தி.
மு.க. கடந்த சட்டமன்றத் தேர்தலில் அடைந்த தோல்விக்கான காரணங்களை கழக நிர்வாகிகளிடமிருந்தே கேட்டு அறியும் மாபெரும் முன்னெடுப்பை கழகத் தலைவர் அவர்கள் மிகுந்த வெளிப்படைத் தன்மையுடன் மேற்கொண்டிருக்கிறார். தி.மு.க. விமர்சனங்கள் வழியே வளர்ந்த இயக்கம். அதில் சுய விமர்சனங்களும் அடங்கும்.
ஆனால் தி.மு.க. தனது தோல்வியை ஏற்று சுயபரிசீலனையில் ஈடுபட்டிருக்கும் வேளையிலும்கூட தி.மு.க.வின் மீதான தாக்குதல்களை இணைய மாஃபியாக்கள் நிறுத்த வில்லை. இன்னும் சொல்லப்போனால் தேர்தலுக்கு முன்பு இருந்ததைவிட இந்தத் தாக்குதல்கள் குரூரமாக மாறியிருக்கின்றன. தி.மு.க.வின் தோல்விக்கான சில எதார்த்தமான காரணங்கள் சிலரால் சொல்லப்பட்டாலும் பெரும்பாலும் இந்தச் சந்தர்ப்பத்தை பயன்படுத்தி இந்த இயக்கத்தை முற்றாக அழித்துவிடவேண்டும் என்கிற வெறியோடு தி.மு.க.வின் பரம்பரை எதிரிகளும் புதிய எதிரிகளும் மிகைப்படுத்தபட்ட, பொய்யான காரணிகளை புனைந்துகூறி வருகிறார்கள். இது திசை திருப்புகிற வேலை மட்டுமல்ல, தி.மு.க.வின்மீது தொடுக்கப்படுகிற உளவியல் தாக்குதல்.
இதில் வருத்தத்திற்குரிய விஷயம் என்னவென்றால் தி.மு.க. ஆதரவாளர்கள் பலரும் தங்களது சில ஆதங்கங்களை. விமர்சனங் களை பொது வெளியில் கொட்டித் தீர்க்கிறார் கள். அவை எதிரிகளுக்கு மிகுந்த உற்சாகத்தைத் தருகின்றன. தி.மு.க. தலைவர் எல்லாவற்றையும் தன்னிடம் கூறும்படி திரும்பத் திரும்ப அழைப்பு விடுக்கிறார். அதற்கான இணைய தளத்தையும் அளித்திருக்கிறார்.
ஆனால் கட்சி ஒரு நெருக்கடியான காலத்தில் இருக்கும்போது கட்சிக்கு ஆலோசனை வழங்குகிறோம் என்ற பெயரில் பொதுவெளியில் குற்றச்சாட்டுகளை பதிவு செய்வது எந்த வகையிலும் கட்சிக்கு உதவாது. எதிரிகளுக்குத்தான் உதவும். தலைவரின் கரங்களை வலிமைப்படுத்தி இயக்கத்தை சீர்படுத்த வேண்டிய நேரத்தில் நமது ஆதரவாளர்கள் சிலர் செய்யும் காரியங்கள் வருத்தம் அளிக்கின்றன.
இன்ஸ்டாகிராமால்தான் த.வெ.க. வென்றதா?
த.வெ.க இன்ஸ்டாகிராமால்தான் வென்றதாகக் கூறப்படுகிறது. அது ஒரு பகுதி உண்மை. இன்னும் சில உண்மைகளும் இருக்கின்றன. த.வெ.க.வின் இணைய செயல்பாடுகளை தி.மு.க.வின் இணைய தள செயல்பாடுகளை முற்றாக நிராகரிக்கும் வேலையை சிலர் செய்து வருகிறார்கள். தி.மு.க.வின்மீது 2ஜி பொய்க் குற்றச்சாட்டைக் கூறி ஒட்டுமொத்த ஊடகங்களும் நமக்கு எதிரான பொய்களை கட்டமைத்தபோது அதை உடைத்தது. தி.மு.க.வின் இணையதள செயல்பாடுகள்தான். 2016., 2019, 2021, 2024, 2026 ஆண்டுகளில் சட்டமன்ற, நாடாளுமன்றத் தேர்தல்களில் தி.மு.க. இணையத்தில் மேற்கொண்ட பல்வேறு தீவிர செயல்பாடுகள் கழகத்தின் வெற்றிக்கு பெரும்பங்காற்றின. பா.ஜ.க. ஆதரவு ஊடகங்கள் நம்மீது தொடுத்த அத்தனை தாக்குதல்களையும் தி.மு.க.வின் இணைய தள செயல்பாடுகள் எதிர்கொண்டு முறியடித்தன என்பது கண்முன் நிகழ்ந்த வரலாறு.
