#Title

இந்திய கம்யூனிஸ்ட் கட்சியின் மூத்த தொழிற்சங்கத் தலைவர் புதுக்கோட்டை தோழர் ஜி.சிங்கமுத்து மறைவு! இந்திய கம்யூனிஸ்ட் கட்சி ஆழ்ந்த இரங்கல்!

புதுக்கோட்டை, மே.11–

இந்தியக் கம்யூனிஸ்டு கட்சியின் புதுக்கோட்டை மாவட்ட முன்னோடியும், மூத்த தொழிற் சங்கத் தலைவருமான தோழர் வி.சிங்கமுத்து (85) நேற்று (10.05.2026) காலையில் மறைவுற்றார் என்ற துயரச் செய்தி ஆழ்ந்த வேதனை அளிக்கிறது.

புதுக்கோட்டை நகரில் இயங்கி வந்த நிஜாம் லேடி புகையிலை கம்பனியில் தொழிலாளியாக வாழ்க்கையை தொடங்கிய சிங்கமுத்து, தொழிலாளர்களை திரட்டி சங்கம் அமைத்து, அவர்களது நல்வாழ்வுக்காக போராடியவர். நல்ல பல சட்டங்கள் உருவாக காரணமாக இருந்தவர்.

புகையிலைத் தொழிலாளர் அரங்கில் மட்டுமல்லாது நூற்பாலை, மீனவர், கட்டிட, கட்டுமானப்பிரிவு என அனைத்துப் பகுதி தொழிலாளர்களையும் ஆதரித்து தொடர்ந்து செயல்பட்டு வந்தவர்.

நல்ல சிந்தனையாளர், இடைவிடாது வாசிப்பவர், படைப்பாளர் சில நூல்களை எழுதியுள்ளார். நாடகம் நடத்துவது போன்ற இலக்கிய ஈடுபாடு கொண்டவர். நாடகங்கள் எழுதி, இயக்கியவர்.

இந்தியக் கம்யூனிஸ்டு கட்சியிலும், ஏஐடியூசி தொழிற்சங்க அமைப்பிலும் மாவட்ட, மாநில அளவில் பொறுப்புகளை ஏற்று சிறப்பாக செயல்பட்ட பெருமைக்குரியவர்.

தொழிலாளர்களிடமும், பொது மக்களிடமும் பழகுவதில் மிகச் சிறந்த பண்பு கொண்டவர். கட்சியின் ஆரம்ப காலத் தலைவர்கள் அப்புக்குட்டி, கே.ஆர்.சுப்பையா போன்றோரின் வரிசையில் வைத்து போற்றத்தக்கவர்.

தொழிலாளி வர்க்கத்தின் உரிமைகளுக்காக தீவிரமாக போராட வேண்டிய காலத்தில், அனுபவம் வாய்ந்த மூத்த தொழிற்சங்க தலைவரின் மறைவு, எளிதில் ஈடு செய்ய முடியாத பேரிழப்பாகும்.

அன்னாரின் மறைவுக்கு இந்தியக் கம்யூனிஸ்டு கட்சியின் தமிழ்நாடு மாநிலக் குழு செவ்வணக்கம் கூறி, ஆழ்ந்த இரங்கலை தெரிவித்துக் கொள்கிறது. அவரை பிரிந்து வாடும் அவரது குடும்பத்தினருக்கு ஆறுதலை தெரிவித்துக் கொள்கிறது.