#Title

களம் உன்னிடம்; காலங் கருதி கருத்தாய் வடிவம் தந்தாய் தலைவா; வாழ்க, நீ வாழ்க!

தி ருகுர்ஆனிலே, ‘தீயதும் நல்லதும் சமமாகா’ ‘அல்லாஹ் எத்தகையவன் என்றால் வானங்களை தூணின்றியே உயர்த்தி உள்ளான்; நீங்கள் பார்க்கிறீர்கள்’ என்று சொல்லப்பட்டு இருக்கிறது. இது இஸ்லாத்தின் மறைமொழி, 2026 ஏப்.23 தேர்தல் முடிவுகளுக்குப் பிறகு இம் மொழிகளை ஒப்பிட்டுப் பார்த்து எண்ணத் தோன்றுகிறது. சிலரை ஆசைகள் வெட்கமறியாமல் பேசச் செய்துவிடுகிறது. அப்போதெல்லாம் இப்படிப்பட்ட மொழிகள் நமக்கு ஒத்தடம் கொடுக்கின்றன. எண்ணிப்பார்க்க வைக்கின்றன.

நடந்து முடிந்த சட்டமன்றத் தேர்தலில் தி.மு.க, அ.தி.மு.க, த.வெ.க.களத்தில் நின்றன. நம்மைப் பொருத்தவரை தி.மு.க.-–அ.தி.மு.க. ஆகிய இரு கட்சிகளுக்கே போட்டி என்று கருதினோம். ஆனால் நிலைமை வேறு மாதிரியாக இருந்தது. தி.மு.க. ஆளுங்கட்சி அ.தி.மு.க. எதிர்க்கட்சி, த.வெ.க. புத்தம் புதிய கட்சி; அப்போதுதான் பிறந்த குழந்தை மாதிரி! எங்கள் தொண்டை மண்டல கிராமப் பகுதிகளில், ‘அச்சமான ஊர்ல ஒரு ஆம்பிளைப் புள்ளைப் பொறந்ததாம்; அது தொப்புள் அறுக்கிறதுக்கு முன்னாடி கப்பல் ஏறிப் போச்சாம்’ என்று சொல்வார்கள். அப்படித் தோன்றிய த.வெ.க, தி.மு.க.-–அ.தி.மு.கவைவிட அதிக இடங்களைப் பிடித்தது. ஆனால் அவை தனித்த பெரும்பான்மையைப் பெறவில்லை.

அதிக இடங்களைத் த.வெ.க. பிடித்தது. ஆனால் ஆட்சி அமைக்கிற விதத்தில் பெரும்பான்மைப் பெறவில்லை. இதனால் ஒரு குழப்பமான நிலை உருவானது. பொறுப்பு ஆளுநர் சரிவர வழிகாட்டுதல்களை மேற்கொள்ளவில்லை. த.வெ.க. ஆடிப்போனது. அதிர்ச்சி அடைந்தது. ஆளுநர் மாளிகைக்கு பலமுறை படையெடுத்தனர். இந்நிலையில், தி.மு.க. அணியிலிருந்த காங்கிரஸ், த.வெ.கவை எதிர்த்து வாக்குகளைப் பெற்று அங்கேபோய் சரணடைந்தது. அண்ணா அறிவாலயத்தில் விருந்து சாப்பிட்டுவிட்டு பனையூரில் கைகழுவியது. நிலைமைகளை நின்று நிதானித்துப் பார்க்கவில்லை. கணிக்கவில்லை. இக் கட்சி இந்தியாவை பா.ஜ.கவிடமிருந்து எப்படி மீட்கப் போகிறது?