ஆனால் தி.மு.க. ஏதோ இணைய தள செயல்பாடுகளில் தோற்றுவிட்டது என்பதுபோன்ற ஒரு கட்டுக்கதையை எதிரிகள் திட்டமிட்டு பரப்பிவருகின்றனர். இது மிகப்பெரிய புரட்டு. கழகத்தின் வலிமை வாய்ந்த இணைய செயல்பாடுகள உளவியல் ரீதியாக சீர்குலைக்கும் முயற்சி.
அப்படியெனில் த.வெ.க இணையத்தைப் பயன்படுத்தி எப்படி வென்றது?
நான் ஒரு நீண்ட நாள் இணைய செயல்பாட்டாளன் என்ற முறையில் கூறுகிறேன், இது இன்ஸ்டாவினால் மட்டுமே பெற்ற வெற்றி அல்ல. மக்களிடம் இன்ஸ்டாவைவிடவும் நேரடியாக தொடர்புகொள்ளக்கூடிய ஊடகம் வாட்ஸப். த.வெ.க. பொய்ச்செய்திகளைப் பரப்புவதற்காக பல்லாயிரக்கணக்கான வாட்ஸப் குழுக்கள் பயன்படுத்தப்பட்டன. எந்த ஒரு கட்சியும் குறுகிய காலத்தில் இவ்வளவு பெரிய வாட்ஸப் கட்டமைப்பை உருவாக்க முடியாது.
பா.ஜ.க. 2014 ல் ஆட்சிக்கு வந்ததுமுதல் மைய நீரோட்ட ஊடகங்களை கட்டுப்படுத்தியது மட்டுமல்ல, பெரும் முதலீட்டில் சமூக ஊடக செயல்பாடுகளை மேற்கொண்டது. இலட்சக்கணக்கான வாட்ஸ்ப் குழுக்கள் நாடுமுழுவதும் உருவாக்கப்பட்டன. பா.ஜ.க.வின் இந்த ‘டிஜிட்டல் ஆர்மி’ நேரடியாக கட்சி அடையாளத்துடன் செயல்படவில்லை. பல்வேறு விதமான போலி முகமூடிகளுடன் அவர்கள் இடையறாது பொய்த்தகவல்கள் பரப்பினார்கள். சமூக வலை தளங்களில் தங்கள் அரசியல் எதிரிகளின்மேல் கடும் தனிநபர் தாக்குதல்களை மேற்கொண்டார்கள். யூ ட்யூப், ஃபேஸ்புக், ட்விட்டர், இன்ஸ்டா எல்லாவற்றிலும் தங்கள் கூலிப் படையினரை அமர்த்தினார்கள்.
பா.ஜ.க.வின் இந்த டிஜிட்டல் கட்டமைப்பு அப்படியே த.வெ.க.விற்கு பயன்படுத்தப்பட்டிருக்கிறது என்ற சந்தேகம் பலருக்கும் ஏற்பட்டிருக்கிறது. பா.ஜ.க. திராவிட கட்சிகளை அழிக்க பெற்றெடுத்த குழந்தைதான் த,வெ,க. என்பதை அறிய எந்த பரிசோதனையும் தேவையில்லை. தமிழ்நாட்டில் பா.ஜ.க.வின் ’டிஜிட்டல் ஆர்மி’யால் நேரடியாக வெல்ல முடியாததற்குக் காரணம் இங்கு நிலவும் கடும் பா.ஜ.க. எதிர்ப்பு மனநிலைதான். ஆகவே விஜய் என்கிற பிரபலமான சினிமா பொது பிம்பத்திற்கு தங்களுடைய வழிமுறைகளையும் கட்டமைப்பும் தந்து உதவியிருக்கிறார்கள் என்பதற்கு ஆதாரம் த.வெ.க.வின் முக்கிய நிர்வாகிகள்பா.ஜ.க.வால் அனுப்பப்பட்டவர்கள் என்பதிலிருந்தே அறியலாம்.
