உ
லகமே உற்றுநோக்கிய தமிழ்நாடு சட்டமன்றப் பொதுத்தேர்தல் முடிவுகள் வந்தேவிட்டது.
நினைத்தவை நிழல்களாக, நிஜங்களெல்லாம் கனவுகளாக, கானல் நீரான கதைகள் நாளும் நடந்தேறி வருகிறது.
“ஒருவரின் முதுகிற்குப் பின்னால் செய்ய வேண்டிய செயல் அவர்களை தட்டிக்கொடுப்பதே !” என்றான் ஆங்கில அறிஞன் ஆஸ்கார் ஒயில்ட்.
ஆனால், காட்டிக் கொடுப்பதையும், கழுத்தறுப்பதையும், நன்றி மறப்பதையும் முதுகில் குத்துவதையும்
தங்கள் குலக்கலாச்சாரமாய் கொண்ட ஒரு துரோகப் பேரியக்கம் ஒரு புறம்.
1967 ல் விருகம்பாக்கம் மாநாட்டில் இசைமுரசு அனிபா, “ பொய்யில் புலவரடி கண்ணம்மா!
இவர் பொதுத்தேர்தல் திருடரடி கண்ணம்மா! “ என்று பாடியதற்கு ஏற்ப வாக்குப் பதிவு எந்திரத்தில் தங்கள் தந்திரப் போக்கை காட்டிய பாசிச பா.ஜ.க. மற்றொரு புறம்.
தேர்தல் ஜனநாயகத்தில் ஒரு மக்களுக்கான இயக்கம் வெற்றி - தோல்வி என வேறு, வேறு பரிமாணங்களில் பயணிப்பது புதிதல்ல.
எடுத்துக்காட்டுகள் ஏராளம், ஏராளமாக உள்ளது.
ஆனால், தன்னை தமிழர் நல்வாழ்வு, உயர்வு, மேன்மை, வளர்ச்சி, வெற்றி, அடுத்தடுத்த தலைமுறைக்குக் கொண்டுசெல்லும் தொலைநோக்குப் பார்வையென தகவமைத்துக் கொண்ட தலைவனின் இயக்கம் யாருமே எதிர்பாராத வண்ணம் வெற்றி வாய்ப்பினை சொற்ப விகிதாச்சார அளவில் இழந்து நிற்பதுதான் வேதனையிலும் வேதனை!
அறிஞர் அண்ணா தான் எழுதினார், “ வெள்ளையனே வெளியேறு! அந்நியப் பொருட்களை பகிஷ்கரிப்போம்!
BE INDIAN! BUY INDIAN! என்று எழுதியும், நாடு முழுவதும் பயணித்துப் பேசிவரும், காந்தியும், நேருவும் மற்ற காங்கிரஸ் தலைவர்களும் அதே வெள்ளைக்காரன் கண்டுபிடித்த பவுண்டன் பேனாவினால் எழுதி, அவன் அறிமுகப்படுத்திய ரயிலில் வலம் வந்தல்லவா வெள்ளையனை விரட்டப்பார்க்கிறார்கள்”. என்று.
அதைப்போலத்தான் திராவிடப் பேரரசர் தளபதியவர்
களின் நல்லாட்சியில் தந்த விடியல் பயணப் பேருந்துகளில் பயணித்து, விலையில்லா மடிக்கணினியில் மாய்மாலப் பொய்ச்செய்திகளைப் பரப்பி, தமிழினம் வீழ்ந்து போவதற்கென விபரீத முடிவை எடுத்தனர். விட்டில் பூச்சிகளாய் விளக்கொளியில் விழுந்த தமிழர்கள்.
நடைபெற்றது யாருக்கான தேர்தல்? எதற்கான தேர்தல்? என்றெல்லாம் சிந்திக்காமல் சிதைந்துபோனதே தமிழகத்தின் எதிர்காலம்!
இந்த மக்களை நம்பி, மனைவி - பிள்ளை, உடல்நலம், உறவுகள் மறந்து, மாநிலம் முழுவதும் சுற்றிவந்த ஓய்வறியா உழைப்பாளியின் உழைப்பு உதாசீனப் பட்டதை உண்மைத் தமிழரின் மனம் ஒப்ப மறுக்கிறது.
“நன்றி கெட்ட உலகமடா ராமா! “ என்று ரத்தக்கண்ணீரில் நடிகவேள் ராதா சாடிடுவார். அதுதானே இன்று நடந்தேறியது.
