திருப்பரங்குன்றம், ஜூன் 2 –
திருப்பரங்குன்றம் தொகுதியில் தொடர் மின்வெட்டு, குடிநீர் தட்டுப்பாடு உள்ளிட்ட பிரச்சினைகளை கண்டித்து, அமைச்சர் நிர்மல்குமாரை பெண்கள் முற்றுகையிட்டது பெரும் பரபரப்பை ஏற்படுத்தியது. மதுரை திருப்பரங்குன்றம் தொகுதிக்கு உட்பட்ட தனக்கன்குளம் ஊராட்சியில் உள்ள வெங்கலமூர்த்தி நகரில், ஊராட்சி பொது நிதியில் இருந்து ஏற்கனவே உள்ள காவிரி கூட்டு குடிநீர் திட்டம் மூலம் குடிநீர் கொண்டு செல்ல திட்டம் செயல்படுத்தப்படுகிறது.
இத்திட்டத்திற்கான பணிகளை மின்துறை அமைச்சர் நிர்மல்குமார் நேற்று காலை துவக்கி வைத்தார். பின்னர் தேர்தலில் வெற்றிக்காக நன்றி கூற வெங்கலமூர்த்தி நகர் மக்களை சந்திக்க சென்றார்.
அப்போது அப்பகுதி பெண்கள் மற்றும் பொதுமக்கள் அமைச்சரை முற்றுகையிட்டு, ‘‘எங்கள் பகுதிக்கு குடிநீரே வருவதில்லை. காசு கொடுத்துத்தான் வாங்கி குடிக்க, குளிக்க முடிகிறது. தெருவிளக்குகள் அனைத்தும் எரியாமல் கிடக்கிறது. அடிக்கடி மின்வெட்டு ஏற்படுகிறது.
கோடைகாலம் என்பதால் வியர்வையிலும், கொசுக்கடியிலும் பெரியவர்கள், குழந்தைகள் தவித்து வருகிறோம்.
மேலும் கஞ்சா உள்ளிட்ட போதைப்பொருட்களுடன், சமூக விரோதிகள் நடமாட்டம் அதிகரித்திருப்பது, பெண்களுக்கு பாதுகாப்பில்லாத நிலையை ஏற்படுத்தி இருக்கிறது’’ என்று சர மாரியாக பல்வேறு குற்றச்சாட்டு களை தெரிவித்தனர்.
பதில் சொல்ல முடியாமல் திணறிய அமைச்சர் நிர்மல்குமார், ‘‘தற்காலிகமாக குடிநீர் வழங்க ஏற்பாடு செய்யப்பட்டு, அதற்கான பணிகள் துவங்கி இருக்கிறது’’ என சமாளித்தார்.