தேனி, மே 23--–
தேனி மாவட்டம், ஆண்டிபட்டி ஊராட்சி ஒன்றியத்திற்கு உட்பட்ட ஒக்கரைப்பட்டி ஊராட்சியில், அரசு விதிமுறைகளை தலைகீழாக தூக்கி எறிந்துவிட்டு, அரசு அலுவலக வளாகம் மற்றும் அரசுக்கு சொந்தமான நாற்காலி, மேஜைகளை பயன்படுத்தி தனியார் அரசியல் கட்சியினர் ஆலோசனை கூட்டம் நடத்திய சம்பவம் பொதுமக்களிடையே பெரும் அதிர்ச்சியை ஏற்படுத்தியுள்ளது.
ஒக்கரைப்பட்டி ஊராட்சியில் கிராம மக்கள் பயன்பாட்டிற்காக ஊராட்சி ஒன்றிய அலுவலகமும், அதன் முன்பாக நாடக மேடையும் அமைந்துள்ளது. இவை இரண்டும் ஒரே வளாகத்தில் அடுத்தடுத்து அமைந்துள்ளன. இந்த நிலையில் நேற்று முன்தினம் (20-ஆம் தேதி), தமிழக வெற்றி கழகத்தின் (த.வெ.க) உள்ளூர் நிர்வாகிகள் இந்த நாடக மேடையில் திடீரென ஒரு கூட்டத்திற்கு ஏற்பாடு செய்தனர்.
அப்பகுதியைச் சேர்ந்த பொதுமக்களைத் திரட்டி, கிராமத்தில் உள்ள குறைகளைக் கேட்டறியும் ஆலோசனைக் கூட்டம் என்ற பெயரில் இக்கூட்டம் நடைபெற்றது. இதற்காக, அருகில் இருந்த ஊராட்சி ஒன்றிய அலுவலகத்திற்குள் புகுந்த அக்கட்சியின் நிர்வாகிகள், அங்கிருந்த அரசுக்குச் சொந்தமான அதிகாரப்பூர்வ மேஜைகள் மற்றும் நாற்காலிகளை எவ்வித அனுமதியுமின்றி வெளியே எடுத்து வந்து தங்களின் சுயவிளம்பரக் கூட்டத்திற்குப் பயன்படுத்தியுள்ளனர். அரசு அலுவலகப் பொருட்களை வெளியே கொண்டுவந்து, ஒரு குறிப்பிட்ட அரசியல் கட்சியின் நிர்வாகிகள் அமர்ந்து கொண்டு பொதுமக்களிடம் மனுக்களை வாங்கியதும், குறைகளைக் கேட்டறிந்ததும் அங்கிருந்த நடுநிலையாளர்களிடையே கடும் அதிருப்தியை ஏற்படுத்தியது.
100 நாள் வேலை பணியாளர்கள் மிரட்டி வரவழைப்பா?
குறிப்பாக, இந்த கூட்டத்தில் பொதுமக்கள் யாரும் தன்னிச்சையாகப் பங்கேற்கவில்லை என்றும், ஊராட்சி செயலர் கவிதா தனது அதிகாரத்தைப் பயன்படுத்தி, அந்த ஊராட்சியில் 100 நாள் வேலை (மகாத்மா காந்தி தேசிய ஊரக வேலைவாய்ப்பு உறுதித் திட்டம்) பார்க்கும் பெண் பணியாளர்களைக் கட்டாயப்படுத்தி இந்த அரசியல் கூட்டத்திற்கு அழைத்து வந்து அமர வைத்ததாக கூறப்படுகிறது. அரசு திட்டப் பணியாளர்களை அரசியல் ஆதாயத்திற்காகப் பயன்படுத்தியது அப்பகுதி மக்களிடையே பெரும் கொந்தளிப்பை ஏற்படுத்தியுள்ளது.