தி.மு.க. அணியில் இருக்கிற கூட்டணிக் கட்சிகள் இவற்றைப் பார்த்தன. த.வெ.கவும் அணுகி வந்தது. இடதுசாரி கட்சிகள் தீவிரமாக யோசித்தன. கழகத் தலைவரைச் சந்தித்தன. கருத்துப் பரிமாற்றங்கள் நடந்தன. விடுதலைச் சிறுத்தைகள் கட்சி நாலாவிதமான யோசனைகளைச் செய்தது. அக்கட்சியினரும் தலைவரைச் சந்திப்பதும் யோசிப்பதுமாக இருந்தார்கள். இறுதியில் இடதுசாரிகளும் விடுதலைச் சிறுத்தைகளும் த.வெ.கவை ஆதரிப்பது என்று முடிவு எடுத்தனர். கழகத் தலைவர் ஏற்கனவே குறிப்பிட்டபடி த.வெ.க. ஆட்சி அமைக்க நாங்கள் இடையூறாக இருக்க மாட்டோம் என்று தெரிவித்து இருந்தார்.அதன்படியே அவர் நடந்து கொண்டார்.

இந்திய யூனியன் முஸ்லிம் லீக் குழப்பமில்லாம லும் தெளிவுடனும் முதலிலிருந்தே தி.மு.க. அணியில் இருப்பதையே விரும்பியது; எடுத்தும் கூறியது. இறுதியில் தமிழ்நாட்டு நலன் கருதி த.வெ.கவை ஆதரித்தது. இல்லையென்றால் த.வெ.க.112 இடங்களிலேயே இருந்திருக்கும். அரசை அமைக்க முடியாமல் போயிருக்கும். கழகத் தலைவர் ஸ்டாலின், “எங்களது கூட்டணியைச் சார்ந்த தோழர்கள் இன்றைய நெருக்கடியான சிக்கலைத் தவிர்க்க நாங்கள் தமிழக வெற்றி கழகத்திற்கு ஆட்சி அமைக்க ஆதரவு தெரிவித்தாலும், கொள்கை அடிப்படையில் தி.மு.க. தலைமையிலான மதச்சார்பற்ற முற்போக்குக் கூட்டணியில் தொடர்கிறோம் என்று அறிவித்திருப்பதை நான் வரவேற்கிறேன்” என்று கூறினார். அதன்படி 8 பேர் தி.மு.க. அணியில் இருப்பவர்கள் த.வெ.கவை ஆதரிப்பதன் மூலம்இன்று அக் கட்சி ஆட்சி பொறுப்பை ஏற்று இருக்கிறது.

ஏன் த.வெ.க. ஆதரிக்க வேண்டிய நிலை தி.மு.க. அணி கட்சிகளுக்கு ஏற்பட்டது என்பதைத் தலைவர் அவரது அறிக்கையில், “ஆட்சி அமைக்கும் பெரும்பான்மை யாருக்கும் கிடைக்காத நிலையில், மாற்று யோசனைகளைப் பலரும் சொன்னார்கள். என்னைப் பொறுத்தவரை, தோழமைக் கட்சிகள் எந்த முடிவை எடுத்தாலும் அவர்களின் முடிவை மதித்து ஒருங்கிணைந்து செயல்பட்டு நிலையான ஆட்சி அமைய வேண்டும். இன்னொரு தேர்தலுக்கு வழி வகுத்து விடக்கூடாது என்பதே எனது எண்ணமாக உள்ளது” என்று விளக்கி இருக்கிறார்.

ஆக, த.வெ.க. ஆட்சி என்பது தி.மு.க. அணி கட்சிகளின் மீது கட்டப்பட்ட அரியணையாகும். த.வெ.க. தனித்த பெரும்பான்மையைப் பெற்றுவிடவில்லை. ஆனால், அவர்களுக்கு ஆட்சிக்கு வந்துவிட வேண்டும். முதல்வராகிவிட வேண்டும் என்கிற ஆசை இருந்தது. தமிழ்நாட்டில் ஒரு ‘தலப்பாகட்டி’ சாமியார் இருக்கிறார். அவர், ‘ஆசைப்படு; அடைந்துவிடு’ என்று ஒரு முழக்கத்தை முழங்குபவர். சிவராத்திரியிலே ‘ஆனந்ததாண்டவம்’ ஆடுவார். அவர் சொல்கிறபடி எதுவானாலும் ‘ஆசைப்படு; அடைந்துவிடு’என்று அடைந்து விடமுடியாது. அது அவ்வளவு எளிதானது அல்ல, என்பதை ‘107’ என்று வந்து நின்று விட்டதைப் பார்த்தோம். அப்படியே தி.மு.க. அணி கட்சிகளின் ஆதரவு த.வெ.கவுக்கு தெரிவிக்காவிட்டால் ‘காடாறு மாதம்; நாடு ஆறு௨மாதம்’ என்ற நிலை உருவாகி இருக்கும். அவை வேறுவிதமான பிரச்சினைகளை நாட்டில் உருவாக்கும்.

