சென்னை,ஜூன்.2–
மக்கள் தீர்ப்பை மதித்து ஆக்கப்பூர்வமான எதிர்க்கட்சியாக தி.மு.க. செயல்படும் என்று நெஞ்சை நிமிர்த்தியது கழகத் தலைவர் மு.க.ஸ்டாலின் அவர்களின் அரசியல் அறம் என்றும், திருச்சியில் முதலமைச்சர் விஜய் அரசியல் புனிதர் போல புளுகு மூட்டைகளை அவிழ்த்து விடுவதை பார்த்து தமிழ்நாடு சிரிக்கிறது என்றும் ‘DMK IT WING’ காட்டமான பதில் அளித்துள்ளது.
இதுகுறித்து ‘DMK IT WING’ காட்டமான பதில் வருமாறு:
தன்னை யாரோ ஆட்சியமைக்க விடாமல் தடுத்ததாகத் திருச்சியில் மேடையேறி முதலைக்கண்ணீர் வடிக்கிறார் முதலமைச்சர் விஜய்! உற்றுப் பார்த்தால், நாட்டின் அரசமைப்புச் சட்டம் (Constitution) என்றால்
என்னவென்றே அவருக்குத் தெரியவில்லை என்பது அவரது பேச்சிலேயே அப்பட்டமாகத் தெரிகிறது.
உண்மையிலேயே உங்களுக்குத் திராணி இருந்தால், ஆளுநரிடம் நீங்கள் அளித்த உரிமைகோரல் கடிதங்களை முதலில் மக்கள் மன்றத்தில் வெளியிடுங்கள்! எப்படியாவது பதவியைப் பிடித்துவிட வேண்டும் என்ற பதவிவெறியில் நீங்கள் அரங்கேற்றிய தகிடுதத்தங்களை நாடறியும்!
காரில் அரங்கேறிய அரசியல் அசிங்கம்: அ.ம.மு.க. உறுப்பினர் காமராஜ் அவர்களைக் காரில் வைத்து அவசரகதியில் கையெழுத்து வாங்கியதும், அந்தக் காணொலியை உங்கள் கட்சியினரே சமூக வலைத்தளங்களில் பரப்பி அது அம்பலமானதும் தான் உங்கள் நேர்மையா?
பச்சையான குதிரைபேரம்: இதுவரை தமிழ்நாடு அரசியலில் யாரும் செய்யத் துணியாத வகையில், நம்பிக்கை வாக்கெடுப்புக்கு முன்பு அதிமுக வின் ஒரு தரப்பினரைச் சந்தித்து, அவர்களைக் கொறடா உத்தரவை மீறி வாக்களிக்கச் செய்த திரைமறைவு வேலைகளைச் செய்தது யார்? இதுதான் நீங்கள் மேடைதோறும் முழங்கும் நேர்மையின் இலக்கணமா?
இத்தனை அரசியல் தந்திரங்களையும், ஜனநாயக மாண்புக்கு எதிரான வேலைகளையும் செய்துவிட்டு, இப்போது திருச்சியில் ஏதோ ‘அரசியல் புனிதர்’ போலப் புளுகுமூட்டைகளை அவிழ்த்து விடுவதைப் பார்த்துத் தமிழ்நாடு சிரிக்கிறது!
முதல் நாளே மக்கள் தீர்ப்பை மதித்து ஆக்கப்பூர்வமான எதிர்க்கட்சியாக திமுக செயல்படும் என்று நெஞ்சை நிமிர்த்தி, அதிகாரப்பூர்வமாக அறிவித்த எங்கள் கழகத் தலைவர் திரு. மு.க. ஸ்டாலின் அவர்களின் அரசியல் அறம் எங்கே? முதலமைச்சர் நாற்காலியில் அமர்ந்த பின்பும் உங்கள் நிர்வாகத் தோல்வியை மறைக்க, பிறர் மீது நீங்கள் பழிபோடும் தரமற்ற அரசியல் எங்கே?
இவ்வாறு ‘DMK IT WING’ கூறியுள்ளது.