திருவள்ளூர், மே 28:
திருவள்ளூர் அடுத்த மணவாளநகர் அருகே உள்ள ஜல்லி மேடு பகுதி மற்றும் கன்னியம்மன் கோவில் தெரு உள்ளிட்ட பகுதிகளில் கடந்த 2 நாட்களாக நீடித்து வரும் மின்தடையை கண்டித்து, என்டிபி திருமண மண்டபம் எதிரே சாலையில் அமர்ந்து 300–க்கும் மேற்பட்ட பொதுமக்கள் போராட்டத்தில் ஈடுபட்டனர்.
இந்த போராட்டத்தில் பெண்கள், முதியோர்கள், இளைஞர்கள் உள்ளிட்ட ஏராளமானோர் கலந்து கொண்டு தங்களது கோரிக்கைகளை வலியுறுத்தி முழக்கங்கள் எழுப்பினர். “உடனே மின்சாரம்வழங்க வேண்டும்”, “மக்களை அலட்சியம் செய்யாதீர்கள்” என தொடர்ந்து கோஷங்கள் எழுப்பியதால் அப்பகுதியில் பரபரப்பு நிலவியது. மேலும், மின்சாரம்இல்லாததால் குடிநீர் விநியோகம் முற்றிலும் பாதிக்கப்பட்டுள்ளதாக பொதுமக்கள்வேதனை தெரிவித்தனர்.
“குழந்தைகளுக்கு குடிக்க கூட தண்ணீர் இல்லை. இரவு முழுவதும் இருளில் தவிக்கிறோம். முதியோர்கள், கர்ப்பிணி பெண்கள் கடும் சிரமத்தில் உள்ளனர்” என பெண்கள் கண்ணீருடன் தெரிவித்தனர். மேலும், “மின்சாரம் வழங்கும் வரை இந்த போராட்டத்தை கைவிடமாட்டோம். பகலும் இரவும்தொடர்ந்து போராட தயாராக இருக்கிறோம்” என்று பொதுமக்கள் தெரிவித்ததால் அங்கு பரபரப்பாக காணப்பட்டது.
தகவல் அறிந்து சம்பவ இடத்திற்குவந்த மணவாளநகர் போலீசார் போராட்டத்தில் ஈடுபட்ட பொது மக்களிடம் பேச்சுவார்த்தையில் ஈடு பட்டனர். இந்த போராட்டம் காரணமாக அப்பகுதியில் பதற்றமான சூழ்நிலை நிலவியது. உடனடியாக மின்வாரிய அதிகாரிகளிடம் பேசி நடவடிக்கை எடுக்கப்படும் என உறுதியளித்ததையடுத்து பொது மக்கள் கலைந்து சென்றனர்.
காஞ்சிபுரம் வடக்கு மாவட்டம் ஆலந்தூர் தெற்கு பகுதி நங்கநல்லூர் கே.சி.டி. மஹாலில் ஆலந்தூர் தெற்கு பகுதி கழக செயலாளர் என்.சந்திரன் தலைமையில், நடைபெற்ற பொது உறுப்பினர்கள் கூட்டத்தில் காஞ்சி வடக்கு மாவட்டக் கழகச் செயலாளரும், முன்னாள் அமைச்சருமான தா.மோ.அன்பரசன், கழக அமைப்புச் செயலாளர் ஆர்.எஸ்.பாரதி ஆகியோர் ஆலோசனைகளை வழங்கினார்கள். இதில் இ.கருணாநிதி, எம்.எஸ்.கே. இப்ராஹிம், கோல்டு பிரகாஷ், சுந்தர்ராஜன், பாபு, ரமேஷ், சாலமோன், துர்கா தேவி நடராஜன், வட்ட கழக செயலாளர்கள் நடராஜன், உலகநாதன், ஜேசுதாஸ், ஜெகதீஸ்வரன், வேலவன், சரவணா, ஆகியோர் கலந்து கொண்டு சிறப்பித்தனர்.