சென்னை, மே 31 –
சென்னை வேளச்சேரியில், மூதாட்டி பாலியல் வன்கொடுமை செய்யப்பட்ட வழக்கில் 2 வடமாநில இளைஞர்கள் கைது செய்யப்பட்டுள்ள நிலையில், அதில் தொடர்புடைய மேலும் 3 பேரை பிடிக்க முடியாமல் போலீசார் திணறி வருகின்றனர்.
வேளச்சேரி பகுதியில் உள்ள உணவகங்களில் பணிபுரியும் பீகார் இளைஞர்கள் முகமது மஹலாப், முகமது ஆதில் ஆகியோர், நள்ளிரவில் பேருந்து நிலையம் அருகே சென்று டீ குடித்துள்ளனர். அறைக்கு திரும்பும் வழியில், நின்றிருந்த மூதாட்டி டீ குடிக்க பணம் கேட்டுள்ளார். டீ வாங்கித் தருவதாக கூறி, மூதாட்டியை ரேபிடோ பைக் புக் செய்து அழைத்துச் சென்றுள்ளனர். பைக் டாக்சி ஓட்டுநரிடம் மூதாட்டி தங்களது தாயார் என்றும், டீ குடித்துவிட்டு வீட்டிற்கு அழைத்துச் செல்வதாகவும் கூறியுள்ளனர்.
இதையடுத்து, டாக்சி ஓட்டுநர் மஹலாப்பையும், மூதாட்டியையும் அழைத்துச் சென்று, மஹலாப் தங்கியிருந்த அறை அருகே விட்டுவிட்டு சென்றுள்ளார். முகமது ஆதில் நடந்தே அறைக்கு வந்ததாக தெரிகிறது.
இதையடுத்து, அருகே உள்ள மாநகராட்சி பூங்காவுக்கு அழைத்துச் சென்று, மூதாட்டியை மிரட்டியும் கட்டாயப்படுத்தியும் இருவரும் பாலியல் வன்கொடுமை செய்துள்ளனர். பின்னர், இருவரும் தங்களது அறைக்கு சென்றுவிட்டனர். மூதாட்டி சாலையில் ரத்த காயங்களுடன் அழுதுகொண்டே நின்றிருந்த தைப் பார்த்த அந்த வழியாகச் சென்ற வாகன ஓட்டிகள், இதுகுறித்து போலீசாருக்கு தகவல் அளித்தனர். போலீசார் மூதாட்டியை மீட்டு மருத்துவமனையில் சேர்த்தனர்.
விசாரணையில் 5 பேர் தன்னை மிரட்டி பாலியல் வன்கொடுமை செய்ததாக மூதாட்டி தெரிவித்துள்ளார். இதற்கிடையே, அறைக்கு திரும்பிய மஹலாப்பும், ஆதிலும், பயத்தில் மூதாட்டிக்கு என்ன ஆனது என பார்க்க மீண்டும் மாநகராட்சி பூங்கா வுக்கு சென்றுள்ளனர். அப்போது, வழியில் அவர்களை மறித்த ரோந்து காவலர், சந்தேகத்தின் பேரில், இருவரையும் புகைப்படம் எடுத்து மேலதிகாரிகளுக்கு அனுப்பியுள்ளார். இதற்கிடையே, மூதாட்டி விவகாரத்தை விசாரணை நடத்திய போலீசார் சி.சி.டி.வி. பதிவுகள் மற்றும் காவலர் அனுப்பிய புகைப்படங்கள் அடிப்படையில், மஹலாப்பையும், ஆதிலையும் கைது செய்தனர்.
இந்த சம்பவத்தில் தொடர்புடைய மேலும் 3 பேரை பிடிக்க முடியாமல் போலீசார் திணறி வருகின்றனர்.