த.வெ.கபரப்பிய பொய்த் தகவல்களை the hindu நாளிதழ் அம்பலப்படுத்தியிருக்கிறது. கரூர் சம்பவத்தையே மடைமாற்றிய பிறகு இணையத்தைப் பயன்படுத்தி எதையும் செய்யலாம் என்கிற தன்னம்பிக்கை த.வெ.கவிற்கு ஏற்றப்பட்டிருக்கிறது. அதுதான் அவர்கள் ஆட்சிக்கு வந்தபிறகும் அன்றாடம் பரப்பிக்கொண்டிருக்கும் பொய்ப்பரப்புரைகள்.
இந்தப் பொய்களுக்கு பெரிதும் உறுதுணையாக பல காட்சி ஊடகங்களும் நடு நிலை போர்வையில் செயல்படும் த,வெ.க. காண்ட்ராக்ட் ஊழியர்களும் இருப்பதைக் காணமுடிகிறது. அவர்கள் எல்லாவற்றையும் விஜய்யை சுற்றியே கட்டமைக்கிறார்கள். எரிபொருள் பிரச்சினையால் நாடு பொது முடக்கத்தை நோக்கிச் சென்றுகொண்டிருக்கும்போது அதைப்பற்றி எந்த விவாதமும் இல்லை.
சினிமா மோகம், இண்ஸ்டா, தொலைக்காட்சி, பிரமாண்டமான வாட்ஸப் கட்டமைப்பு என பலவற்றின் கூட்டிணைவே த.வெ.க. பின் னிய இந்த மாயவலை. தி.மு.க. போன்ற ஒரு கட்சி தர்க்கரீதியாகவும் தரவுகளோடும் செயல்பாடுகளின் அடிப்படையிலும்தான் தன் வழிமுறைகளை மேற்கொள்ள முடியும். மக்களிடம் உரையாட முடியும். சமூக வலை தளங்களில் நாம் தொழில்நுட்ப ரீதியாக இன்னும் வலுவாக செயல்படவேண்டும் என்பது உண்மைதான். ஆனால் த.வெ.க.வின் ஏமாற்று வழிமுறைகள் எதையும் நாம் பின்பற்ற முடியாது. பின்பற்றக் கூடாது. நாம் நமக்கான நம் கொள்கை வழிப்பட்ட செயல்களை ஊடகங்களில் முன்னெடுக்க வேண்டும். த.வெ.க.வின் வெற்றியை, அதன் இணைய செயல்பாடுகளின் மூர்க்கத்தைக் கண்டு நாம் பதற்றமடையக்கூடாது. இது ஒரு விபத்து, தற்காலிக சூழல்.
தி.மு.க. 75 ஆண்டுகளாக இத்தனை வலிமையுடன் நீடித்திருப்பது அதன் கொள்கையாலும் செயல் திறனாலும் மக்கள் தொண்டினாலுமே. தி.மு.க. தொடங்கப்பட்ட காலத்திலி ருந்து திரைப்படம், பத்திரிகைகள், மேடை நாடகங்கள், சொற்பொழிவுகள், புத்தகங்கள், இணையம் என எல்லா ஊடகங்களையும் திறம்பட பயன்படுத்தி வளர்ந்த இயக்கம். வெறும் இன்ஸ்டாகிராமிடம் நாம் தோற்றுவிட்டோம் என்று நம்மை நம்பவைக்க முயற்சிக்கிறார்கள். மாய பிம்பங்கள், பொய் தோற்றங்கள் நெடுநேரம் நீடித்திருக்காது.
நாம் சமூக வலைதளங்களை இன்னும் திறம்பட பயன்படுத்துவோம். அதைவிட உண்மையான நமக்கு பழக்கமான பணி ஒன்றிருக்கிறது. அது நெருக்கடியான காலத்தில் மக்களுக்கு தொண்டாற்றுவது. மிக மோசமான நாட்கள் வர இருக்கின்றன. மக்களோடு இருந்து பணியாற்றுவோம். அவர்களின் இதயங்களை வெல்வோம்.