திருவள்ளூர் மே 29:–
முத்தமிழ் அறிஞர் டாக்டர் கலைஞர் அவர்களின் பிறந்த நாள் விழாவை முன்னிட்டு, திருவள்ளூர் மேற்கு மாவட்டத்திற்கு உட்பட்ட அனைத்து ஒன்றியம், நகரம், பேரூர் கழகங்களில் கழகத்தினர்கள் சிறப்பான முறையில் விழாவை கொண்டாட வேண்டும் என மாவட்ட கழக செயலாளர் திருத்தணி எஸ். சந்திரன் வேண்டுகோள் விடுத்துள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது:–
முத்தமிழ் அறிஞர் டாக்டர் கலைஞர் அவர்கள் தமிழ்நாட்டின் வளர்ச்சிக்கும், சமூக நீதி கொள்கைக்கும் மிகப்பெரிய பங்காற்றிய தலைவர். பெண்களுக்கு சொத்தில் சம உரிமை வழங்கிய சட்டம், விவசாயி களுக்கு இலவச மின்சாரம், சமத்துவபுரம் திட்டம், உழவர் சந்தை, தமிழ் மொழிக்கான செம்மொழி அந்தஸ்து பெற்றுத் தந்தது, மாற்றுத்திறனாளிகள் மற்றும் ஏழை மக்களுக்கான பல்வேறு நலத்திட்டங்கள் உள்ளிட்ட எண்ணற்ற சாதனைகளை தமிழகத்திற்கு வழங்கியவர் கலைஞர்.
அவரது பிறந்த நாள் விழாவை முன்னிட்டு மாநில, மாவட்ட கழக நிர்வாகிகள், ஒன்றிய, நகர, பேரூர் கழக செயலாளர்கள், அணிகளின் நிர்வாகிகள், கழக இந்நாள் மற்றும் முன்னாள் பொறுப்பாளர்கள், மூத்த முன்னோடிகள் அனைவரும் தங்களது பகுதிகளில் கழகக் கொடியேற்றி, தோரணங்கள் அமைத்து விழாவை வெகு விமர்சையாக கொண்டாட வேண்டும்.
மேலும் ஏழை, எளிய மக்களுக்கு பயன்படும் வகையில் பல்வேறு நலத்திட்ட உதவிகள் வழங்க வேண்டும். பள்ளி மாணவ, மாணவிகளுக்கு கல்வி உபகரணங்கள் வழங்குதல், பல்வேறு காப்பகங்களில் நலத்திட்ட உதவிகள் வழங்குதல், பொதுமக்களுக்கு அறுசுவை உணவு வழங்குதல் உள்ளிட்ட சமூக நலப்பணிகளை மேற்கொள்ள வேண்டும்.
அதுமட்டுமல்லாமல், திராவிட மாடல் ஆட்சியின் சாதனைகள் மற்றும் முத்தமிழ் அறிஞர் டாக்டர் கலைஞர் அவர்கள் தமிழ்நாட்டிற்காக செய்த முக்கிய சாதனைகளை பொதுமக்கள் அறிந்து கொள்ளும் வகையில் ஏற்பாடுகள் செய்ய வேண்டும். எனவே கழக நிர்வாகிகள் மற்றும் தொண்டர்கள் அனைவரும் உற்சாகத்துடன் கலந்து கொண்டு முத்தமிழ் அறிஞர் டாக்டர் கலைஞர் அவர்களின் பிறந்த நாள் விழாவை மக்கள் மத்தியில் சிறப்பாக கொண்டாடிட வேண்டும் என்று மாவட்ட கழக செயலாளர் திருத்தணி எஸ். சந்திரன் தனது அறிக்கையில் தெரிவித்துள்ளார்.