விதிமுறைகள் அப்பட்டமாக மீறல்:
மக்களால் முறைப்படி தேர்ந்தெடுக்கப்பட்ட ஊராட்சி ஒன்றியத் தலைவர் இல்லாமல், ஒரு தனிப்பட்ட அரசியல் கட்சியின் நிர்வாகிகள் எப்படி அரசு அலுவலகம் முன்பு ஆக்கிரமித்து, அரசு அலுவலகப் பொருட்களையும், வளாகத்தையும் தங்களின் சொந்தக் கட்சி நிகழ்ச்சிக்கு தன்னிச்சையாகப் பயன்படுத்த லாம்? என்ற கேள்வி எழுந்துள்ளது. அரசு சொத்துக்களைத் தவறாக பயன்படுத்தியும், அரசு பணியாளர்
களைத் திசைதிருப்பியும் நடத்தப்பட்ட இந்த விதிமுறை மீறல் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
இதுகுறித்து த.வெ.க தரப்பில் விசாரித்தபோது, “தமிழக வெற்றிக் கழகத்தின் மாவட்டச் செயலாளர் உத்தரவின் பேரில், அந்தந்த கிராமங்களில் உள்ள மக்களின் அடிப்படைப் பிரச்சினைகள் மற்றும் குறைகளைக் கேட்டறிந்து மனுக்களைப் பெறுவதற்காகவே இந்த ஆலோசனைக் கூட்டம் நடத்தப்பட்டது” என்று மழுப்ப லாகக் கூறினர்.
அதிகாரியின் விநோத விளக்கம்:
இதுகுறித்து ஒக்கரைப்பட்டி ஊராட்சிச் செயலாளர் கவிதாவிடம் விளக்கம் கேட்டபோது, அவர் ஒரு விநோதமான விளக்கத்தை அளித்தார். அவர் கூறுகையில், “ஊராட்சி அலுவலகமும் நாடக மேடையும் அடுத்தடுத்து இணைந்துதான் அமைந்துள்ளது. வழக்கமாகப் பொதுமக்கள் மற்றும் அமைப்பினர் அனைவரும் அந்த இடத்தில்தான் நிகழ்ச்சிகளை நடத்துகின்றனர். ஆனால், த.வெ.க கூட்டத்தில் பயன்படுத்தப்பட்ட மேஜை, நாற்காலிகள் அனைத்தும் ஊராட்சி அலுவலகத்திற்குச் சொந்தமானவை அல்ல; அவை வெளியில் இருந்து கொண்டு வரப்பட்ட மாற்றுப் பொருட்கள்” என்று கட்சியினரைக் காப்பாற்றும் நோக்கில் கூறினார். ஆனால், கட்சி நிர்வாகிகளுடன் சேர்ந்துஅந்த கூட்டத்தில் ஊராட்சிசெயலர் கவிதாவும் நேரடியாகப் பங்கேற்றிருந்தது குறிப்பிட த்தக்கது.
இருப்பினும், ஊராட்சிச் செயலாளரின் இந்த விளக்கத்தை அப்பகுதி மக்கள் முற்றிலுமாக மறுக்கின்றனர். ஊராட்சி அலுவலகத்தில் உள்ள அரசு முத்திரை பதிக்கப்பட்ட மேஜைகளும் கோப்புகளும் அப்பட்டமாகப் பயன்படுத்தப்பட்டதை அங்கிருந்தவர்கள் நேரில் பார்த்ததாகக் குற்றம் சாட்டுகின்றனர்.
அரசு சொத்துக்களையும், அரசு அலுவலக வளாகத்தையும் அரசியல் ஆதாயத்திற்காகத் துஷ்பிரயோ கம் செய்த த.வெ.க நிர்வாகிகள் மீதும், இதற்குத் துணை நின்றதோடு, 100 நாள் வேலை பணியாளர்களைக் கூட்டத்திற்கு அழைத்து வந்து அலட்சியமாகச் செயல்பட்ட ஊராட்சிச் செயலாளர் கவிதா மீதும் மாவட்ட நிர்வாகம் மற்றும் வட்டார வளர்ச்சி அலுவலர்கள் உடனடியாகத் தீவிர விசாரணை நடத்தி, தகுந்த ஒழுங்கு நடவடிக்கை எடுக்க வேண்டும் என்று சமூக ஆர்வலர்கள் மற்றும் பொதுமக்கள் கோரிக்கை விடுத்துள்ளனர்.