‘ஆசையே அலைபோலே, நாமெல்லாம் அதன் மேலே’ என்றபடி ஆசையில்லாமல் வாழ்க்கை இல்லை. அந்த ஆசையை நிறைவேற்றிக் கொள்வதற்குரிய அடிப்படை அவசியமாகிறது. புத்தர் ஆசையேதான் துன்பங்களுக்குக் காரணம் என்றார். அது உண்மைதான். ஆசை வாழ்க்கையை உருவாக்கி விடும். மறுபுறம் இன்பமும் துன்பமும் மாறி மாறி வர ஏதுவாக இருக்கும். சந்தர்ப்பங்கள் கிடைக்கிற போது கூட ஆசைகள் நிறைவேறி விடுவதில்லை. ஏன்?

வானம் தூணின்றி நிற்கிறது. அதைத்திருகுர்ஆன் அதன் வார்த்தைகளில் வெளிப்படுத்தி அழகாகச் சொல்கிறது. அதைத்தான் கட்டுரையின் தொடக்கத்தில் எடுத்துக் காட்டி இருக்கின்றோம். அதைவிட என்னால் செய்யமுடியும் எனது ஆசையை நிறைவேற்றி வையுங்கள் என்று ஒருவர் கேட்டால் - அந்த ஆசை நிறைவேறுமா? சந்தர்ப்பங்கள் நிற்காது; நழுவி ஓடிவிடும். அது நிறைவேற்ற முடியாத ஆசையாகிப் போய்விடும்; ஏனெனில் அடிப்படை சரியாக இல்லை. அரசியல் என்பது அன்றன்றாட நியாயங்களைப் பேசக் கூடியது மட்டுமல்ல சிலபோது அதனால் தொலைநோக்குத் திட்டங்களும் எட்டப்போய் விடும். பதவி ஆசை மட்டும் நிறைவேறிவிடுமா? என்ன?

எல்லாவிதஅம்சங்கள் அவர்களுக்கு இருந்தன. அவர்கள் சுதந்திரப் போராட்டவீரர்கள். சென்னை மாகாணத்திற்கு முதல்வராக வரவேண்டும் என்ற ஆசைப்பட்டார்கள். அதற்குரிய சந்தர்ப்பங்கள் வாய்த்தன. எஸ்.சத்தியமூர்த்தி அய்யரும், சி.என். முத்துரங்க முதலியாரும் முதல்வராக வரமுடியவில்லை. இன்னொரு கட்டத்தில் காமராசர் முதல்வராக வேண்டும் என்று விருப்பம் உருவாயிற்று. சட்டமன்றக் கட்சி ஒரு மனதாக அவரைத் தேர்ந்தெடுக்கவில்லை. அப்போதைய தலைவர்கள் தேர்தல் வைத்தார்கள். சட்டமன்றக் கட்சி உறுப்பினர்கள் காமராசரை அதிக வாக்களித்து வெற்றி பெறவைத்தார்கள். அந்த விருப்பம் நிறைவேற்றப்பட்டது.

அறிஞர் அண்ணாவின் மரணத்திற்குப் பிறகு நாவலர் நெடுஞ்செழியனுக்கு முதல்வராகச் சந்தர்ப்பம் கிடைத்தது. அவரோ என்னை ஏக மனதாகத் தேர்ந்தெடுத்தால் ஏற்றுக்கொள்கிறேன் என்று சந்தர்ப்பங்களை நிராகரித்து விட்டார். பிறகுதான் கலைஞர் முதல்வரானார். அடிப்படை இல்லாமல் வெறும் சந்தர்ப்பங்களும் பரப்புரையும் இலக்கை அடைவதில்லை.

