சென்னை, மே 19 –
சட்டசபை தேர்தல் முடிவுகள் குறித்து ஆய்வு செய்ய அமைக்கப்பட்ட திமுக கள ஆய்வு குழு நேற்று முதல் தமிழகம் முழுவதும் சுற்றுப் பயணம் மேற்கொண்டது. கட்சியினரை தனித்தனியாகச் சந்தித்து தேர்தல் முடிவு தொடர்பாக கருத்துகளை கேட்டனர்.
தமிழக சட்டசபை தேர்தல் முடிவுகள் குறித்து கள ஆய்வு செய்ய 36 பேர் கொண்ட குழுவை தி.மு.க. அமைத்துள்ளது. இக்குழுவினருடன் தி.மு.க. தலைவர் மு.க.ஸ்டாலின் அவர்கள் ஆலோசனை நடத்தியிருந்தார்.
அப்போது அவர், தனிப்பட்ட விருப்பு வெறுப்பின்றி, கட்சிக்காரர்கள் சொல்லும் உண்மையை அப்படியே வந்து என்னிடம் சொல்வது மட்டுமே உங்கள் வேலை. நீங்கள் யாரையும் காப்பாற்றவும் முயற்சி செய்ய வேண்டாம். யாரையும் பழிவாங்கவும் எண்ணக் கூடாது. தி.மு.க.வினரை மனதுவிட்டுப் பேச அனுமதியுங்கள். அவர்களின் குறைகளை, தேர்தல் முடிவு களுக்கான காரணங்களை அவர்கள் கொட்டித் தீர்க்கட்டும். தலைவரான என் மேலேயே குறை சொன்னாலும் பரவாயில்லை. அதைக் குறித்து வைத்து உங்களது அறிக்கையில் வழங்குங்கள்.
நிர்வாகிகளின் உணர்வு என்ன? அவர்கள் உண்மையில் என்ன நினைக் கிறார்கள்? அது மட்டும்தான் எனக்குத் தேவை” என்று அறிவித்திருந்தார்.
இந்த நிலையில் சட்டசபை தேர்தல் முடிவுகள் குறித்து ஆய்வு செய்ய அமைக்கப்பட்ட ஆய்வு குழு நேற்று முதல் தமிழகம் முழு வதும் உள்ள 234 சட்டமன்ற தொகுதிகளில் சுற்றுப்பயணம் செய்தது. சென்னையை பொறுத்தவரை திருவொற்றியூர், மாதவரம், ஆர்.கே.நகர், பெரம்பூர், ராயபுரம், கும்மிடிப் பூண்டி, பொன்னேரி, ஆவடி, பூவிருந்தவல்லி, திருத்தணி, திருவள்ளூர் ஆகிய சட்டமன்றத் தொகுதி களுக்கு எம்.எம்.அப்துல்லா, ரேகா பிரியதர்ஷினி ஆய்வு செய்தனர்.
எழும்பூர், கொளத்தூர், அம்பத்தூர், துறை முகம், திரு.வி.க.நகர், வில்லிவாக்கம், சைதாப்பேட்டை, சோழிங்கநல்லூர், மதுரவாயல், விருகம்பாக்கம், வேளச்சேரி, அண்ணாநகர், ஆயிரம்விளக்கு, சேப்பாக்கம், -திருவல்லிக்கேணி தொகுதிகளுக்கு எஸ்.கே.பி. கருணா, கே.ஈ.பிரகாஷ் எம்.பி. சென்றனர்.
உத்திரமேரூர், காஞ்சிபுரம், செய்யூர்,
மதுராந்தகம், ஆலந்தூர், செங்கல்பட்டு, தாம்பரம், திருப்பெரும்புதூர், திருப்போரூர், பல்லாவரம், தியாகராயர் நகர், மயிலாப்பூர் தொகுதிகளுக்கு ஹெலன் டேவிட்சன், கே.இளமகிழன் கள ஆய்வு நடத்த உள்ளனர்.
இதேபோல் தமிழ்நாடு முழுவதும் குழு சென்று நேற்று ஆய்வு மேற்கொண்டனர். இந்த குழு மாவட்டச் செயலாளர், தொகுதி பார்வையாளர், வேட்பாளர்கள், தொகுதிக்கு உட்பட்ட செயற்குழு, பொதுக்குழு உறுப்பினர்களை தனித்தனியாக சந்தித்து பேசினர். அதோடு மாநகர, ஒன்றிய, நகர, பகுதி, பேரூர் செயலாளர்களையும் தனித்தனியே சந்தித்து அவர்களின் கருத்துக்களை கேட்டனர்.
இச்சந்திப்பின்போது மாவட்டச் செயலாளர்கள், தொகுதி பார்வையாளர்கள், வேட்பாளர்கள் உள்ளிட்டவர்கள் உடன் இருக்கக்கூடாது என்று அறிவுறுத்தப்பட்டுள்ளது. கள ஆய்வு செய்யும் குழு ஜூன் 5ம் தேதிக்குள் அறிக்கையை சமர்ப்ப்பிக்க தி.மு.க. தலைவர் மு.க.ஸ்டாலின் அவர்கள் உத்தரவிட்டுள்ளார். கள ஆய்வு குழு தரும் அறிக்கையின் அடிப்படையில் தி.மு.க.வில் நடவடிக்கைகளை மேற்கொள்ளப்படும் என்பது குறிப்பிடத்தக்கது.
திருவண்ணாமலை சட்டமன்றத் தொகுதியில், முன்னாள் பொதுப்பணித்துறை அமைச்சர் எ.வ.வேலு கிராமம், கிராமமாகச் சென்று பொதுமக்களுக்கு நன்றி தெரிவித்து உரையாற்றினார். உடன் இரா.ஸ்ரீதரன், எஸ்.பன்னீர்செல்வம், பெ.கோவிந்தன், ப.கார்த்திவேல்மாறன், பிரியா விஜயரங்கன், மெய்யூர் சந்திரன், த.ரமணன், தொ.மு.ச. க.சௌந்தரராசன் உட்பட பலர் உள்ளனர்.