தலைவர் கலைஞர் 1990 ல் கலைவாணர் அரங்கில் நடைபெற்ற ஐம்பெரும் விழா கவியரங்கில் ஆற்றிய தலைமைக் கவிதையில்,( அப்போது தலைவர் கலைஞர் அவர்கள் தமிழ்நாட்டின் முதலமைச்சர் )
“ஆனது ஆகட்டுமே!இந்த
ஆட்சிதான் போகட்டுமே!
மகுடமின்றி வாழ முடியா
மனிதர்களா நாம்?
சிசுவாகப் பிறக்கும் போதே,
சிம்மாசனத்துடனா
பிறந்தோம்?
சீதை வில்லுடன் பிறந்ததுபோல!
கொற்றக்குடையா? கொள்கையா? எதுவேண்டு
மெனில்,
கொள்கையை விற்றுப் பிழைக்க,
வேறுநபர் பாரென்போம்! “ என்று பாடினார்.
இப்படியெல்லாம் தைரியமாக ஆட்சிக்கே அறைகூவல் விடுத்த கம்பீரத்தலைவர் கலைஞர் அவர்களின் காலடிச்சுவட்டில் கழகத்தை வழிநடத்தும் திராவிடப் பெருவேந்தர் தளபதியவர்களுக்கும் ஆட்சியதிகாரம் என்பது பெரிதல்ல.
எதிர்ப்பிலே வளர்ந்த தலைவர்!
எமர்ஜென்சியில் புடமிட்ட தலைவர்!
அவரைப்போலவே தி.மு.கழகத்தின் தொண்டர்கள், தோழர்கள், தளகர்த்தர்கள் எதையும் தாங்கும் இதயத்துடன்தான் பயணிக்கிறோம்.
ஆனால் அதேவேளையில் அவர் பார்த்து, பார்த்து வடிவமைத்த தொகுதியில் அவர் வெற்றி வாய்ப்பினை இழந்ததைத்தான் உலகத்தமிழரெல்லாம் சொல்லிச் சொல்லி, மனம் பதைத்தனர்.
முகலாய சாம்ராஜ்யத்தின் சக்கரவர்த்தி ஷாஜகான் 22 ஆயிரம் கட்டிடத் தொழிலாளர்களைக் கொண்டு, 20 ஆண்டுகள் தனது சிந்தையணு ஒவ்வொன்றிலும் ஊறிப்போன தாஜ்மகாலை உருவாக்கியது போலல்லவா? கொளத்தூர் தொகுதி இந்தியாவிலேயே அனைத்து நவீன வசதிகளுடன் கட்டமைக்கப்பட்ட மாடல் தொகுதியாக ஜொலித்தது.
சாலை வசதிகளென்ன!
பாலப் பணிகளென்ன!
பூங்காக்கள், நடைபாதை வசதிகளென்ன!
மருத்துவ, போக்குவரத்து, குளிரூட்டப்பட்ட பயணியர் நிறுத்தங்கள்தானென்ன!
எதைக் கண்டு, அல்லது எதில் மயங்கி எங்கள் திராவிட மாடல் முதலமைச்சருக்கு இந்தப் பரிசை கொளத்தூர் வாக்காளர்கள் தந்தனர்?
கம்ப ராமாயணத்தில் இராமன் வனவாசம் போன பொழுது, மக்கள் அழுதனர், மாடுகளும் அதன் கன்றுகளும் அழுதன.
மாடத்திலிருந்த பூனையும் அழுததென்பார் கம்பர்.
அதுகதை, கம்பனின் கவிதை. கற்பனையின் பெரு உச்சம்.
ஆனால் நமது தலைவர் தளபதியவர்கள் வெற்றி வாய்ப்பினை இழந்த செய்தியறிந்து, உலகத் தமிழர்கள் வருந்தினர், உண்மைத் தமிழர்கள் கலங்கினர். நன்றி மறவாத் தமிழர்கள் அழுதனர்.
எதிர்மறை எண்ணம் கொண்டோரும் ஏற்க மறுத்தனர்.
இவர்களுடன், “ மரணம் மாவீரனுக்கு மலர்ச்செண்டு போன்றது!
மங்கையின் இதழைவிடச் சுவையானது! ‘ எனும் தலைவர் கலைஞரின் வீரவரிகளை சுவாசித்த தொண்டனும் இந்த முடிவை ஏற்கமுடியாமல் இன்னும், இன்னும் விழிகளைக் குளமாக்கியபடிதான் இருக்கிறார்கள்.
