#Title

அற்புதம் அல்ல ; அற்பத்தனம், அசிங்கம்! – ப.திருமாவேலன்

திராவிட முன்னேற்றக் கழக இளைஞர் அணி அமைப்பாளர்கள் கூட்டத்தில் நிறை வேற்றப்பட்ட தீர்மானங்கள் அனைத்தும் சிறப்பானவை. செறிவானவை. அதில் மிகமிக முக்கியமான தீர்மானம், முதுகில் குத்திய காங்கிரஸ் கட்சியைப் பற்றியது ஆகும்.

தி.மு.க. ஆட்சி அமைக்க விரும்பிய மக்களின் வாக்குகளால் வெற்றியைப் பெற்று, அதனையே பணயமாக வைத்து இரண்டு அமைச்சர் பதவிகளை பல்லிளித்து வாங்கி இருக்கிறது காங்கிரஸ் கட்சி. ‘சொந்த உழைப்பில் ஒருநாளும் வெற்றி பெற முடியாமல் நம்பியவர்களுக்கு எல்லாம் துரோகம் இழைக்கும் அறமில்லாத காங்கிரஸ் கட்சிக்கு கண்டனம்’ என்பதை தீர்மானமாக நிறைவேற்றி இருக்கிறார் இளைஞர் அணிச் செயலாளரும் எதிர்க்கட்சித் தலைவருமான மாண்புமிகு உதயநிதி அவர்கள். இதில் உள்ள ஒவ்வொரு சொல்லும் திமுக தொண்டர்களின் உணர்வு மட்டுமல்ல, அரசியல் மனசாட்சி உள்ள அத்தனை தமிழ் மக்களின் உணர்வு ஆகும்.

தி.மு.க. கூட்டணி தயவால் வெற்றி பெற்று, இன்றைக்கு அமைச்சர் ஆகி இருக்கிற ராஜேஷ்குமாருக்கு இந்தத் தீர்மானத்தைப் படித்தால் கோபம் வருகிறது. ‘நீண்ட காலமாக தி.மு.க. கூட்டணியில் புழுக்கத்தோடு இருந்ததாம் காங்கிரஸ்’. புழுக்கத்தோடு எதற்காக இருக்க வேண்டும்? போய் தொலைந்திருக்க வேண்டியதுதானே? ‘போய் கெடுக்க முடியாது என்பதால், இருந்து கெடுக்க நினைத்ததா’ காங்கிரஸ் தலைமை? அதுதானே உண்மை!

திராவிட மாடல் ஆட்சியின் சாதனைகளைக் கொச்சைப்படுத்தும் செயலை எதிர்க்கட்சிகள் செய்யவில்லை. கூட்டணியில் இருந்து கொண்டே காங்கிரஸ் கட்சிதான் செய்தது. ‘புரியாத’ ராகுலுக்கு ‘தெரியாத’ அட்வைஸர் என்று சொல்லித் திரிந்த ஒருவர் புள்ளிவிவரப் புளுகுகளை எடுத்துவிட்டு, ‘கூட்டணிக்கட்சியே உங்களது சாதனைகளை ஏற்றுக் கொள்ளவில்லை’ என்று மீடியாக்களிலும் சேனல்களிலும் செய்தியை வரவைத்த கீழ்த்தரமான செயலை காங்கிரஸ் தானே செய்தது? அதனை ராகுல் அடக்கினாரா?

குட்டியை விட்டு ஆழம் பார்ப்பது போல பலரையும் இறக்கிவிட்டது யார்? காங்கிரஸ் தலைமை தயவு இல்லாமல் வேறு யார் இதைச் செய்ய முடியும்?

தி.மு.க.வுடன் பேச்சுவார்த்தைகள் நடத்திக் கொண்டே விஜய்யைப் பார்க்க காங்கிரஸ் தலைவர்கள் கள்ளத்தனமான சந்திப்புகளை நடத்தியதும், அதை அவர்களே மீடியாக்களுக்குப் பரப்பியதும் கூட்டணி தர்மமா?

இவை அனைத்துக்கும் மேலாக புதுச்சேரியில் ஒரு கேவலம் நடந்தது. தி.மு.க. – காங்கிரஸ் கூட்டணி சார்பில் போட்டியிட்ட தி.மு.க. வேட்பாளர்களுக்கு எதிராக காங்கிரஸ் கட்சி போட்டி வேட்பாளர்களை நிறுத்தியது. தி.மு.க. போட்டியிட்ட தொகுதிகளில் காங்கிரஸ் கட்சி போட்டி வேட்பாளர்கள் போட்டியிட்டார்கள். திருபுவனை, மங்களம், காலாப்பட்டு, ராஜ்பவன், உழவர் கரை, காரைக்கால் ஆகிய தொகுதிகளில் தி.மு.க. வேட்பாளரை எதிர்த்து காங்கிரஸ் கட்சியே போட்டியிட்டது. இத்தகைய போட்டி வேட்பாளர்கள், ராகுலைச் சந்தித்து வாழ்த்துப் பெற்றார்கள்.

