திருவள்ளூர், மே 24:
திருவள்ளூர் நகரில் மக்கள் நடமாட்டம் மிகுந்த பகுதியில் அமைந்துள்ள பிரபல அம்மன் கோவிலில் பூட்டை உடைத்து நகை மற்றும் உண்டியல் பணம் கொள்ளையடிக்கப்பட்ட சம்பவம் பெரும் பரபரப்பை ஏற்படுத்தியுள்ளது.
திருவள்ளூர் நேதாஜி சாலையில் உள்ள ஸ்ரீ பிடாரி பொன்னியம்மன் ஆலயம் பக்தர்கள் அதிகம் தரிசிக்கும் பிரபல ஆலயமாகும். இந்த கோவில் திருவள்ளூர் டவுன் காவல் நிலையத்திலிருந்து சுமார் அரை கிலோமீட்டர் தொலைவில் அமைந்துள்ளது. ஆலய பூசாரியாக என். ஆறுமுகம் பணியாற்றி வருகிறார்.
அதிகாலையிலேயே ஆலயம் திறக்கப்பட்டு சிறப்பு பூஜைகள் நடைபெற்றன. பின்னர் வழக்கம்போல் இரவு பூஜைகள் முடிந்து கோவில் பூட்டப்பட்டு பூசாரி வீட்டிற்கு சென்றுள்ளார்.
இந்நிலையில் நேற்று அதிகாலை கோவிலை திறக்க சென்ற போது முன்பக்க பூட்டு உடைக்கப்பட்டிருந்ததை கண்டு பூசாரி அதிர்ச்சி அடைந்தார். இதுகுறித்து அறங்காவலர் குழுத் தலைவர் சீனிவாசனுக்கு தகவல் தெரிவிக்கப்பட்டது. தொடர்ந்து திருவள்ளூர் டவுன் போலீசாருக்கும் தகவல் அளிக்கப்பட்டதையடுத்து காவல்துறையினர் சம்பவ இடத்திற்கு விரைந்து வந்து விசாரணை மேற்கொண்டனர்.
ஆய்வில், அம்மன் கழுத்தில் அணிவிக்கப்பட்டிருந்த சுமார் 2 கிராம் தங்க சங்கிலி மற்றும் உண்டியல் பணம் கொள்ளையடிக்கப்பட்டது தெரியவந்தது. இதுதொடர்பாக வழக்குப் பதிவு செய்துள்ள போலீசார், சம்பவத்தில் ஈடுபட்ட மர்ம நபர்களை தேடி வருகின்றனர்.
மாவட்ட தலைநகரின் மையப்பகுதியிலும், காவல் நிலையத்திற்கு அருகிலுமுள்ள கோவிலில் இந்த துணிகர கொள்ளை நடைபெற்றிருப்பது பொதுமக்கள் மற்றும் பக்தர்களிடையே அதிர்ச்சியையும் அச்சத்தையும் ஏற்படுத்தியுள்ளது.