புதுடெல்லி, மே 20–
சாலைகளில் சுற்றித்திரியும் தெருநாய்கள் பொதுமக்களுக்கு பல்வேறு அச்சுறுத்தல்களை ஏற்படுத்தி வருகிறது. இதுதொடர்பாக தொடரப்பட்ட வழக்கை விசாரித்த உச்சநீதிமன்றம், நாய்களை பிடித்து அதற்கென உருவாக்கப்பட்டுள்ள காப்பகங்களில் அடைக்க வேண்டும் என்று ஒன்றிய மற்றும் மாநில அரசுகளுக்கு உத்தரவிட்டது. இதனை எதிர்த்து தொடரப்பட்ட வழக்கை விசாரித்த உச்சநீதிமன்றம், இன்று தீர்ப்பு வழங்கியது. அதில், சாலைகளில் சுற்றித்திரியும் தெருநாய்களை பிடித்து அகற்ற வேண்டும் என்ற உத்தரவுக்கு தடை விதிக்க முடியாது என்று உச்சநீதிமன்றம் திட்டவட்ட மாக தெரிவித்துள்ளது. விலங்குகள் நலவாரிய விதிமுறைகள் உரிய முறையில் செயல்படுத்தப்பட வில்லை என்று உச்சநீதிமன்றம் குற்றஞ்சாட்டியுள்ளது. கருத்தடை மற்றும் தடுப்பூசி விதிமுறைகளை முறையாக ஒன்றிய, மாநில அரசுகள் செயல்படுத்த வில்லை என்று கண்டனம் தெரிவிக்கப்பட்டது.
இதன் காரணமாகவே நாய்களால் தற்போது பிரச்சினைகள் அதிகரித்துள்ளன. தெருநாய்களால் பொதுமக்களுக்கு ஆபத்து அதிகமாகியுள்ளது. நாய்கள் கடிக்கும் புகார்கள் அதிகரித்துள்ளன. நாய் கடிகளால் சிறுவர், சிறுமியர் அதிகமாக பாதிக்கப்பட்டுள்ளனர். விமான நிலையங்களில் கூட நாய்கள் கடிக்கும் நிலைமை ஏற்பட்டுள்ளது.
எனவே பொது இடங்களில் உள்ள நாய்களை பிடித்து அகற்ற வேண்டும் என்ற உத்தரவுக்கு தடை விதிக்க முடியாது என்று உச்சநீதிமன்றம் திட்டவட்ட மாக தெரிவித்துள்ளது. நாய்கள் மூலம் பொதுமக்களுக்கு ஏற்படும் ஆபத்தை தடுக்க வேண்டும். நாய்களுக்கு உரிய தடுப்பூசி போட வேண்டும். நாய்களை பிடித்து மறுவாழ்வு மையங்களில் அடைக்க வேண்டும் என்று உத்தரவிடப்பட்டுள்ளது. ஒவ்வொரு மாவட்டத்திலும் விலங்குகள் நல மையங்களை ஏற்படுத்த வேண்டும் என்று உச்சநீதிமன்றம்உத்தரவிட்டுள்ளது.