இப்படி ஒரு நம்பிக்கைத் துரோகியைத் தான் சகித்துக் கொண்டு தி.மு.க. கூட்டணியில் வைத்திருந்தார்கள்.

கூட இருந்து குழிபறித்தல், உண்ட வீட்டுக்கு இரண்டகம் செய்தல், கூட இருந்தே பொறாமையால் பொசுங்குதல் – இவை எல்லாம் காங்கிரஸின் தேசியக் குணம் என்பதை தமிழ்நாடு அறியும். அதனால் தான் 60 ஆண்டுகளாக ஆட்சி நாற்காலிக்கு அருகில் அந்தக் கட்சியை வரவிடாமல் வைத்துள்ளார்கள் தமிழ்நாட்டு மக்கள். இப்போது இரண்டு பேர்அமைச்சர்கள் ஆகி இருப்பதை ‘60 ஆண்டுகளில் தமிழக அரசியலில் நிகழாத அற்புதம்’ என்று சொல்லி இருக்கிறார் ராஜேஷ்குமார்.

த.வெ.க.வுடன்கூட்டணி அமைத்து மக்களைச் சந்தித்து, அதன் ஆட்சியில் 35 பேரில் இரண்டு பேரை அமைச்சர் ஆக்கி இருந்தால் அற்புதம் எனலாம். தி.மு.க. கூட்டணியில் அங்கம் வகித்து, தி.மு.க. ஆட்சி அமைக்க வாக்களித்த மக்களால் எம்.எல்.ஏ. ஆகி – இன்னும் சொன்னால் விஜய் ஆட்சி வரக்கூடாது என்பதற்காக வாக்களித்த மக்களால் எம்.எல்.ஏ. ஆகி – அதை அடமானம் வைத்து இரண்டு சேர் வாங்கியது அற்புதம்அல்ல, அற்பத்தனம். அசிங்கம்.

அறுபது ஆண்டுகள் கழித்து காங்கிரஸ் அமைச்சர் பதவி ஏற்கிறார்களாம். இதைப் பார்த்து நாடே சிரிக்கிறது. தனித்துப் போட்டியிட்டு ஆட்சி அமைக் கிறதா காங்கிரஸ்? இல்லை. அப்படி அமைத்திருந்தால் ‘சத்தியமூர்த்தி பவன்’ முன்னால் பட்டாசு போடலாம்.

பெருந்தலைவர் காமராஜர் ஆட்சி அமைப்பதும், காமராஜர் படம் மாட்டியவர் ஆட்சியில் சேர் பிடிப்பதும் ஒன்றல்ல என்பதை திருமலைப்பிள்ளை வீட்டு வாசலில் போய்தான் கூவ வேண்டும்!

மற்றபடி, இப்போது மனநிறைவோடு இருக்கிறது தி.மு.க!

‘மிசா’ காலக்கட்டத்தில் கழகம் பெரும் துன்பத்தை அனுபவித்தது.திராவிட நாயகன் மு.க.ஸ்டாலின் உள்ளிட்ட தளகர்த்தர்கள் சிறைக்கொட்டடியில் சித்திரவதை செய்யப்பட்டார்கள். ஒவ்வொரு குடும்பத்தினரையும் சந்தித்து ஊர் ஊராகப் போய் ஆறுதல் சொன்னார் தமிழினத் தலைவர் கலைஞர். பல்வேறு ஊர்களில் இருந்து தொண்டர்களும் ஆண்களும் பெண்களும் சிறுவர்களும் கோபாலபுரம் வந்து தலைவருக்கு ஆறுதலைச் சொன்னார்கள்.

அப்போது தனிக்கட்சி தொடங்கி இருந்த எம்.ஜி.ஆர்., ‘‘கருணாநிதி இப்போது அனுபவிப்பதுதான் உண்மையான நரகம்’’ என்று சொன்னார். அதற்கு தனக்கே உரிய பாணியில் பதில் அளித்தார் தலைவர். ‘‘எனது ‘நரக’ வேதனை 1972 அக்டோபர் மாதத்தோடு முடிந்துவிட்டது” என்றார் தலைவர்.

தி.மு.க.வுக்கும் இவர்கள் இருந்ததால் தொடர்ந்த நரக வேதனை முடிந்துவிட்டது!