்துவமனையில் இரு கண்களிலும் கண்புரை நோயால் பாதிக்கப்பட்டிருந்த 12 வயது சிறுவனுக்கு வெற்றிகரமாக அறுவை சிகிச்சை செய்யப்பட்டு, மீண்டும் முழுமையான பார்வை வழங்கப்பட்டுள்ளது.
தேனியைச் சேர்ந்த 12 வயது சிறுவன் மணிகண்டன், கண் பார்வை குறைபாடு காரணமாக தனது தாயார் மகாலட்சுமியுடன் அரசு தேனி மருத்துவக் கல்லூரி மருத்துவமனை கண் சிகிச்சை பிரிவிற்கு வந்திருந்தார். சிறுவனைப் பரிசோதனை செய்ததில், அவனது இரு கண்களிலும் ‘வளர்சிதை கண்புரை’ (Developmental Cataract) பாதிப்பு இருப்பது கண்டறியப்பட்டது.
இதையடுத்து, தேனி அரசு மருத்துவ கல்லூரி மருத்துவமனை முதல்வர் முத்து சித்ரா அறிவுறுத்தலின்படி, கண் அறுவை சிகிச்சை பிரிவு பேராசிரியர் டாக்டர் கணபதி ராஜேஷ் தலைமையிலான மருத்துவர்கள் விஜய் ஆண்டனி, சராயு வெங்கடலெஷ்மி, ஜெசிந்தா நான்சி மற்றும் மயக்கவியல் துறை பேராசிரியர் டாக்டர் கண்ணன் பாபு தலைமையிலான மருத்துவர்கள் ஜேசுதாஸ், காருண்யா ஆகியோர் அடங்கிய குழுவினர் தீவிர சிகிச்சை மேற்கொண்டனர்.
சிறுவனுக்கு கடந்த ஏப்ரல் 29-ம் தேதி வலது கண்ணிலும், மே 7-ம் தேதி இடது கண்ணிலும் வெற்றிகரமாக அறுவை சிகிச்சை செய்யப்பட்டது. சிகிச்சைக்குப் பின் சிறுவன் மணிகண்டன் தற்போது முழுமையான கண் பார்வையைப் பெற்றுள்ளார்.
இது குறித்து மருத்துவமனை முதல்வர் முத்து சித்ரா மற்றும் கண் அறுவை சிகிச்சை பிரிவு பேராசிரியர் டாக்டர் கணபதி ராஜேஷ் ஆகியோர் தெரிவிக்கையில், குழந்தைப் பருவத்தில் ஏற்படும் கண்புரை பாதிப்பு என்பது தடுக்கக்கூடிய பார்வை இழப்பிற்கான முக்கிய காரணமாகும். ஆரம்ப கட்டத்திலேயே கண்டறிந்தால் பார்வையை முழுமையாகப் பாதுகாக்க முடியும். கண்களில் வெள்ளை நிற பிரதிபலிப்பு.பொருட்களைத் தெளிவாகப் பார்க்க சிரமப்படுவது.
அடிக்கடி கண் சிமிட்டுதல் அல்லது தலையைச் சாய்த்துப் பார்த்தல்.
படிப்பில் கவனக்குறைவு. வெளிச்சத்தைப் பார்க்க முடியாமல் கண்கள் கூசுதல் அல்லது நீர் வடிதல்.
இப்படியான அறிகுறிகள் இருந்தால் பெற்றோர்கள் தாமதிக்காமல் உடனடியாக மருத்துவமனைக்கு அழைத்து வர வேண்டும். தேனி அரசு மருத்துவக் கல்லூரி மருத்துவமனையில் இப்பாதிப்பிற்கு நவீன முறையில் இலவசமாக அறுவை சிகிச்சை வழங்கப்படுகிறது,” எனத் தெரிவிக்கப்பட்டுள்ளது.