ஆனால் ஆசைபடுபவர்களுக்கு. ‘அடைய முடியா பொருளின் மீது ஆசை தீராது அபிமானம் மாறாது’ என்றாகிவிடும். தி.மு.க.வின் அணிசார்ந்த கட்சிகள் அந்த ஆசையை வெளியி லிருந்து நிறைவேற்றி இருக்கின்றன. த.வெ.க. அரியணையில் அமர்ந்துவிட்டது. தி.மு.க. த.வெ.க. ஆட்சிக்கு வர எந்த இடையூறையும் செய்யவில்லை. காலங் கருதி உதவியைத்தான் செய்து இருக்கிறது.

ஆனால் இங்கே த.வெ.கவின் வாய்ப்பு போதுமான எண்ணிக்கை இல்லாததால் எட்டிபோய்விட்டது. அதை த.வெ.க. நெருங்க வேண்டுமானால் தி.மு.க.அணியினர் ஆதரவு தர வேண்டும். அப்படி ஒரு சந்தர்ப்பம், நிலை. அப்போது த.வெ.கவினர் ஆசை எப்படி நிறைவேறும். தி.மு.க. அணியினர் சட்டம், அணியின் பொது எதிரி, மக்கள் ஆகியவற்றைப் பார்த்து ஆதரவு தந்தனர். சந்தர்ப்பங்கள் வாய்த்த போது ஆதரிக்க ஓர் அடிப்படையும் கிடைத்தது. ஆகவே த.வெ.க. ஆட்சியை அமைத்தது. சி.ஜோசப் விஜய் அரியணையை அலங்கரிக்கிறார். இப்போது அதிகார பூர்வமாக வானத்திற்கு நான் தூண் அமைக்கிறேன் என்றும் அவர் சொல்லலாம்.

தேர்தல் பரப்புரையின் போது விஜய் பா.ஜ.க.வினரை எதிர்க்க வில்லை. காங்கிரசை எதிர்க்கவில்லை. மற்ற கட்சியினர் எவரையும் எதிர்த்து அவர் பேசவில்லை. ஆனால், தி.மு.க. ‘தீய சக்தி’ என்று பேசினார். அரசியல் பாரம்பரியமிக்க ஒரு கட்சியைக் கிண்டலடித்துப் பேசினார். தி.மு.க. தீய சக்தியா நல்ல சக்தியா என்பதை இந்நாடு அறியும். ‘தீயதும் நல்லதும் சமமாகா’ என்று திருகுர்ஆன் கூறும். அதுதான் நமக்கு நினைவுக்கு வருகிறது. தி.மு.க. தீய சக்தி இல்லை. நாங்கள் எப்படி உங்களுக்குச் சமமாவோம். ஆனால் தி.மு.க. அணியின் கட்சிகள் த.வெ.கவை ஆதரித்தது என்பது அரசியல்நெருக்கடிகளினால்தான்!

அதனால்தான் கழகத் தலைவர் விளக்கம் அளித்து இருக்கிறார்-. த.வெ.கவுக்கு ஏன் தி.மு.க. அணியை சார்ந்த கட்சிகள் ஆதரவு அளித்தன என்பதற்கு! ஆகவேதான் காலங்கருதி த.வெ.கவுக்கு ஆதரவு தந்து ஒரு வடிவம் கொடுத்து இருக்கிறார்.

கழகத் தலைவரே, நீங்கள் அஞ்சத் தகுந்தது ஒன்றுமில்லை. நாங்கள் உங்களோடு இருக்கின்றோம். ‘களம் உன்னிடம்; காலங் கருதி கருத்தாய் வடிவம் தந்தாய்,

தலைவா, வாழ்க, நீ வாழ்க! வெல்க!!’