தென்காசி, மே 22–
தென்காசி மாவட்டம் சங்கரன்கோவில் அரசு மருத்துவ மனையில் த.வெ.க.மருத்துவ அணியினர் ஆய்வு செய்ததால் பரபரப்பு ஏற்பட்டது.
சங்கரன்கோவில் அரசு மருத்துவ மனையில் நடந்த அலட்சியத்தை மறைக்க ஆய்வு என்ற பெயரில் த.வெ.க.கட்சியினர் நாடகமாடியுள்ளனர் என தென்காசி வடக்கு மாவட்டச் செயலாளர், வாசுதேவநல்லூர் சட்டமன்ற உறுப்பினர் ஈ.ராஜா, தென்காசி சட்டமன்ற உறுப்பினர் மரு.கலை கதிரவன் ஆகியோர் நடவடிக்கை எடுக்க வலியுறுத்தியுள்ளனர்.
தென்காசி மாவட்டம் சங்கரன்கோவில் அரசு மருத்துவமனையில் திடீரென்று த.வெ.க. மருத்துவ அணியினர் ஆய்வு செய்ததால் அரசியல் கட்சியினரிடையே பரபரப்பு ஏற்பட்டது.இதனிடையே த.வெ.கவின் இச் செயல் ஜனநாயகத்தை கேள்விக்குள்ளாகியுள்ளது என்றும், தி.மு.க.மருத்துவர் அணியிடம் த.வெ.க.மருத்துவர் அணியினர் பாடம் கற்றுக் கொள்ள வேண்டும் என்றும் கழக சட்டமன்ற உறுப்பினர்கள் மரு.கலை கதிரவன்,ஈ.ராஜா ஆகியோர் கூறினார்கள்.
தென்காசி மாவட்டம் சங்கரன்கோவில் அரசு மருத்துவ மனையில் தினசரி சுமார் 1000,ம் சிகிச்சைக்காக வந்து செல்கின்றனர்.இந்நிலையில் த.வெ.க.மாவட்ட மருத்துவர் அணி வாசுதேவி,த.வெ.க. சார்பில் போட்டியிட்ட ராமராஜ் மற்றும் அக் கட்சியைச் சேர்ந்தவர்கள் 19.-05.-2026 செவ்வாய்க் கிழமை அன்று அரசு மருத்துவமனைக்குச் சென்றனர். பின்னர் அவர்கள் மருத்துவமனைக்கு உள்ளே சென்று அங்குள்ள மருத்துவர்கள் மற்றும் பணியாளர்களிடம் பல்வேறு ஆவணங்களை சரிபார்க்க வேண்டும் என கூறினர்.அப்போது வாசுதேவி மருத்துவருக்கு உரிய வெள்ளை கோட் அணிந்திருந்தார். இதனால் மருத்துவமனை ஊழியர்களிடையே பரபரப்புஏற்பட்டது.
இது பற்றிய விபரம் அறிந்ததும் தென்காசி வடக்கு மாவட்டக் கழக செயலாளர் வாசுதேவநல்லூர் சட்டமன்ற உறுப்பினர் ஈ.ராஜா, தென்காசி சட்டமன்ற உறுப்பினர் மரு.கலை கதிரவன் ஆகியோர் நேற்று முன்தினம் (20.-05.-2026 – புதன்கிழமை) சங்கரன்கோவில் அரசு மருத்துவமனைக்குச் சென்று ஆய்வு செய்தனர்.அங்கிருந்த பணியாளர்களிடம் த.வெ.க. கட்சியினர் ஆய்வு செய்வது குறித்துக் கேட்டறிந்தனர்.பின்னர் தென்காசி வடக்கு மாவட்டச் செயலாளர் வாசுதேவநல்லூர் சட்டமன்ற உறுப்பினர் ஈ.ராஜா கூறுகையில் கடந்த ஐந்து ஆண்டு கால திராவிட மாடல் ஆட்சியில் முதலமைச்சர் அவர்களின் இரு கண்களாக இருந்து வந்தது பள்ளிக்கல்வித்துறை மற்றும் சுகாதாரத் துறை.சுகாதார துறையில் பல்வேறு சாதனைகளை செய்ததால் இன்று தமிழ்நாட்டில் சுகாதாரத் துறை இந்தியாவிலேயே முதன்மையாக உள்ளது. சங்கரன்கோவில் மருத்துவ மனையைப் பொறுத்த வரை பல்வேறு திட்டங்கள் செயல்படுத்தப்பட்டுள்ளது.கடந்த தி.மு.க. ஆட்சியில் செயல்படுத்தப்பட்ட திட்டங்களால் இன்று சங்கரன்கோவில் மருத்துவமனை மிகப் பெரிய அறுவை சிகிச்சைகளை கூட செய்யக்கூடிய மருத்துவமனையாக மாறி உள்ளது.தற்போது ஆளும் கட்சியைச் சேர்ந்த சிலர் ஆளுங்கட்சியின் மெத்தனத்தை மறைக்கும் வகையில் விரும்பத் தகாத செயல்களில் ஈடுபட்டு வருகின்றனர்.அரசு சம்பந்தப்பட்ட பதவிகளில் இல்லாமல் மருத்துவமனையில் இதுபோன்று சிலர் ஆய்வு என்ற பெயரில் நுழைவது ஜனநாயகத்தை கேள்விக் குறியாக்கி உள்ளது.எனவே இது குறித்து நடவடிக்கை எடுக்கப்பட வேண்டும்.
