இம்பால், மே 16 –
மணிப்பூரில் கிறிஸ்தவ பாதிரியார்கள் 3 பேர் சுட்டுக் கொல்லப்பட்டதற்கு கண்டனம் தெரிவித்து முழு அடைப்பு போராட்டம் நடைபெற்றது.
மணிப்பூரில் கடந்த 2023 ம் ஆண்டு மெய்தி, குக்கி சமூகத்தினரிடையே ஏற்பட்ட இன மோதல் தற்போது வரை நீடித்து வருகிறது. இந்த நிலையில் கடந்த புதன்கிழமை காங்போக்பி மாவட்டத்தில் ஆயுதமேந்திய கும்பல் நடத்திய துப்பாக்கிச் சூட்டில் கிறிஸ்தவ பாதிரியார்கள் மூன்று பேர் பலியாகினர். 4 பேர் காயமடைந்தனா்.
இந்தத் தாக்குதலைக் கண்டித்தும், வன்முறை சம்பவங்களை தடுக்க வலியுறுத்தியும் மணிப்பூரில் உள்ள 3 மாவட்டங்களில் ஒருநாள் முழு அடைப்பு போராட்டம் நடைபெற்றது. குக்கி பழங்குடியினத்தின் குக்கி இன்பி என்ற அமைப்பு போராட்டத்துக்கு அழைப்பு விடுத் திருந்தது.
குக்கி மற்றும் நாகா பழங்குடியின மக்கள் அதிகம் வசிக்கும் காங்போக்பி, சுராசந்த்பூர் மற்றும் சண்டேல் ஆகிய மாவட்டங்களில் முழு அடைப்பு போராட்டம் நடைபெற்றது.
இதன் காரணமாக கடைகள், சந்தைகள், வணிக நிறுவனங்கள் அடைக்கப்பட்டிருந்தன. பள்ளிகள், கல்லூரிகள் உள்ளிட்ட கல்வி நிறுவனங்கள் மூடப்பட்டிருந்தன. போக்குவரத்தின்றி சாலைகள் வெறிச்சோடி காணப்பட்டன.
புதுடெல்லி, மே 16 –
பா.ஜ.க. ஆளும் டெல்லியில் ஓடும் பேருந்தில் பெண் ஒருவர் கூட்டுப் பாலியல் வன்கொடுமை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.
டெல்லி பிதம்புரா குடிசைப் பகுதியைச் சேர்ந்த பெண் ஒருவர், மங்கோல்புரியில் உள்ள ஒரு தொழிற்சாலையில் வேலை செய்து வருகிறார். கடந்த 11ம் தேதி இரவு, அவர் வேலையை முடித்துவிட்டு வீட்டிற்கு சென்று கொண்டிருந்தார். அப்போது, சரஸ்வதி விஹார் பகுதியில் உள்ள பேருந்து நிறுத்தத்தில் பேருந்து நின்றுள்ளது.
அப்போது அந்த பெண்ணை வலுக்கட்டாயமாக பேருந்துக்குள் இழுத்து சென்று பாலியல் வன்கொடுமைக்கு உள்ளாக்கப்பட்டார். பாதிக்கப்பட்ட பெண்ணுக்கு திருமணமாகி மூன்று குழந்தைகள் உள்ளது குறிப்பிடத்தக்கது.
இந்தச் சம்பவம் குறித்து பாதிக்கப்பட்ட பெண் புகார் தெரிவித்தையடுத்து, குற்றம் சாட்டப்பட்ட ஓட்டுநர் மற்றும் நடத்துநர் ஆகியோரை போலீசார் கைது செய்து விசாரணை செய்து வருகின்றனர்.
பா.ஜ.க. ஆளும் டெல்லியில் நாளுக்கு நாள் குற்ற சம்பவங்கள் அதிகரித்து வருவதாக சமூக ஆர்வலர்கள் குற்றம் சாட்டியுள்ளனர்.