#Title

டெல்லி செல்லும் தமிழக முதல்வர் திருப்பூர் தொழில்துறையினரை சந்திக்காதது ஏமாற்றம்! ‘‘டெல்லி பயணம் தங்களுக்கு சாதகமற்றதாகவே இருக்கும்” தொழில்துறையினர் வேதனை!

புதுடெல்லி, மே 28–

டெல்லி செல்லும் தமிழக முதல்வர் திருப்பூர் தொழில்துறையினரை சந்திக்காதது ஏமாற்றம் அடைந்திருப்பதாகவும், மேலும் டெல்லி பயணம் தங்களுக்கு சாதக மற்றதாகவே இருக்கும்” என்று தொழில்துறையினர் வேதனையடைந்துள்ளனர்.

தமிழக முதலமைச்சராக ஜோசப் விஜய் பதவியேற்று கொண்டதை தொடர்ந்து, அரசு முறை பயணமாக நேற்று முதன் முறை யாகடெல்லி சென்று ஒன்றிய பிரதமர் மற்றும் ஒன்றிய அமைச்சர்களை சந்திக்க உள்ளார். மாநில வளர்ச்சி சார்ந்த பல்வேறு கோரிக்கைகளை முன் வைக்க முதலமைச்சர் டெல்லி செல்லும் வேளையில், அதற்கு முன்னதாக அவர் தங்களை நேரில் சந்தித்து தங்கள் துறை சார்ந்த கோரிக்கைகளை பெறாதது திருப்பூர் பின்னலாடை தொழில் துறையினர் மத்தியில் பெரும் ஏமாற்றத்தை ஏற்படுத்தியுள்ளதாக வேதனை தெரிவித்துள்ளனர்.

இந்தியாவின் மிக முக்கிய ஏற்றுமதி நகரமாகவும், பல்லாயிரம் கோடி ரூபாய் அந்நியச் செலாவணியை ஈட்டித்தரும் மையமாகவும் விளங்கும் திருப்பூரின் தொழில் தேவைகளை, மாநில அரசோ அல்லது துறை சார்ந்த அமைச்சர்களோ நேரில் கேட்டறிந்து, இந்த டெல்லி சந்திப்பில் வலியுறுத்தியிருக்க வேண்டும் என்பதே ஒட்டுமொத்த தொழில் நகரத்தின் எதிர்பார்ப்பாக இருந்தது. அப்படிசெய்திருந்தால், தற்போது கடுமையான நெருக்கடியை சந்தித்து வரும் தொழில் துறையினருக்கு அது பெரும் நம்பிக்கையை தந்திருக்கும் என பின்னலாடை உற்பத்தி மற்றும் ஏற்றுமதி சார்ந்த தொழில் துறையினர் தெரிவிக்கின்றனர்

தற்போது நூல் விலை ஏற்றம், மின் கட்டண உயர்வு. சர்வதேச சந்தையில் ஏற்பட்டுள்ள மந்தநிலை, பருத்தி தட்டுப்பாடு, போர்ச்சூழலால் உயர்ந்துள்ள மூலப்பொருட்களின் விலை மற்றும் பெட்ரோல், டீசல் விலை உயர்வு போன்ற பல்வேறு இக்கட்டான காரணங்களால் திருப்பூரின் சிறு, குறு மற்றும் நடுத்தர பின்னலாடை நிறுவனங்கள் வாழ்வா? சாவா? என்றகடுமையான போராட்டத்தை எதிர்கொண்டு வருகின்றன. இத்தகைய சூழல் நிலவிய போதிலும், புதிய அரசு பொறுப்பேற்றது முதல் இதுவரை முதலமைச்சரோ அல்லது தொழில் சார்ந்த அமைச்சர்களோ தங்களை நேரில் சந்தித்து குறைகளை கேட்காதது தொழில்துறையினருக்கு பலத்த ஏமாற்றத்தை அளித்துள்ளது. திருப்பூரின் பொருளாதார பிரச்சினைகளையும், தொழிலாளர்களின் வாழ் வாதார சிக்கல்களையும் டெல்லி மேலிடத்தின் கவனத்திற்கு கொண்டு சென்று உரிய தீர்வுகளை பெற்றுத் தர வேண்டிய கட்டாயம் மாநில அரசுக்கு உள்ள நிலையில், எந்தவொரு கருத்துக்கேட்பு கூட்டமும் நடத்தாமல் முதலமைச்சர் டெல்லிக்கு சென்றுள்ளது தங்களுக்கு பெரும் வேதனையளிப்பதாக தொழில் அமைப்புகள் கவலை தெரிவித்துள்ளன.

இது குறித்து திருப்பூர் தொழில் துறையினர் கூறுகையில், “இந்தியாவின் ஒட்டுமொத்த பின்னலாடை ஏற்றுமதியில் 68 சதவீதத்திற்கும் அதிகமான பங்களிப்பை திருப்பூர் வழங்கி வருகிறது. இங்கு தமிழகம் மட்டுமன்றி 20க்கும் மேற்பட்ட மாநிலங்களை சேர்ந்தபல லட்சம் தொழிலாளர்கள் வாழ்வாதாரம் பெற்று வருகின்றனர். பல்வேறு மாநிலங்களின் பொரு ளாதார சுழற்சிக்கு காரணமான இத்தொழில் தற்போது சந்தித்து வரும் சவால்கள் குறித்து, தேர்தல் சமயத்தில் போட்டியிட்ட வேட்பாளர்கள் நேரில் வந்து கோரிக்கைகளை பெற்று சென்றனர்.

ஆனால், வெற்றி பெற்று புதிய அரசு அமைந்த பிறகு, இத்துறைக்கென நியமிக்கப்பட்ட அமைச்சர்கள் யாரும் இதுவரை தங்களை சந்தித்து கோரிக்கைகளை பெறவில்லை. இந்த சூழ்நிலை யில், டெல்லி செல்லும் முன் முதலமைச்சர் தங்கள் துறைசார்ந்த அவசர தேவைகளை கேட்டு பெற்று, அதையும் ஒன்றிய அரசிடம் வலியுறுத்தியிருந்தால் ஏதேனும் நிவாரணம் கிடைக்க வாய்ப்பாக இருந்திருக்கும். ஆனால், தங்களின் கோரிக்கைகளை மாநில அரசே இன்னும் பெறாத சூழலில், முதலமைச்சரின் டெல்லி பயணம் தங்களுக்கு சாதகமற்றதாகவே இருக்கும்” என்றனர்.