“நாளும் அழுது தீர்ந்ததாலே, கண்கள் ஏழையானதே! “ என்றொரு திரைப்பாடலுண்டு.
அதுதான், அதுதான் எங்கள் நிலை.
பால்குடித்த மார்பையறுப்பதோ! என்றுதலைவர் கலைஞர் அவர்கள் 2006 சட்டமன்றத் தேர்தலில் கழகம் வெற்றி பெற்றிருந்தாலும், என்னைப் போன்ற சிலரின் தோல்வியின் ரணங்களுக்கு மருந்திட முரசொலியில் முதல்வராய் அமர்ந்து கவிதை தீட்டினார்.
யாதும் ஊரே! யாவரும் கேளிர் என்று சொன்ன கனியன் பூங்குன்றனார் கூட பூங்குன்றம் என்ற தனது ஊரினை தனது பெயரோடு சேர்த்துக் கொண்டார் என்று சொல்லுவார்கள்.
அதுபோல இந்தியாவின் சக்தி வாய்ந்த தலைவரென்றாலும், நானிலம் போற்றும் மாநில முதல்வரென்றாலும், மாதத்திற்கு இருமுறையேனும் மறக்காமல் தனது தொகுதியான கொளத்தூருக்கு வந்திடுவாரே நமது தலைவர்.
( அறிவாலயம் சென்று பார்க்கும் அவகாசம் இல்லையென்றால், தலைவர் கொளத்தூர் செல்லும் புளியந்தோப்பு, பின்னிமில் சாலையோரம் நின்று ஒரு பதிவை நானெல்லாம் பலமுறை பதிந்ததுண்டு )
எல்லாவற்றையும் கடந்து செல்லும் ஆறுதலை, தைரியத்தை, பக்குவத்தை, நம்பிக்கையை நமது தலைவரே தருகிறார். அறிவாலயத்தில்! ஆழ்வார்பேட்டை இல்லத்தில்! கழகத்தோழர்களின் கரங்களை இறுகப்பற்றி.
அவருக்கு மிகவும் பிடித்த தலைவர் கலைஞர் அவர்களின் நம்பிக்கையை நாணேற்றும் வரிகள், “ கட்டிய நாய்களல்ல நாம்.
எட்டியமட்டும் பாய்வதற்கு! “
ஆம். கவலையை மறப்போம்!
களமாடுவோம்! வளமார் தமிழகத்தை வடித்தெடுத்த சிற்பிகள் தந்தை பெரியார், பேரறிஞர் அண்ணா, தலைவர் கலைஞர், திராவிடப் பெருவேந்தர் தளபதியவர்களின் படைவரிசையில் களமாடப் பெரும் அறிவுசார் சட்டமன்றப் படையுடன் புறப்பட்ட ஸ்திரமான,உரமான, நமக்கு வரமான மாண்புமிகு எதிர்க்கட்சித் தலைவர் உதயநிதிஸ்டாலின் அவர்களின் தலைமையில் அவையில் என்றும் போல் மக்கள் நலனுக்காய் குரல் கொடுப்போம்!
அரியாசனம் இல்லாமல் போனாலும், நிலையான அண்ணாவின் அறிவாலயம் இருக்கிறது.
அங்கமர்ந்து, ஆளும் மாய வர்க்கத்தின், பயாஸ்கோப் பரிவாரங்களின் அத்துமீறல்களுக்கு அணை போட்டுத் தடுத்திடுவார் நமது திராவிடப் பேரரசர் தளபதியவர்கள்.
அதற்கும் துணைநிற்கும் தூயவர், எதிர்க்கட்சித் தலைவர் உதயநிதி ஸ்டாலின் அவர்களுக்கு வாழ்த்துக்கள் தெரிவிப்போம்!
தி.மு.கழகம் எதிர்ப்பில் பூத்த நெருப்பு மலர்.
பாசாணத்தில் பூத்த பூ என்பதை மீண்டும், மீண்டும் ஞாலம் உணர, உரைத்திடுவோம்! உழைத்திடுவோம்!
ஆம்,
தி.மு.க...... , வாலடித்து மேலெழும் வரிப்புலி!
இது மன்னாதி, மன்னரையெல்லாம்பார்த்த, தி.மு.க.!
அந்த மதுரைவீரனையும் வளர்த்து, எதிர்த்த தி.மு.க.!
வாழ்க தலைவர் தளபதியவர்கள்!
வளர்க தி.மு.க.!
வெல்க உதயநிதியவர்கள்!