#Title

கோவையில் காவலர்கள் தாக்கியதால் வலிப்பு ஏற்பட்டு மருத்துவமனையில் அனுமதிக்கப்பட்ட வாலிபர்!

கோவை, மே.29–

கோவையில் காவல் நிலையத்தில் காவலர்கள் தாக்கியதால் வலிப்பு ஏற்பட்டு வாலிபர் மருத்துவமனையில் அனுமதிக்கப்பட்டார். அதற்கு காவல்துறை யினர் மறுப்பு தெரிவித்துள்ளனர்.

கோவை சிங்கா நல்லூரை அடுத்த நீலிக்கோணாம்பாளையம் பகுதியைச் சேர்ந்தவர் சாந்தி. இவரது மகன் மணிகண்டன் (24). கடந்த 24ம் தேதி (ஞாயிற்றுக்கிழமை) அன்று மணிகண்டன் தனது நண்பர்களுடன் சேர்ந்து அப்பகுதியில் உள்ள டாஸ்மாக் கடைக்கு சென்றுள்ளார். அங்கு மதுபோதையில் நண்பர்களுக்குள் தகராறு ஏற்பட்டு அடிதடியாக மாறியுள்ளது. இந்த நிலையில், பிரச்சினை குறித்து விசாரிப்பதற்காக சிங்கா நல்லூர் காவல்துறையினர் மணிகண்டனை காவல் நிலையத்திற்கு அழைத்துள்ளனர். மணிகண்டனும், அவரது தாய் சாந்தியும் காவல் நிலையம் சென்றார். அப்போது சாந்தியை வெளியே அனுப்பிவிட்டு காவலர்கள் விசாரித்த போது மணி கண்டனை தாக்கியதாக தெரிகிறது. இதனால் அவருக்கு வலிப்பு ஏற்பட்டுள்ளது.இதை கண்டு அதிர்ச்சி அடைந்த சாந்தி மகன் மணிகண்டனை மீட்டு கோவை அரசு மருத்துவமனையில் சிகிச்சைக்கு சேர்த்தார். இதனால் அங்கு பரபரப்பு ஏற்பட்டது.

இது குறித்து சாந்தி கூறுகையில் காவலர்கள் எனது மகன் மணிகண்டனை விசாரணைக்கு அழைத்து தாக்கி உள்ளனர். அதனால் வலிப்பு ஏற்பட்டு, ரத்த வாந்தி எடுத்து சிகிச்சை பெற்று வருகிறார். வலிப்பு ஏற்பட்ட போது காவலர்கள் ஆம்புலன்ஸ் கூட ஏற்பாடு செய்து தரவில்லை.நான் டாக்சி வைத்து எனது மகனை அரசு மருத்துவமனைக்கு அழைத்து வந்தேன் என்று கூறினார்.

இதுகுறித்து காவல்துறையினர் கூறும்போது, “அடிதடி பிரச்சினையில் மணிகண்டனை விசாரணைக்கு அழைத்தோம். ஆனால் அவர் மீது எவ்வித தாக்குதலும் நடத்தவில்லை. விசாரிக்கும் போது பதற்றத்தில் அவருக்கு மூச்சுத்திணறல் பிரச்சினை ஏற்பட்டதால் காவல் நிலையத்தின் வெளியே அவரை அமர வைத்தோம். அந்த சிசிடிவி காட்சிகளும் உள்ளன”, என்றனர்.