சென்னை, மே 28–
தமிழ்நாட்டில் ஆட்சி மாற்றம் ஏற்பட்டதின் விளைவாக அண்மைக்காலமாக அமைச்சர்கள் மற்றும் மக்கள் பிரதிநிதிகள் மாவட்ட ஆட்சியர் அலுவலகங்கள் முதல் சென்னை தலைமைச் செயலகம் வரை தங்களின் அதிகாரப்பூர்வ ஆய்வு கூட்டங்கள் மற்றும் அரசு பணிகளை வீடியோவாக பதிவு செய்து, அதற்கு திரைப்பட பின்னணி இசை மற்றும் பாடல்களை வைத்து சமூக வலைதளங்களில் ரீல்ஸ் ஆக பதிவிடும் கலாசாரம் பரவலாக அதிகரித்து வருகிறது. மக்கள் வரிப்பணத்தில் இயங்கும் அரசு இயந்திரத்தின் மாண்பையும், ரகசிய காப்பு பிரமாணத்தையும் மீறும் வகையில் இந்த செயல்பாடுகள் அமைந்திருப்பதாக சமூக ஆர்வலர்கள் மத்தியிலும் பொதுமக்கள் மத்தியிலும் கடுமையான விமர்சனங்கள் எழுந்துள்ளன.
அரசு அலுவலகங்கள் மக்களின் வாழ்வாதார கோரிக்கைகளும், மாநிலத்தின் மிக முக்கிய ரகசிய ஆவணங்களும் கையாளப்படும் உயர் பாதுகாப்பு மற்றும் கண்ணியம் நிறைந்த இடங்களாக உள்ளது. இந்நிலையில் புதிதாக பொறுப்பேற்றுள்ள அமைச்சர்கள் தங்களின் மேஜைகளில் இருக்கும் ரகசிய அரசாணைகள், பொதுமக்கள் அளிக்கும் மனுக்கள் ஆகியவற்றின் பின்னணியில் நின்று கொண்டு, தங்களின் சுய விளம்பரத்திற்காக மாஸ் காட்டும் சினிமா வசனங்கள் மற்றும் பாடல்களுடன் வீடியோக்களை எடிட் செய்து வெளியிடுவது, அவர்கள் பதவியேற்கும் போது எடுத்துக் கொண்ட ரகசிய காப்பு பிரமாணத்தை மீறும் செயலாகும் என்று சட்ட வல்லுநர்கள் சுட்டிக்காட்டுகின்றனர்.
அமைச்சர்கள் தங்களின் சொந்த கட்சி நிகழ்ச்சி களையோ அல்லது
அரசியல் மேடை பேச்சுகளையோ இதுபோன்ற சினிமா பாடல்களுடன் ரீல்ஸ் செய்து பதிவிட்டால் அதில் பெரிய அளவில் தவறில்லை. ஆனால், அதிகாரப்பூர்வ அரசு ஆய்வு கூட்டங்களில் பங்கேற்கும் மாவட்ட ஆட்சியர் முதல் அரசு ஊழியர்கள் வரை அனைவரையும் தங்களின் வீடியோவிற்குள்கொண்டு வந்து அவர்களின் அனுமதியின்றி தங்களின் சமூக வலைதளப் பக்கத்தில் பதிவிடுகின்றனர்.
இவர்களின் செயல் பல அரசு அதிகாரிகளையும் உயர் அதிகாரிகளையும் சங்கடத்திற்குள்ளாக்குகிறது. தொழில்துறை அமைச்சர் கீர்த்தனா, இயற்கை வளங்கள்துறை அமைச்சர் பிரபு உள்ளிட்டோர் தங்களது சமூக வலைதளப்பக்கத்திலேயே அமைச்சர்கள் தங்களது நண்பர்கள், கட்சியினரின் இது போன்ற ரீல்ஸ் வெளி யிட்டுள்ளனர். மேலும், சில சமூக வலைதள கணக்கு மூலம் ரீல்ஸ் வீடியோக்களை பகிர்ந்து வருகின்றனர். அமைச்சர்களாகவும், பொறுப்பு மிக்க மக்கள் பிரதிநிதிகளாகவும் மக்கள் தங்களை தேர்ந்தெடுத்து மிக உயரிய பொறுப்பில் அமர வைத்த பிறகும் சினிமா மோகத்தில் இருந்து அவர்கள் வெளி வராமல் உள்ளதாக சமூக ஆர்வலர்கள் தெரிவிக்கின்றனர்.
இது குறித்து சமூக ஆர்வலர்கள் கூறுகையில், “சமூக வலைதள பயன்பாடுகள் இன்று மிகப்பெரும் பலமாய் மாறியுள்ளது. மக்களால் தேர்ந்தெடுக்கப்பட்டு மக்கள் பிரதிநிதிகள் எந்தவித கட்டுபாடும் இல்லாமல் சர்வ சாதாரணமாக நாட்டின் மிக உயர்ந்த அரசு அலுவலகமான தலைமை செயலகம், மாவட்டத்தின் முதன்மை அலுவலகமான மாவட்ட ஆட்சியர் அலுவலகம் ஆகியவற்றில் எளிதாக வீடியோ எடுத்து ரீல்ஸ் பதிவிடுவது தவறான முன்னுதாரணமாகி விடும். மக்கள் பிரதிநிதிகள் தங்களின் ஆய்வு பணிகளையும், திட்டங்களையும் மக்களுக்கு தெரியப்படுத்துவதில் தவறில்லை. ஆனால், அதனை அதிகாரப்பூர்வ தகவலாக, செய்தியாக தெரியப்படுத்தலாம்.
அதனை தவிர்த்து, சினிமாத்தனமான காட்சிகளாக மாற்றுவது அரசு நிர்வாகத்தின் நம்பகத்தன்மையை சீர்குலைப்பதாக அமையும். எனவே, மாநிலத்தின் முதலமைச்சர் தங்கள் அவையின் மக்கள் பிரதிநிதிகளுக்கு தகுந்த அறிவுரை வழங்க வேண்டும்” என்றனர்.
நீதிமன்ற உத்தரவு :- முன்னதாக, கடந்த 2022ம் ஆண்டு அரசு அலுவலக வேலை நேரத்தில் ஊழியர்கள் மொபைல் போன் பயன்படுத்துவது குறித்த வழக்கை விசாரித்த சென்னை உயர் நீதிமன்றம், அரசு அலுவலகங்களுக்குள் ஊழியர்கள் மொபைல் போன் பயன்படுத்துவதும், உள்ளே நடப்பதை வீடியோ எடுப்பதும் கடுமையான நடத்தை விதிமீறல் என்று உத்தரவை பிறப்பித்தி ருந்தது. உயர் நீதிமன்றம் அரசு அலுவலர்களுக்கு இத்தகைய கடுமையான எச்சரிக்கையை விடுத்துள்ள நிலையில், அரசை நிர்வகிக்க பொறுப்பேற்றுள்ள அமைச்சர்களே அதனை மீறி வருவது பொதுமக்களுக்கு தவறான முன்னுதாரணத்தை ஏற்படுத்தும் வகையில் அமைந்துள்ளது.