#Title

மேகதாது திட்டம்: அமைச்சரவையில் பங்கேற்றுள்ள தமிழ்நாடு காங்கிரஸ் தலையிட்டு தடுத்து நிறுத்தவேண்டும்! கழகத் துணைப் பொதுச் செயலாளர் கனிமொழி கருணாநிதி எம்.பி. வலியுறுத்தல்!

சென்னை, மே 26 –

“த.வெ.க.வின் அமைச்சரவையில் காங்கிரஸ் அமைச்சர்கள் பங்கு கொண்டிருக்கும் நிலையில், காவிரிப் பிரச்சினையில் தமிழ்நாடு காங்கிரஸ் கமிட்டி தலையிட்டு உடனடியாக மேகதாது திட்டத்தைத் தடுத்து நிறுத்தும் என நம்புகிறேன்” என தி.மு.க. எம்.பி. கனிமொழி கருணாநிதி தெரிவித்தார்.

இதுகுறித்து அவர் வெளியிட்டஎக்ஸ் பதிவில்,

“காவிரியின் குறுக்கே மேகதாதுவில் அணைகட்டப்படும் என கர்நாடக அரசு அறிவித்திருப்பது கடும் கண்டனத்திற்குரியது. மேற்கு மண்டலத்தில் தொடங்கி தஞ்சை டெல்டா வரைதமிழ்நாட்டில் பாதியை பாலைவனமாக்கத் துடிக்கும் கர்நாடக காங்கிரஸ் அரசின் திட்டத்தை, தி.மு.க. ஆட்சியிலிருந்த வரை தடுத்து நிறுத்தியது.

தற்போது, த.வெ.க.வின் அமைச்சரவையில் காங்கிரஸ் அமைச்சர்கள் பங்குகொண்டிருக்கும் நிலையில், காவிரிப் பிரச்சினையில் தமிழ்நாடு காங்கிரஸ் கமிட்டி தலையிட்டு உடனடியாக அத்திட்டத்தைத் தடுத்து நிறுத்தும் என நம்புகிறேன்” எனத் தெரிவித்துள்ளார்.

காவிரி நடுவர்மன்ற தீர்ப்பிற்கு எதிராக கர்நாடக அரசு, மேகதாதுவில் அணை கட்டுவதற்கான முயற்சிகளை தொடர்ந்து மேற்கொண்டு வருகிறது.

மேகதாது அணை பிரச்சினை தொடர்பாக கடந்த ஆட்சிக் காலத்தில் தமிழ்நாடு அரசு உச்ச நீதிமன்றத்தில் தாக்கல் செய்த மறுசீராய்வு மனுவையும் உச்ச நீதிமன்றம் 24.05.2026 அன்று தள்ளுபடி செய்துள்ளது.

இந்நிலையில், “காவிரிப் பிரச்சினையில் தமிழ்நாடு காங்கிரஸ் கமிட்டி தலையிட்டு உடனடியாக மேகதாது திட்டத்தைத் தடுத்து நிறுத்தும் என நம்புகிறேன்” என தி.மு.க. எம்.பி. கனிமொழி கருணாநிதி தெரிவித்தார்.