சென்னை, மே 26–

சென்னையின் போக்குவ ரத்து நெரிசலைக் குறைக்கும் முக்கியத் திட்டமான சைதாப்பேட்டை – தேனாம்பேட்டை மேம்பாலப் பணிகள் சவால்களுக்கு மத்தியிலும் வேகமாக நடைபெற்று வருகின்றன.

தொழிலாளர் பற்றாக்குறை போன்ற காரணங்களால் ஏற்பட்ட தாமதங்களைத்தாண்டி, இத்திட்டம் தற்போது 68 சதவீதப் பணிகளை எட்டியுள்ளது.

சென்னை அண்ணா சாலையில் சைதாப்பேட்டை முதல் தேனாம்பேட்டை வரை 3.2 கிலோ மீட்டர் நீளத்திற்கு அமைக்கப்பட்டு வரும் மேம்பாலப் பணிகள் தற்போது இறுதிக் கட்டத்தை நெருங்கி வருகின்றன. நெடுஞ்சாலைத் துறை வெளியிட்டுள்ள தகவலின்படி, இத்திட்டத்தின் சுமார் 68 சதவீத பணிகள் தற்போது நிறைவடைந்துள்ளன.

குறிப்பாக தூண்களுக்கான அஸ்திவாரப் பணிகள் 98 சதவீதம் முடிக்கப்பட்டுள்ளன. 1.1 கிலோமீட்டர் நீளத்திற்கு அமைக்கப்பட்டுள்ளன. மொத்தம் திட்டமிடப்பட்டுள்ள 131 தளங்களில் 32 தளங்கள் ஏற்கனவே பொருத்தப்பட்டு விட்டன. மேலும் 8 தளங்களை இந்தமாத இறுதிக்குள் பொருத்த அதிகாரிகள் இலக்கு நிர்ணயித்துள்ளனர்.

மேற்கு ஆசியப் போர் காரணமாக ஏற்பட்ட எரிபொருள் விலை உயர்வு மற்றும் தேர்தல் சமயத்தில் தொழிலாளர்கள் வாக்களிக்கத் தங்கள் சொந்த ஊர்களுக்குச் சென்றதால் ஏற்பட்ட ஆள் பற்றாக்குறை போன்ற காரணங்களால் இப்பணிகளில் சற்று சுணக்கம் ஏற்பட்டது. தற்போது தொழிலாளர்கள் மீண்டும் பணிக்குத் திரும்பியுள்ளதால், திட்டமிட்டபடி வரும் செப்டம்பர் மாதத்திற்குள் பாலத்தை முழுமையாக முடித்து மக்கள் பயன்பாட்டிற்குக் கொண்டு வரத் தீவிர நடவடிக்கைகள் மேற்கொள்ளப்பட்டு வருகின்றன.

இத்திட்டத்திற்குத் தேவையான கட்டுமானப் பொருட்கள் மகாராஷ்டிரா, கோவா மற்றும் ஐதராபாத் ஆகிய இடங்களிலிருந்து கொண்டு வரப்படுகின்றன. இந்த மேம்பாலத் திட்டத்தின் மிக முக்கிய சிறப்பம்சம் என்னவென்றால் ரயில் சுரங்கப் பாதைகளுக்கு மேல் கட்டப்படும் இந்தியாவின் அரிய மேம்பாலத் திட்டங்களில் ஒன்றாக இது கருதப்படுகிறது.

மெட்ரோ சுரங்கப்பாதை அமைந்துள்ள பகுதிகளில் அமைக்கப்படவேண்டிய 32 தளங்களில் 13 தளங்கள் ஏற்கனவே வெற்றிகரமாகப் பொருத்தப்பட்டுள்ளன. இதற்கிடையில், சைதாப் பேட்டைப் பகுதியில் அணுகு சாலை மற்றும் பாதுகாப்புத் தடுப்புகள்அமைக்கும் பணிகள் நிறைவடைந்துள்ளன. இந்தப் பணிகள் நடைபெறும் பகுதிகளில், குறிப்பாக பேருந்து நிறுத்தங்கள் உள்ள இடங்களில் பயணிகளுக்குத் தற்காலிக நிழற்குடைகள் அமைக்கப்பட வேண்டும் என்றும், கட்டுமானப் பகுதிகளில் இருந்து தண்ணீர் கீழே சிந்துவதைத் தடுக்கத் தகுந்த பாதுகாப்பு ஏற்பாடுகள் செய்யப்பட வேண்டும் என்றும் பொதுமக்கள் கோரிக்கை விடுத்துள்ளனர்.