ஈரோடு, மே 21 –
பைல்களை எடுத்துட்டு வரச் சொல்லுங்க என்று போலீஸ் அதிகாரி மூலம் பெண் எஸ்.பிக்கு த.வெ.க. எம்எல்ஏ, சகோதரி மிரட்டல் விடுத்த சம்பவம் பெரும் பரபரப்பை ஏற்படுத்தி உள்ளது. இதுதொடர்பாக பெண் எஸ்.பி, மாவட்ட கலெக்டரிடம் புகார் அளித்து உள்ளார்.
ஈரோடு மேற்கு தொகுதி சட்டமன்ற தேர்தலில் தவெகவை சேர்ந்த ஆனந்த் மோகன் வெற்றி பெற்று, எம்.எல்.ஏ.வாக பொறுப்பேற்றார். இதையடுத்து, ஈரோடு வந்த எம்எல்ஏ ஆனந்த் மோகன், டாஸ்மாக் கடையில் பாட்டிலுக்கு ரூ.20 அதிக விலைக்கு விற்றதாக குடிமகன்கள் அளித்த புகாரை தொடர்ந்து, டாஸ்மாக் கடைக்கு நேரில் சென்று பஞ்சாயத்து செய்தார்.
அதேபோல், சாலைப்பணிகள், ஆரம்ப சுகாதார நிலையங்களில் ஆய்வு செய்தார். இந்நிலையில், எம்.எல்.ஏ. ஆனந்த் மோகன் மற்றும் அவரது சகோதரி இருவரும் போலீஸ் அதிகாரி ஒருவரிடம் மாவட்டம் சார்ந்து குற்ற நடவடிக்கை குறித்து ஆய்வு செய்ய வேண்டும், அதற்கு மாவட்ட எஸ்.பி. கிரண் ஸ்ருதியை கோப்புகளை எடுத்து கொண்டு எம்.எல்.ஏ. முகாம் அலுவலகத்திற்கு விரைவாக வர சொல்லுங்கள் என தகவல் தெரிவித்து அனுப்பி வைத்தனர். இதையறிந்த மாவட்ட எஸ்பி கிரண் ஸ்ருதி, ‘‘எம்.எல்.ஏ.வை நாம் ஏன் சந்திக்க வேண்டும். அவருக்கு எதுக்கு மாவட்ட பைல்கள்’’ என அதிருப்தி அடைந்தார். மேலும் கோபமடைந்த எஸ்.பி., மாவட்ட கலெக்டரிடம் புகார் தெரிவித்துள்ளார்.
இதையறிந்து அவரும் அதிர்ந்து போனார். எம்.எல்.ஏ.வின் அதிகாரம், அவர்களது பணி என்னவென்று தெரியாமல் மேற்கு தொகுதி த.வெ.க. எம்.எல்.ஏ. சுற்றி வருகிறார். அவரிடம் எடுத்து கூறினால் புரிந்து கொள்வார் என காவல் துறையினர் எஸ்பி.யை சமாதானம் செய்துள்ளனர். இதையடுத்து, பெருந்துறை டி.எஸ்பி., எம்.எல்.ஏ.வின் தந்தை கலைச்செல்வ னிடம் கலெக்டர், எஸ்.பி. ஆகியோர் புகார் அளித்தால் எம்எல்ஏ பதவியை தொடர்வதற்கே சிக்கல் எழும், எம்.எல்.ஏ. இப்படி செய்யக்கூடாது, தவறான முன்னுதாரண மாகி விடும் என எச்சரித்துள்ளார். இதுகுறித்து எம்.எல்.ஏ.விடமும் தகவல் தெரிவிக்கப்பட்டது.
இதனால், எம்.எல்.ஏ. ஆனந்த் மோகன் தனது தவறை உணர்ந்து, உடனடியாக மாவட்ட எஸ்.பி. கிரண் ஸ்ருதியிடம் செல்போனில் தொடர்பு கொண்டு மன்னிப்பு கேட்டார். மேலும், நேரில் சென்று மரியாதை நிமித்தமாக சந்தித்து பகிரங்கமாக மன்னிப்பு கேட்டதாகவும் போலீஸ் வட்டாரங்கள் தெரிவித்தன.