கேள்வி:
முதல்வர் விஜய்யின் தனி அதிகாரியாக
(அரசியல்) ரிக்கி ரதன் பண்டிட் வெற்றிவேல்
என்பவர் நியமிக்கப்பட்டு அரசாணை வெளியிடப்
பட்டுள்ளதே ?
பதில்:
அடிப்படையில் அவர் ஒரு ஜோதிடர். முதலில் பா.ஜ.க.வின் அத்வானி, முரளி மனோகர் ஜோஷி ஆகியோர்க்கும் அவர்தம் குடும்பத்தார்க்கும் ஆஸ்தான ஜோதிடராக இருந்தவர். பின்னர் ஜெயலலிதா முதல்வராக இருந்தபோது, அவருக்கு
‘போயஸ் மாளிகை ஆஸ்தான ஜோதிடராக ‘
இருந்து பின்னர் வெளியேற்றப்பட்டவர்.
அவர்தான் இப்போது அண்மைக் காலமாக விஜய்க்கு ஜோதிட ஆலோசகராக இருந்து, வழிநடத்தி வருபவர்.
வெற்றிவேல் என்ற தனது பெயரை, வடபுலத்திற்கு ஜோதிட வேலை பார்க்கச் சென்றதும், ரிக்கி ரதன் பண்டிட் என்று மாற்றிக்கொண்டவர் அவர்.
அவர் இப்போது தமிழ்நாடு அரசில், முதல்வரின்
அரசியல் ஜோதிடராக நியமனம் பெற்றுள்ளார்.
இந்த நியமனம், அறிவியல் மற்றும் பகுத்தறிவுக்கு முற்றிலும் மாறுபட்டது. விஞ்ஞான மனப்பான்மையை
( Scientific Temper) ஊக்குவிக்கும் இந்திய அரசமைப்புச் சட்டத்தின் நோக்கத்திற்கு எதிரானது.
ஜோதிடம், பஞ்சாங்கம், ராகு காலம் - எம கண்டம், அஷ்டமி, நவமி என்பதெல்லாம் தனிப்பட்ட விருப்புரிமையைச் சார்ந்தது.
‘நான் ஒன்றும் மன்னர் பரம்பரையைச் சேர்ந்தவன் இல்லை‘ - என்று பதவி ஏற்ற அன்றே பிரகடனப் படுத்திய முதல்வர் விஜய், மன்னர்கள் காலத்தில் இருந்துவந்த அரண்மனை ஜோதிடர் ( ராஜ குரு ) என்ற உதிர்ந்து, உலர்ந்து போன பழைய மூடப் பழக்க வழக்கத்திற்கு அரசு ரீதியாக அங்கீகாரம் வழங்கியுள்ளது, பல்வேறு ஹேஷ்யங்களுக்கும், பிரச்சினைகளுக்கும் வித்திட்டுள்ளது.
ஆரோக்கியமான அரசியல் முன்மாதிரிகளை உருவாக்கிடப் புறப்பட்டு இருக்கிறேன் என்று சொன்ன முதல்வர் விஜய், ரிக்கி ரதன் பண்டிட் வெற்றிவேல் என்ற அனைவரும் அறிந்த ஜோதிடருக்கு, அரசு நியமனம் வழங்கி, கண்டனத்திற்குரிய மிகப் பெரிய முரண்பாட்டை ஏற்படுத்திவிட்டார் !
இதற்கிடையே, ஜோதிடர் ரிக்கி ரதன் பண்டிட்டை விஜய் அரசின் தனி அதிகாரியாக நியமனம் செய்த உத்தரவுக்கு எதிராகப் பல முனைகளிலும் கண்டனம் எழுந்ததை அடுத்து, அந்த உத்தரவு திரும்பப் பெறப்பட்டுள்ளதாகத் தெரிகிறது.
பதவி ஏற்ற மூன்றாம் நாளே இப்படி ஆஸ்தான ஜோதிடரை, அரசின் பணிக்கு அவசரம் அவசரமாக நியமனம் செய்ததேன்? எதிர்ப்புகள் எழுந்ததும், உடனே ஒரே நாளில் நியமன உத்தரவைத் திரும்பப் பெறுவதேன்?
இதற்குப் பெயர்தான், முதல்வர் விஜய் மொழியில்,
‘குதிரை வேகமோ’?