கழகத் தலைவர் மு.க.ஸ்டாலின் அவர்கள்
தலைமையில் 14.5.2026 அன்று சென்னை, அண்ணா அறிவாலயம், கலைஞர் அரங்கில் நடைபெற்ற
“தி.மு.க. மாவட்டக் கழகச் செயலாளர்கள் கூட்டத்தில்” அறிவித்ததற்கிணங்க;
நடந்து முடிந்த சட்டமன்றத் தேர்தல் முடிவுகள் குறித்து
“கள ஆய்வு”
செய்வதற்காக
38 பேர் கொண்ட குழு அமைக்கப்படுகிறது.
இக்குழுவானது, கீழே குறிப்பிட்டுள்ள மாவட்டத்திற்குட்பட்ட தொகுதி வாரியாக சுற்றுப்பயணம் மேற்கொண்டு மாவட்டச் செயலாளர்கள் – வேட்பாளர்கள் – தொகுதிப் பார்வையாளர்கள் – நிர்வாகிகள் மற்றும் கழகத் தொண்டர்களை நேரடியாகச் சந்தித்து கருத்துகளையும் – அவர்களின் பரிந்துரைகளையும் பெற்று
கள ஆய்வு அறிக்கையை ஜூன் 5ஆம் தேதிக்குள் கழகத் தலைவர் அவர்களிடம் சமர்ப்பிக்கும்.
கள ஆய்வுக்குழுவினரின் வருகையின் போது மாவட்டக் கழகச் செயலாளர்கள் தேவையான ஏற்பாடுகளையும் ஒத்துழைப்பையும் செய்து தர வேண்டும். தொகுதியின் விவரம், வாக்குச்சாவடிகளில் பதிவான வாக்குகள் விவரம், அதிக வாக்குகள் பெற்ற பகுதி, குறைவான வாக்குகள் பெற்ற பகுதி உள்ளிட்ட அனைத்து தரவுகளையும் மாவட்டச் செயலாளர்கள் தயாராக வைத்திருந்து குழுவினருக்கு அளிக்க வேண்டும்.
ஆய்வின் போது குழுவினர், மாவட்டச் செயலாளர் – தொகுதிப் பார்வையாளர் – வேட்பாளர் – தொகுதிக்குட்பட்ட செயற்குழு – பொதுக்குழு உறுப்பினர்களைத் தனித்தனியாக சந்தித்துப பேசுவர். அதோடு மாநகர, ஒன்றிய, நகர , பகுதி , பேரூர் செயலாளர்களையும் தனித் தனியே சந்திப்பர். இச்சந்திப்பின் போது மாவட்டச் செயலாளர், தொகுதிப் பார்வையாளர், வேட்பாளர் உள்ளிட்டவர்கள் உடன் இருக்கக் கூடாது.
அதேபோல, ஒவ்வொரு மாநகர – ஒன்றிய – நகர – பகுதி – பேரூர்க் கழக நிர்வாகிகள் அனைவரையும் தனித்தனி குழுக்களாகச் சந்தித்து கருத்துக் கேட்க உள்ளனர். அப்பொழுது மாநகர – ஒன்றிய – நகர – பகுதி – பேரூர் கழகச் செயலாளர்கள் உடன் இருக்கக் கூடாது.
ஆய்வுக்குழுவின் வருகை தொடர்பாக கழக நிர்வாகிகளுக்கு முன் கூட்டியே தகவல் தெரிவிக்கப்பட்டு, அதற்குரிய முறையான ஏற்பாடுகளைச் செய்ய வேண்டும். காலை முதல் மதியத்திற்குள் இந்த சந்திப்பினை நிறைவு செய்து விட்டு மதியத்திற்கு மேல் சார்பு அணிகளைச் சேர்ந்த மாநில - மாவட்ட நிர்வாகிகளை தனித்தனி குழுக்களாக சந்திக்க வேண்டும். அதே போல கிளைச் செயலாளர்கள், வார்டு செயலாளர்கள் மற்றும் BLA--–2 உள்ளிட்ட அனைத்து நிர்வாகிகளையும் குழுக்களாக சந்தித்து ஆய்வு செய்ய உள்ளனர்.
ஆய்வுக் கூட்டம் நடைபெறும் நாளில் கூட்டத்தில் கலந்து கொள்ளும் கழக நிர்வாகிகளின் வருகைப் பதிவேடு முறையாக பதிவு செய்ய வேண்டும். மினிட் புத்தகத்திலும் பதிவு செய்து கையொப்பம் பெற வேண்டும்.