நாகை, மே 17–
மனிதநேய மக்கள் கட்சியின் தலைவர் பேராசிரியர் எம்.எச்.ஜவாஹிருல்லா விடுத்துள்ள அறிக்கை வருமாறு:–
தமிழ்நாட்டின் உணவுத் தேவையில் பெரும்பகுதியை பூர்த்தி செய்து வரும் காவிரி டெல்டா மாவட்டங்களின் விவசாயம் முழுமையாக காவிரி நீரை சார்ந்துள்ளது. நாகப்பட்டினம், தஞ்சாவூர், திருவாரூர்,, மயிலாடுதுறை, கடலூர் உள்ளிட்ட டெல்டா மாவட்டங்களின் விவசாய உற்பத்திமட்டுமின்றி, சென்னை உள்ளிட்ட 19 மாவட்ட ங்களின் குடிநீர் தேவையும் காவிரி நீரின் மூலமே பூர்த்தி செய்யப்படுகிறது. தற்போது கூட வீராணம் வழியாக சென்னை குடிநீருக்காக தண்ணீர் அனுப்பப்பட்டு வருகிறது.
டெல்டா மாவட்டங்களில் மட்டும் சுமார் 36 ஆயிரம் கிலோமீட்டர் தூரத்திற்குஆறுகள், வாய்க்கால்கள் மற்றும் வடிகால்கள் உள்ளன. கடந்த ஆண்டுகளில் பல கோடி ரூபாய் மதிப்பில் தூர் வாரும் பணிகள் மேற்கொள்ளப்பட்டன.
மேட்டூர் அணை
தண்ணீர் திறப்பு!
மேட்டூர் அணையில் இருந்து ஜூன் மாதம் பாசனத்திற்காக தண்ணீர் திறக்கப்படும் முன்பாகவே ஏ, பி, சி, டி வாய்க்கால்கள் முழுமையாக தூர் வாரப்பட வேண்டும். தண்ணீர் திறந்த பிறகு கண்துடைப்பாக தூர் வாரும் பணிகளை மேற்கொள்ள கூடாது. மேலும், வாய்க்கால்கள் மற்றும் வடிகால்களை வருவாய்த் துறை பதிவுகளின் அடிப்படையில் சர்வே செய்து பின்னரே பணிகள் தொடங்கப்பட வேண்டும்.
தூர் வாரப்படும் மண்ணை வாய்க்கால் கரைகளிலேயே குவிப்பதால், மழைக்காலங்களில் மீண்டும் மண் கரைந்து வாய்க்கால்களை அடைத்து விடுகிறது. இதன் காரணமாக தண்ணீர் வடிகால் பாதிக்கப்பட்டு விளைநிலங்களில் நீர் தேங்கி பயிர்கள் சேதமடைகின்றன. எனவே, தூர் வாரும் பணிகள் அறிவியல் முறையிலும் தரமான முறையிலும் மேற்கொள்ளப்பட வேண்டும்.
தூர் வாரும் பணிகளை தனியார் ஒப்பந்ததாரர்களிடம் ஒப்படைப்பதை தவிர்த்து, வேளாண் பொறியியல் துறையின் மூலம் நேரடியாக மேற்கொண்டால் மட்டுமே பணிகளில் தரம் உறுதி செய்யப்படும். எந்தெந்த இடங்களில் முன்னுரிமை அடிப்படையில் தூர் வார வேண்டும் என்பதையும் அந்தந்த பகுதி விவசாயிகள் மற்றும் பாசனதாரர்களுடன் கலந்தாலோசித்துதீர்மானிக்க வேண்டும்.
விவசாயிகளின்
ஒப்புதலின்றி பணிகள்!
அண்மையில் தூர் வாரும் பணிகளுக்காக நிதி ஒதுக்கப்பட்டு பணிகள் தொடங்கப்பட்டாலும், விவசாயிகளின் ஒப்புதல் இன்றி ஒப்பந்த தாரர்களின் விருப்பப்படி பணிகள் நடைபெற்றதாக குற்றச்சாட்டுகள் எழுந்துள்ளன. இத்தகைய நடைமுறையை புதிய அரசு மாற்ற வேண்டும்.
பிரதான ஆறுகளில் பல ஆண்டுகளாக மணல் திட்டுகள் அகற்றப்படாமல் இருப்பதால் வெள்ள அபாயம் அதிகரித்துள்ளது. வெள்ளத்தால் பாதிக்கப்படும் பகுதிகளை அடையாளம் கண்டு முன்கூட்டியே நடவடிக்கை எடுக்க வேண்டும்.
காவிரி மேலாண்மை ஆணையம் கர்நாடகத்திற்கு தண்ணீர் திறக்க உத்தரவிட்டபோதும், உரிய அளவு தண்ணீர் திறக்கப்
படாத சூழலில், இந்த ஆண்டுக்கான தூர் வாரும் பணிகளுக்கு உடனடியாக போதிய நிதி ஒதுக்கி நாகப்பட்டினம் உள்ளிட்ட கடைமடை வரை தண்ணீர் செல்வதை தமிழக அரசு உறுதிசெய்ய வேண்டும்.
மேலும், டெல்டாவிவசாயிகளின் பிரச்சினைகள் குறித்து மூன்று மாதங்களுக்கு ஒருமுறை அரசு நேரடியாக விவசாய சங்கங்களுடன் ஆலோசனை நடத்தி தீர்வு காண வேண்டும் என வலியுறுத்துகிறேன்.
இவ்வாறு அவர் அறிக்கையில் வலியுறுத்தியுள்ளார்.