சங்கரன்கோவில் கல்குவாரியில் வேலை பார்த்து வந்த வட மாநில (தொழிலாளி) வாலிபரின் கை இயந்திரத்தில் சிக்கியது.அதில் அவரது கை துண்டானது.இதன் காரணமாக சங்கரன்கோவில் அரசு மருத்துவமனையில் சிகிச்சைக்காக அனுமதிக்கப்பட்டார்.பின்னர் மேல் சிகிச்சைக்காக நெல்லை அரசு மருத்துவக் கல்லூரி மருத்துவ மனைக்கு அனுப்பினர்.அப்போது வாலிபரின் துண்டான கையை சங்கரன்கோவில் அரசு மருத்துவ மனையில் இருந்து கொடுத்து விடவில்லை.அதனால் கையை இணைக்க முடியவில்லை.இந்த பிரச்சினைக்கு நியாயம் கிடைக்க வலியுறுத்துவோம்.அப்படி கிடைக்காத பட்சத்தில் தி.மு.க. சார்பில் போராட்டம் நடத்தப்படும் என்றார்.
அதன் பின்னர் தென்காசி சட்டமன்ற உறுப்பினர் மரு.கலை கதிரவன் கூறுகையில், த.வெ.க. கட்சியில் மருத்துவர் அணி என்ற சார்பில் பல்வேறு விரும்பத்தகாத செயல்களில் ஈடுபட்டு வருகின்றனர். சட்டப் பேரவையில் முதல்வர் விஜய்க்கு அனுபவங்களை கற்றுத் தரும் கட்சியாக எதிர்க்கட்சித் தலைவரான உதயநிதி ஸ்டாலின் அவர்களின் தலைமையில் தி.மு.க. உள்ளது.அதுபோல் த.வெ.க கட்சியில் மருத்துவர் அணியினர் எவ்வாறு செயல்பட வேண்டும் என்பதை தி.மு.க.வை பார்த்து கற்றுக் கொள்ளுங்கள்.அப்படி கற்று கொண்டால் மக்கள் பணி ஆற்றுவது எப்படி என்று தெரியும் என்று கூறினார்.
இந்நிகழ்வில் மாநில மருத்துவர் அணி துணைச் செயலாளர் செண்பக விநாயகம், சங்கரன்கோவில் ஊராட்சி ஒன்றிய குழு தலைவர் லாலா சக்கர பாண்டியன்,மாவட்ட மருத்துவரணி துணை அமைப்பாளர் வசந்த் ஆகியோர் கலந்து கொண்டனர்.
சங்கரன்கோவில் அரசு மருத்துவமனையில் ஒரு அரசியல் கட்சியின் மருத்துவ அணியினர் எந்த அடிப்படையில் ஆய்வு மேற்கொண்டனர் என்ற கேள்வி சமூக வலைதளங்களில் வேகமாக பரவி வருவதால் பரபரப்பு ஏற்பட்டுள்ளது.
தென்காசி மாவட்டம் சங்கரன்கோவில் அரசு மருத்துவமனையில் த.வெ.க. மருத்துவ அணி ஆய்வு சர்ச்சையை ஏற்படுத்தியது.அதன் காரணமாக சங்கரன்கோவில் அரசு மருத்துவ மனையில் தென்காசி வடக்கு மாவட்டச் செயலாளர் வாசுதேவநல்லூர் சட்டமன்ற உறுப்பினர் ஈ.ராஜா, தென்காசி சட்டமன்ற உறுப்பினர் மரு.கலை கதிரவன் ஆகியோர் கள ஆய்வு மேற்கொண்டனர்.உடன் மாநில மருத்துவரணி துணைச் செயலாளர் செண்பக விநாயகம் உட்பட கழகத்தினர் பலர் உள்ளனர்.