சேலம், மே 23–
கிருஷ்ணகிரியில் நிலத்தை அதிகாரிகள் அளவீடு செய்யாததால் கலெக்டர் அலுவலகத்தில் தீக்குளித்த மாற்றுத்திறனாளி, சிகிச்சை பலனின்றி உயிரிழந்தார். அவரது உடலை வாங்க மறுத்து சேலம் கலெக்டர் அலுவலகம் முன் உறவினர்கள் தர்ணா போராட்டத்தில் ஈடுபட்டதால் பரபரப்பு ஏற்பட்டது. கிருஷ்ணகிரி மாவட்டம், சூளகிரி தாலுகா தியாகரசனப்பள்ளி அருகே மாதரசனப்பள்ளி கிராமத்தைச் சேர்ந்தவர் வெங்கடேஷ் (45), மாற்றுத்திறனாளி.
விவசாயியான இவர், கடந்த திங்கட்கிழமை கிருஷ்ணகிரி கலெக்டர் அலுவலகத்திற்கு வந்து, நிலபிரச்சினைக்கு உரிய முறையில் அளவீடு செய்து தராத அதிகாரிகள் மீது நடவடிக்கை எடுக்க வலியுறுத்தி, கோஷமிட்டவாறுஉடலில் பெட்ரோல் ஊற்றிதீக்குளித்தார். இதில் பலத்த காயமடைந்த வெங்கடேசை, பாதுகாப்பு பணியில் இருந்த போலீசார் மீட்டு, கிருஷ்ணகிரி அரசு மருத்துவமனையில் அனுமதித்தனர். பின்னர், மேல் சிகிச்சைக்காக சேலம் அரசு மருத்துவமனைக்கு கொண்டு வந்து சேர்த்தனர். அங்கு சிகிச்சை பலனின்றி வெங்கடேஷ் உயிரிழந்தார்.
இதுபற்றி கிருஷ்ணகிரி தாலுகா போலீசார், வழக்குப்பதிந்து விசாரணை நடத்தி வருகின்றனர். நேற்று முன்தினம்காலை, வெங்கடேசின் உடலை பிரேதப் பரிசோதனை செய்வதற்கான ஏற்பாடுகளை போலீசார் செய்து,அவரது குடும்பத்
தாரிடம் பேசினர். அப்போது, வெங்கடேசின் மனைவி திம்மக்கா, மகள்கள் ஷர்மிளா, சங்கீதா, மகன் சதீஷ் மற்றும் உறவினர்கள், வெங்கடேஷ் சாவுக்கு நீதி கிடைக்கும் வரை உடலை வாங்க மாட்டோம் எனக்கூறினர்.
தொடர்ந்து மனைவி, மகள்கள் மற்றும் உறவினர்கள் 15க்கும் மேற்பட்டோர், சேலம் கலெக்டர் அலுவலகத்திற்கு வந்து, அதிகாரிகளிடம் புகார் மனு கொடுத்தனர். பின்னர், கலெக்டர் அலுவலக நுழைவாயில் தரையில் அமர்ந்து தர்ணா போராட்டத்தில் ஈடுபட்டனர். வெங்கடேசின் மகள் ஷர்மிளா நிருபர்களிடம் கூறியதாவது: எனது தந்தைக்கு சொந்தமான நிலத்தை அளவீடு செய்து தரக்கோரி, அதிகாரிகளிடம் 2 முறை மனு அளித்த போதும், உரிய நடவடிக்கை எடுக்கவில்லை.
பிறகு அளவீடு செய்வது போல், நிலத்தில் வந்து நின்று விட்டு, திரும்பி சென்று விட்டார்கள். 3வது முறையாக அரசு அதிகாரிகளை சந்தித்து முறையிட்டார். அங்கு என்ன நடந்தது எனத்தெரியவில்லை. அதன்பிறகு எனது தந்தை கடும் மனஉளைச்சலுக்கு ஆளாகி வேதனையில் இருந்தார். திங்கட் கிழமையன்று கிருஷ்ணகிரி கலெக்டர் அலுவலகத்துக்கு சென்று தீக்குளித்து தற்கொலை செய்து கொண்டுள்ளார். தற்போது அந்த நிலத்தை அளவீடு செய்து முடித்து விட்டதாகவும், அதற்கான ஆவணங்கள் இருப்பதாகவும் அதிகாரிகள் கூறுகின்ற னர்.
அந்த ஆவணத்தில், எனது தந்தை கையெழுத்து போட்டிருப்பதாக கூறுகின்றனர். எனது தந்தைக்கு எழுத, படிக்க தெரியாது. அவர் கையெழுத்து போடமாட்டார். அவர் கைரேகை மட்டுமே வைப்பார். அந்த ஆவணங்கள் அனைத்தும் போலியானவை. அதனால், தந்தை வெங்கடேஷ் சாவுக்கு காரணமான அதிகாரிகள் மீது உரிய சட்ட நடவடிக்கை எடுக்கும் வரை உடலை பெற்றுக்கொள்ள மாட்டோம். இவ்வாறு அவர் கூறினார்.
இதையடுத்து தர்ணாவில் ஈடுபட்டவர்களிடம் சேலம் டவுன் போலீசாரும், கிருஷ்ணகிரி தாலுகா இன்ஸ்பெக்டர் மணிமாறனும் பேச்சுவார்த்தை நடத்தினர். வெங்கடேஷ் இறப்பதற்கு முன்பு மாஜிஸ்தி ரேட்டிடம் மரண வாக்குமூலம் அளித்துள்ளார். அதனால் அவர், யார் மீதெல்லாம் புகார் தெரிவித்து இருக்கிறாரோ அவர்கள் மீது கட்டாயம் நடவடிக்கை எடுப்போம் என்று உறுதி கூறினர். அதை ஏற்று வெங்கடேசின் உறவினர்கள், தர்ணா போராட்டத்தை கைவிட்டனர்.