சென்னை, மே 11–
தி.மு.க. தலைமையிலான நீண்ட காலக் கூட்டணியில் தொடர்வோம் எனவும், தமிழ்நாட்டின் நலன் கருதி புதிய அரசுக்கு இந்திய யூனியன் முஸ்லிம் லீக் நிபந்தனையற்ற ஆதரவை அளிப்பதாகவும் உயர்நிலைக் குழுக் கூட்டத்தில் தீர்மானம் நிறைவேற்றப்பட்ட தாக அக்கட்சியின் தேசியத் தலைவர் பேராசிரியர் கே.எம்.காதர் மொகிதீன் தெரிவித்துள்ளார்.
இந்திய யூனியன் முஸ்லிம் லீக் உயர்நிலைக் குழு தீர்மானம் வருமாறு:–
இந்திய யூனியன் முஸ்லிம் லீக் மாநில உயர் நிலைக்குழு கூட்டம் 09.05.2026 மாலை 4 மணிக்கு தலைமை நிலையம் காயிதே மில்லத் மன்ஜில், சென்னை – 1 என்ற முகவரியில் தேசிய தலைவர் பேராசிரியர் கே.எம்.காதர் மொகிதீன் தலைமையில் நடைபெற்றது.
இக்கூட்டத்தில் கீழ்க்கண்ட தீர்மானம் நிறைவேற்றப்பட்டது.
தி.மு.க. தலைமையில்
வென்ற உறுப்பினர்கள்!
தமிழகத்தில் 2026 ஏப்ரல் 23இல்நடைபெற்ற சட்டமன்ற பொதுத் தேர்தலில் இந்திய யூனியன் முஸ்லிம்லீக் திராவிட முன்னேற்றக் கழகத்தின் தலைமையிலான மதச்சார்பற்ற முற்போக்கு கூட்டணியில் இடம்பெற்று, திமுக மற்றும் தோழமை இயக்கங்களின் பெரும் ஆதரவுடன் வாணியம்பாடி, பாபநாசம் ஆகிய இரண்டு தொகுதிகளில் வெற்றி பெற்று, முறையே எஸ்.எஸ்.பி.சையத் பாரூக் பாஷா மற்றும் ஏ.எம்.ஷாஜகான் ஆகிய இருவரும் சட்டமன்ற உறுப்பினர்களாகி இருக்கிறார்கள்.
ஜனநாயக தேர்தல் முடிவுகள் தமிழக வெற்றி கழகத்திற்கு 108 தொகுதிகளில் மட்டும் வெற்றியை தந்திருக்கிற நிலையில், தமிழகத்தில் அரசு அமைப்பதில் சுணக்கம் ஏற்பட்டுள்ள நிலையில் மேதகு தமிழக ஆளுநர் அவர்கள் அரசு அமைப்பதற்கான துரித நடவடிக்கைகளை மேற்கொள்ள வேண்டும் என தமிழ்நாட்டின் முன்னாள் முதலமைச்சரும் திராவிட முன்னேற்ற கழகத்தின் தலைவருமான மு.க. ஸ்டாலின்அவர்கள் வேண்டுகோள் விடுத்திருக்கிறார்கள்.
ஜனநாயகக் கடமை!
தமிழக வெற்றிக் கழகம் தமிழ்நாட்டில் அரசு அமைப்பதற்கு திமுக கூட்டணியில் இடம் பெற்றிருக்கும் அரசியல் இயக்கங்கள் தங்களின் ஆதரவை தெரிவித்து வருகின்றன. தமிழ்நாட்டில் அரசு அமைப்பதற்கு இன்னும் இரண்டு சட்டமன்ற தொகுதிகளின் உறுப்பினர்களின் ஆதரவு வேண்டும் என்ற நிலை உருவாகியுள்ளதால் தமிழகத்தில் புதிய அரசு அமைப்பதற்கு இந்திய யூனியன் முஸ்லிம் லீக் இரண்டு உறுப்பினர்களின் ஆதரவை வேண்டி தமிழக வெற்றி கழகத்தின் தலைவர் ஜோசப் விஜய் அவர்களின் கடிதம் இந்திய யூனியன் முஸ்லிம் லீகிற்கு அனுப்பப்பட்டிருக்கிறது. தமிழ்நாட்டில் ஜனநாயக முறையிலான அரசு அமைப்பதற்கு உதவ வேண்டிய கட்டாயம் ஜனநாயக கடமையாக இருக்கிறது. இந்த ஜனநாயக கடமையை செய்வதற்கு இந்திய யூனியன் முஸ்லிம் லீக் இந்த மாநில அவசர உயர்நிலை குழு முடிவு செய்கிறது.
தமிழகத்தில் புதிய அரசு அமைப்பதற்கு இந்திய யூனியன் முஸ்லிம் லீக் இரண்டு சட்டமன்ற உறுப்பினர்களும் நிபந்தனையற்ற ஆதரவளித்து எல்லா வகையிலும் ஒத்துழைத்து துணைபுரிவர் என்பதை இக்கூட்டம் தெரிவிக்கிறது. தமிழக வெகுஜன மக்கள் குறிப்பாக முஸ்லிம் சமுதாயத்தின் உணர்வும் எதிர்பார்ப்பும் ஜனநாயக முறையிலான அரசு உருவாக்கப்பட வேண்டும் என்பதே ஆகும். தமிழகத்தில் ஆளுநர் ஆட்சி என்பது வரவேற்புக்கு உரியது அல்ல என்பதையும் ஜனநாயக அரசு உருவாக்குவதை தவிர்த்தால் மக்கள் மத்தியில் குழப்பம் ஏற்பட்டு விடும் என்றும் இந்திய யூனியன் முஸ்லிம் லீக் உயர்நிலை குழு கருதுகிறது.
பாரம்பரியத்தை
பேணிக்காப்போம்!
தமிழகத்தின் பாரம்பரியத்தைபேணிக் காப்பதற்கு இந்திய யூனியன் முஸ்லிம் லீக் இந்த முடிவு எடுத்து அறிவிக்கிறது. தமிழக அரசியலில் நீண்ட காலமாக திமுக தலைமையிலான கூட்டணியில் இருந்து வரும் இந்திய யூனியன் முஸ்லிம் லீக் அதே நிலையில் தொடரும். தமிழகத்தில் ஜனநாயக முறையிலான ஆட்சி உருவாவதற்கு இந்திய யூனியன் முஸ்லிம் லீக்மாநில உயர்நிலை குழு இந்த தீர்மானத்தை நிறைவேற்றி இருக்கிறது.
இவ்வாறு இந்திய யூனியன் முஸ்லிம் லீக் துணைத் தலைவர் பேராசிரியர் கே.எம்.காதர் மொகிதீன் தெரிவித்துள்ளார்.